ଢାକା,୪।୧୨: ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚରେ ବାଂଲାଦେଶ ଭାରତକୁ ୧ ଉଇକେଟ୍ରେ ପରାସ୍ତ କରିଛି। ଏହି ମ୍ୟାଚରେ ଟିମ ଇଣ୍ଡିଆର ବ୍ୟାଟିଂ ଖରାପ ଥିଲା। ପୁରା ଦଳ ୧୮୬ ରନ୍ରେ ଅଲଆଉଟ୍ ହୋଇଯାଇଥିଲା। କେଏଲ ରାହୁଲ ୭୩ ରନର ସର୍ବାଧିକ ଇନିଂସ ଖେଳିଥିଲେ। ଏଥିସହ ରୋହିତ ଶର୍ମା ୨୭ ରନ ସଂଗ୍ରହ କରିଥିଲେ। ଏହି ସ୍କୋର ସତ୍ତ୍ୱେ ରୋହିତ ଶର୍ମା ତାଙ୍କ ନାମରେ ଏକ ସ୍ବତନ୍ତ୍ର ରେକର୍ଡ ସୃଷ୍ଟି କରିଥିଲେ।
ଦିନିକିଆରେ ଭାରତ ପାଇଁ ସର୍ବାଧିକ ରନ ସଂଗ୍ରହ କରିଥିବା ରୋହିତ ଷଷ୍ଠ ବ୍ୟାଟ୍ସମ୍ୟାନ ହୋଇଛନ୍ତି। ସେ ପୂର୍ବତନ ଭେଟେରାନ ବ୍ୟାଟ୍ସମ୍ୟାନ ତଥା ଅଧିନାୟକ ମହମ୍ମଦ ଆଜାରୁଦ୍ଦିନଙ୍କୁ ଛାଡିଥିଲେ। ରୋହିତ ଦୁଇଟି ରନ ସ୍କୋର କରିବା ମାତ୍ରେ ଆଜାରୁଦ୍ଦିନଙ୍କୁ ଛାଡିଥିଲେ। ରୋହିତ ବର୍ତ୍ତମାନ ଦିନିକିଆରେ ୨୩୪ ମ୍ୟାଚରେ ୯୪୦୩ ରନ କରିଛନ୍ତି। ସେ ହାରାହାରି ୪୮.୪୬ ଏବଂ ଷ୍ଟ୍ରାଇକ ହାର ୮୯.୧୭ ରେ ଏହି ରନ ସ୍କୋର କରିଥିଲେ। ତାଙ୍କ ନାମରେ ୨୯ ଶତକ ଏବଂ ୪୫ ଅର୍ଦ୍ଧଶତକ ଅଛି। ଦିନିକିଆରେ ମଧ୍ୟ ରୋହିତଙ୍କର ତିନି ଦ୍ୱିଶତକ ରହିଛି। ଏହି ଫର୍ମାଟରେ ତାଙ୍କର ସର୍ବାଧିକ ୨୬୪ ରନର ଇନିଂସ ଖେଳିଥିଲେ।
ଆଜାରୁଦ୍ଦିନ ୩୩୪ ଟି ମ୍ୟାଚରେ ୯୩୭୮ ରନ ସଂଗ୍ରହ କରି ଦିନିକିଆରେ ହାରାହାରି ୩୬.୯୨ ରନ କରିଥିଲେ। ତାଙ୍କ ନାମରେ ସାତ ଶତକ ଏବଂ ୫୮ ଅର୍ଦ୍ଧ ଶତକ ଅଛି। ଏହି ଫର୍ମାଟରେ ଆଜାରୁଦ୍ଦିନଙ୍କ ସର୍ବାଧିକ ସ୍କୋର ୧୫୩। ଭାରତରୁ ଏହି ଫର୍ମାଟରେ ସର୍ବାଧିକ ରନ ସ୍କୋର କରିବାର ରେକର୍ଡ ପୂର୍ବତନ ମହାନ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ନାମରେ ରହିଛି। ୪୬୩ଟି ମ୍ୟାଚରେ ତେନ୍ଦୁଲକର ୧୮,୪୨୬ ରନ ସ୍କୋର କରିଥିଲେ। ତାଙ୍କ ନାମରେ ୪୯ ଶତକ ଏବଂ ୯୬ ଅର୍ଦ୍ଧ ଶତକ ଅଛି। ବିରାଟ କୋହଲି ୨୬୩ ମ୍ୟାଚରେ ହାରାହାରି ୫୭.୪୫ ଏବଂ ଷ୍ଟ୍ରାଇକ ହାର ୯୨.୮୦ରେ ୧୨,୩୫୩ ରନ ସଂଗ୍ରହ କରିଛନ୍ତି। ବିରାଟଙ୍କ ନାମରେ ୪୨ ଶତକ ଏବଂ ୬୪ ଅର୍ଦ୍ଧଶତକ ଅଛି।
