ନୂଆଦିଲ୍ଲୀ,୯।୯: ଗତ ଦୁଇ ଦଶନ୍ଧି ଧରି କ୍ରିକେଟର ସବୁଠୁ ଲୋକପ୍ରିୟ ଫର୍ମାଟ ହେଉଛି ଟି-୨୦। ପ୍ରାୟ ପ୍ରତି ମାସରେ ବିଶ୍ୱର କୌଣସି ନା କୌଣସି ଦେଶରେ ଟି-୨୦ ଲିଗ ଖେଳାଯାଉଛି। ତେବେ ଟି-୨୦ ଅନ୍ତର୍ଜାତୀୟ କ୍ରିକେଟରେ ଭାରତ ପାଇଁ ସବୁଠୁ ଦ୍ରୁତ ଶତକର ରେକର୍ଡ ବୈଭବ ସୂର୍ଯ୍ୟବଂଶୀ କିମ୍ବା ଅଭିଷେକ ଶର୍ମାଙ୍କ ନାଁରେ ନୁହେଁ। ଏହି ରେକର୍ଡ ଏବେ ବି ରୋହିତ ଶର୍ମାଙ୍କ ନାଁରେ ରହିଛି।
ଭାରତ ପାଇଁ ଟି-୨୦ରେ ସବୁଠୁ ଦ୍ରୁତ ଶତକ ହାସଲ କରିବାର ରେକର୍ଡ ଗତ ୯ ବର୍ଷ ଧରି ରୋହିତ ଶର୍ମାଙ୍କ ନାଁରେ ରହିଛି। ୨୦୧୭ରେ ଶ୍ରୀଲଙ୍କା ବିପକ୍ଷ ମ୍ୟାଚରେ ରୋହିତ ମାତ୍ର ୩୫ ବଲରେ ଶତକ ପୂରଣ କରିଥିଲେ। ସେହି ମ୍ୟାଚରେ ରୋହିତ ୪୩ ବଲରେ ୧୧୮ ରନର ବିସ୍ଫୋରକ ଇନିଂସ ଖେଳିଥିଲେ। ତାଙ୍କ ଇନିଂସରେ ଥିଲା ୧୨ଟି ଚୌକା ଓ ୧୦ଟି ଛକା। ରୋହିତ ଓ କେଏଲ ରାହୁଲ ପ୍ରଥମ ଉଇକେଟ୍ ପାଇଁ ମାତ୍ର ୧୨.୪ ଓଭରରେ ୧୬୫ ରନ୍ର ଐତିହାସିକ ଭାଗିଦାରୀ କରିଥିଲେ।
ଫୁଲ-ମେମ୍ବର ଦେଶଗୁଡ଼ିକର ଟି-୨୦ ଅନ୍ତର୍ଜାତୀୟ ରେକର୍ଡକୁ ଦେଖିଲେ ରୋହିତଙ୍କ ଏହି ଶତକ ବିଶ୍ୱର ତୃତୀୟ ଦ୍ରୁତତମ ଶତକ। ତାଙ୍କଠାରୁ ଦ୍ରୁତ ଶତକ ସିକନ୍ଦର ରଜା ଓ ଫିନ ଆଲେନ ୩୩ ବଲରେ ହାସଲ କରିଛନ୍ତି।
ଗତ ୯ ବର୍ଷରେ ରୋହିତଙ୍କ ରେକର୍ଡ ଭାଙ୍ଗିବାର ସବୁଠୁ ନିକଟତମ ପହଞ୍ଚିଥିବା ଭାରତୀୟ ବ୍ୟାଟର୍ ହେଉଛନ୍ତି ଅଭିଷେକ ଶର୍ମା। ୨୦୨୫ରେ ଇଂଲଣ୍ଡ ବିପକ୍ଷରେ ଅଭିଷେକ ମାତ୍ର ୩୭ ବଲ୍ରେ ଶତକ ପୂରଣ କରିଥିଲେ। ସେହି ମ୍ୟାଚରେ ଅଭିଷେକ ୫୪ ବଲରେ ୧୩୫ ରନର ବିସ୍ଫୋରକ ପାଳି ଖେଳିଥିଲେ। ତାଙ୍କ ଇନିଂସରେ ୭ଟି ଚୌକା ଓ ୧୩ଟି ଛକା ଥିଲା। ଟି-୨୦ ଅନ୍ତର୍ଜାତୀୟରେ ଭାରତ ପାଇଁ ଏହା ଏପର୍ଯ୍ୟନ୍ତ ସର୍ବାଧିକ ବ୍ୟକ୍ତିଗତ ସ୍କୋର।
ଭାରତ ପାଇଁ ସବୁଠୁ ଦ୍ରୁତ ଟି-୨୦ ଶତକ
୩୫ ବଲ ରୋହିତ ଶର୍ମା
୩୭ ବଲ ଅଭିଷେକ ଶର୍ମା
୪୦ ବଲ ସଞ୍ଜୁ ସାମସନ
୪୧ ବଲ ତିଳକ ବର୍ମା
୪୨ ବଲ ଈଶାନ କିଶନ