ନୂଆଦିଲ୍ଲୀ,୧୦।୩: ଚାମ୍ପୟନ୍ସ ଟ୍ରଫି ୨୦୨୫ ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ ଅନୁମାନ କରାଯାଉଥିଲା କି ଟୁର୍ନାମେଣ୍ଟ ଶେଷ ହେବା ପରେ ରୋହିତ ଶର୍ମା ଅବସର ନେଇପାରନ୍ତି। ଫାଇନାଲ ମ୍ୟାଚ ଯେତେ ପାଖେଇ ଆସୁଥିଲା, ରୋହିତଙ୍କ ଅବସର ଗୁଜବ ପୁଣିଥରେ ଜୋର ଧରିବା ଆରମ୍ଭ କରିଥିଲା। ୨୦୨୫ ଚାମ୍ପିୟନ୍ସ ଟ୍ରଫିରେ ଭାରତର ଐତିହାସିକ ସଫଳତା ପରେ ଏବେ ଅଧିନାୟକ ରୋହିତ ନିଜେ ତାଙ୍କ ଅବସର ନେଇ ଏକ ବିବୃତ୍ତି ଜାରି କରିଛନ୍ତି। ରୋହିତ ସ୍ପଷ୍ଟ କରିଛନ୍ତି ଯେ ତାଙ୍କର ଏବେ ଅବସର ନେବାର କୌଣସି ଯୋଜନା ନାହିଁ।
ଭାରତର ଚାମ୍ପିୟନ୍ସ ଟ୍ରଫି ବିଜୟ ପରେ ରୋହିତ ଶର୍ମାଙ୍କୁ ଖବରଦାତା ସମ୍ମିଳନୀରେ ଅବସର ସମ୍ପର୍କରେ ଏକ ପ୍ରଶ୍ନ ପଚରାଯାଇଥିଲା। ତାଙ୍କ ଅବସର ସମ୍ପର୍କରେ ପରିସ୍ଥିତି ସ୍ପଷ୍ଟ କରି ସେ କହିଛନ୍ତି, ଭବିଷ୍ୟତ ପାଇଁ କୌଣସି ଯୋଜନା ନାହିଁ। ଯାହା ଘଟୁଛି ତାହା ଜାରି ରହିବ। ମୁଁ ODI ଫର୍ମାଟରୁ ଅବସର ନେଉନାହିଁ। ଏବେଠାରୁ, ଦୟାକରି ଗୁଜବକୁ ଗୁରୁତ୍ୱ ଦିଅନ୍ତୁ ନାହିଁ। ଫାଇନାଲରେ ନ୍ୟୁଜିଲାଣ୍ଡ ବିପକ୍ଷରେ ଭାରତର ୪ ଉଇକେଟ୍ ବିଜୟ ପରେ ରୋହିତଙ୍କ ଏହି ବୟାନ ଆସିଛି, ଯେଉଁଥିରେ ସେ ୭୬ ରନର ଏକ ଶକ୍ତିଶାଳୀ ଇନିଂସ ଖେଳିଥିଲେ।
ଅଧିନାୟକ ରୋହିତ ଶର୍ମା ଚାମ୍ପିୟନ୍ସ ଟ୍ରଫିର ବିଜୟକୁ ସମଗ୍ର ଦେଶକୁ ଉତ୍ସର୍ଗ କରିଛନ୍ତି। ସେ କକହିଛନ୍ତି, ଯେତେବେଳେ ଟିମ ଇଣ୍ଡିଆ ଖେଳୁଛି, ସମଗ୍ର ଦେଶ ଏହାକୁ ସମର୍ଥନ କରୁଛି। ରୋହିତ ଶର୍ମା ଶ୍ରେୟସ ଆୟରଙ୍କୁ ଜଣେ ନୀରବ ନାୟକ ବୋଲି କହିଛନ୍ତି।
ଆୟରଙ୍କୁ ପ୍ରଶଂସା କରି ରୋହିତ କହିଛନ୍ତି, ଶ୍ରେୟସ ଆୟର ଆମର ନୀରବ ନାୟକ। ମଧ୍ୟକ୍ରମରେ ଆସି, ଆୟର ଦଳ ପାଇଁ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଆଜି ମଧ୍ୟ ସେ ଅକ୍ଷର ପଟେଲଙ୍କ ସହ ଏକ ଗୁରୁତ୍ୱପୂର୍ଣ୍ଣ ଭାଗୀଦାରୀ କରିଥିଲେ। ମୋତେ ମୋ ସାଥୀ ଖେଳାଳିମାନଙ୍କୁ ଅଧିକ କହିବାର ଆବଶ୍ୟକତା ନାହିଁ। ଶ୍ରେୟସ ଆୟର ୪୮ ରନ କରିଥିଲେ ଏବଂ ରୋହିତ ଶର୍ମା ଆଉଟ ହେବା ପରେ, ସେ ଅକ୍ଷର ପଟେଲଙ୍କ ସହ ମିଶି ୬୧ ରନର ଭାଗୀଦାରି କରିଥିଲେ ଯାହା ଭାରତକୁ ଚାପ ପରିସ୍ଥିତିରୁ ମୁକୁଳିବାରେ ସାହାଯ୍ୟ କରିଥିଲା।
