ନୂଆଦିଲ୍ଲୀ,୧୩।୧୧: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ରେ ଗୋଟିଏ ପଟେ ଅଧିନାୟକ ବିରାଟ କୋହଲିଙ୍କ ଦଳ ଆର୍ସିବି ଗୋଟିଏ ବି ଟାଇଟଲ ଜିତିବାରେ ବିଫଳ ହୋଇଥିବା ବେଳେ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ଟିମ୍ ୫ଥର ବିଜେତା ପାଲଟିଛି। ଚଳିତ ଥର ଆଇପିଏଲ୍ରେ ମଧ୍ୟ ଦଳ ଭଲ ପ୍ରଦର୍ଶନ କରିଛି। ଫଳରେ ରୋହିତଙ୍କ ଅଧିନାୟକକୁ ନେଇ ଭୁରି ପ୍ରଶଂସା କରାଯାଉଛି। ଏହି କ୍ରମରେ ପୂର୍ବ ଭାରତୀୟ ଅଲରାଉଣ୍ଡର ଇରଫାନ ପଠାନ ରୋହିତଙ୍କୁ ମହେନ୍ଦ୍ର ସିଂହ ଧୋନୀ ଏବଂ ସୌରଭ ଗାଙ୍ଗୁଲୀଙ୍କ ମିଶ୍ରଣ ବୋଲି କହିଛନ୍ତି।
ଫାଇନାଲରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ପଡ଼ିଆକୁ ଓହ୍ଲାଇଥିଲା ମୁମ୍ବାଇ ଇଣ୍ଡିଆନ୍ସ ଦଳ। ଖେଳାଳିମାନଙ୍କ ମଧ୍ୟରେ ପରିବର୍ତ୍ତନ ସ୍ବରୂପ ରୋହିତ ଜୟନ୍ତ ଯାଦବକୁ ସାମିଲ କରିଥିଲେ। ଏହା ପ୍ରଶଂସନୀୟ ଥିଲା ବୋଲି ଇରଫାନ କହିଛନ୍ତି। ରୋହିତଙ୍କ ସ୍ଥାନରେ ଅନ୍ୟ କେହି ଅଧିନାୟକ ଥିଲେ ଦ୍ରୁତ ବୋଲରଙ୍କୁ ଖେଳାଇବା ପସନ୍ଦ କରିଥାନ୍ତେ। ହେଲେ ସେ ତାହା କରି ନ ଥିଲେ। ଏଥିରୁ ସେ ବୋଲରମାନଙ୍କ ଚିନ୍ତାଧାରାକୁ କେତେ ବୁଝନ୍ତି ତାହା ସ୍ପଷ୍ଟ ହୋଇଛି। କହିବାକୁ ଗଲେ ରୋହିତଙ୍କ ଅଧିନାୟକତ୍ୱ ଧୋନୀ ଏବଂ ଗାଙ୍ଗୁଲିଙ୍କ ମିଶ୍ରଣ ଅଟେ। ଗାଙ୍ଗୁଲି ଦଳର ବୋଲରମାନଙ୍କ ଉପରେ ଭରସା କରି ଆଗକୁ ବଢ଼ୁଥିଲେ। ଧୋନୀ ମଧ୍ୟ ତାହା କରୁଥିଲେ। ମାତ୍ର ସେ ନିଜ ନିଷ୍ପତ୍ତି ଚିନ୍ତାଧାରା ଉପରେ ଧାର୍ଯ୍ୟ କରି ନେଉଥିଲେ। ଅନେକ ପୂର୍ବ ଅଧିନାୟକଙ୍କୁ ରୋହିତଙ୍କ କାମ ପସନ୍ଦ ଆସୁଛି ବୋଲି ପଠାନ କହିଛନ୍ତି।
