ମେଲବୋର୍ନ,୩।୧: ହୋଟେଲରେ ନଖାଇ ରେଷ୍ଟୁରାଣ୍ଟରେ ଖାଇ ଅଡୁଆରେ ଫସିଛନ୍ତି ୫ ଭାରତୀୟ ଖେଳାଳି। ସେମାନେ ବାୟୋ ସିକ୍ୟୁରିଟି ନିୟମର ଉଲ୍ଲଂଘନ କରିଛନ୍ତି କି ନାହିଁ ତାର ତଦନ୍ତ କରାଯାଉଥିବା ବେଳେ ଖେଳାଳିମାନଙ୍କୁ ଅଲଗା ଏକାନ୍ତବାସରେ ରଖାଯାଇଛି। ଘଟଣାକୁ ନେଇ ବିଶେଷଭାବେ ଉପଅଧିନାୟକ ରୋହିତ ଶର୍ମାଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି। ଖାଇବା ବିଲ୍ର ଏକ ଫଟୋ ଯୋଗୁ ରୋହିତଙ୍କ ସହ ଅନ୍ୟମାନଙ୍କୁ ମଧ୍ୟ ସମାଲୋଚନା କରାଯାଉଛି। କାରଣ ବିଲ୍ରେ ବିଫ୍(ଗୋମାଂସ) ଥିବା ଦେଖାଯାଇଛି। ଏଣୁ ଖେଳାଳିମାନେ ଏହା ସେବନ କରିଥିବା ଲୋକେ କହୁଛନ୍ତି। ଘଟଣାଟି କେତେ ସତ କେତେ ମିଛ ତାହା ଜଣାପଡ଼ି ନ ଥିଲେ ହେଁ ଏହା ନିଆଁରେ ଘିଅ ଢ଼ାଳିବା ପରି କାମ କରୁଛି। ଅପରପକ୍ଷେ ରୋହିତଙ୍କ ପ୍ରଶଂସକ ତାଙ୍କ ସମର୍ଥନରେ ବାହାରିଛନ୍ତି। ରବିବାର‘ଆଇ ଷ୍ଟାଣ୍ଡ ଉଇଥ୍ ରୋହିତ’ ହାସଟ୍ୟାଗ୍ ଟୁଇଟରରେ ଟ୍ରେଣ୍ଡ କରୁଛି।
ନୂଆବର୍ଷ ଅବସରରେ ରୋହିତଙ୍କ ସହ ଋଷଭ ପନ୍ଥ, ଶୁଭମନ ଗିଲ, ନବଦୀପ ସାଇନି ଓ ପୃଥ୍ବୀ ଶ ରେଷ୍ଟୁରାଣ୍ଟକୁ ଖାଇବାକୁ ଯାଇଥିଲେ। ଏକାଠି ଡିନର କରୁଥିବା ବେଳେ ଜଣେ ଭାରତୀୟ ଫ୍ୟାନ୍ ସେମାନଙ୍କର ବିଲ୍ ଦେଇଥିଲେ। ଏଥିସହ ପନ୍ଥଙ୍କୁ କୁଣ୍ଡାଇ ପକାଇଥିଲେ। ଏହାର ଭିଡିଓ ଓ ଫଟୋକୁ ସେ ନିଜର ସୋସିଆଲ ପୃଷ୍ଠାରେ ଶେୟାର କରିଥିଲେ। ଭିଡିଓ ଭାଇରାଲ ପରେ ତାର ଯାଞ୍ଚ କରାଯାଉଛି। ଯାଞ୍ଚ ରିପୋର୍ଟ ଆସିବା ପର୍ଯ୍ୟନ୍ତ ୫ଜଣଙ୍କୁ ଅନ୍ୟ ଖେଳାଳିମାନଙ୍କଠାରୁ ଅଲଗା ରଖାଯାଇଛି।
ତେବେ ବିଲ୍ର ଫଟୋରେ ଗୋମାଂସର ଏକ ଖାଇବା ଥିବା ନେଇ ଦାବି କରାଯାଉଛି। ହୋଲି ଓ ଦୀପାବଳିରେ ପଶୁପକ୍ଷୀଙ୍କ ସୁରକ୍ଷା ପାଇଁ କଥା କହୁଥିବା ରୋହିତ ଟିମ୍ ସହ ମିଶି ଏଭଳି ଭାବେ ଉତ୍ସବ ମନାଉଛନ୍ତି ବୋଲି ପ୍ରଶଂସକ ମତ ରଖୁଛନ୍ତି। ହେଲେ ରୋହିତଙ୍କ ପ୍ରଶଂସକ ସବୁ ପରିସ୍ଥିତିରେ ତାଙ୍କ ସହ ଛିଡ଼ା ହେବେ ବୋଲି କହୁଛନ୍ତି।
