ଦୁବାଇ,୨।୧୧: ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ରେ ଟିମ୍ ଇଣ୍ଡିଆ ପାଇଁ ଲୋକେଶ ରାହୁଲ ଓ ଇଶାନ କିଷନ ଓପନିଂ କରିଥିଲେ। ଫଳରେ ୩ୟ କ୍ରମରେ ବ୍ୟାଟିଂ କରିଥିଲେ ଦୀର୍ଘ ଦିନ ହେଲା ଓପନିଂ କରୁଥିବା ରୋହିତ ଶର୍ମା। ଏଥିଲାଗି ମ୍ୟାଚ୍ ପୂର୍ବରୁ ଟିମ୍ ମ୍ୟାନେଜମେଣ୍ଟ ଓ ସିନିୟର ଖେଳାଳିମାନେ ମିଳିତ ନିଷ୍ପତ୍ତି ନେଇଥିଲେ। ଆଉ କିଷନଙ୍କୁ ଓପନିଂ ପଠାଇବା ନିଷ୍ପତ୍ତିରେ ରୋହିତ ମଧ୍ୟ ଏକମତ ଥିଲେ ବୋଲି କହିଛନ୍ତି ବ୍ୟାଟିଂ କୋଚ୍ ବିକ୍ରମ ରାଠୋର।
ଆଫଗାନିସ୍ତାନ ମ୍ୟାଚ୍ ପୂର୍ବରୁ ଆୟୋଜିତ ଖବରଦାତା ସମ୍ମିଳନୀରେ ରାଠୋର କହିଛନ୍ତି, ମ୍ୟାଚ୍ ପୂର୍ବ ରାତିରେ ସୂର୍ଯ୍ୟ ପିଠିରେ ଯନ୍ତ୍ରଣା ଅନୁଭବ କରିଥିଲେ। ମ୍ୟାଚ୍ ଲାଗି ସେ ଫିଟ୍ ନ ଥିବାରୁ କିଷନଙ୍କୁ ଦଳରେ ସାମିଲ କରାଯାଇଥିଲା। ସେ ଅତୀତରେ ଜଣେ ଓପନର ଭାବେ ଭଲ ଖେଳିଛନ୍ତି। ତେବେ ତାଙ୍କୁ ଓପନିଂ ପଠାଇବାର ନିଷ୍ପତ୍ତି ପୂରା ମ୍ୟାନେଜମେଣ୍ଟର ଥିଲା। ରୋହିତ ମ୍ୟାନେଜମେଣ୍ଟର ମଧ୍ୟ ଅଂଶ। ଆଲୋଚନା ବେଳେ ମଧ୍ୟ ସେ ଉପସ୍ଥିତ ଥିଲେ। ନିମ୍ନକ୍ରମରେ ରିଷଭ ପନ୍ତ ଓ ରବୀନ୍ଦ୍ର ଜାଡେଜାଙ୍କ ଭଳି ବାମହାତୀ ବ୍ୟାଟର ଥିବାରୁ ଇଶାନଙ୍କୁ ଉପରକୁ ପଠାଇବାକୁ ନିଷ୍ପତ୍ତି ହୋଇଥିଲା।
