ମେଲବୋର୍ନ,୭।୧୧: ଅଷ୍ଟ୍ରେଲିଆରେ ଚାଲିଥିବା ଟି-୨୦ ବିଶ୍ୱକପ୍ର ସେମିଫାଇନାଲରେ ଭାରତୀୟ ଦଳ ପହଞ୍ଚିଛି। ଏବେ ନକଆଉଟ ମ୍ୟାଚରେ ଭାରତ ଇଂଲଣ୍ଡକୁ ଭେଟିବ। ଯଦିଓ ଟିମ ଇଣ୍ଡିଆ ସେମିଫାଇନାଲରେ ପହଞ୍ଚିଛି, କିନ୍ତୁ ଅଧିନାୟକ ରୋହିତ ଶର୍ମାଙ୍କ ଫର୍ମ ଏହି ଟୁର୍ନାମେଣ୍ଟକୁ ଚିନ୍ତାର ବିଷୟ ପାଲଟିଛି। ସେ ଏପର୍ଯ୍ୟନ୍ତ ପାଞ୍ଚଟି ମ୍ୟାଚରେ ମାତ୍ର ଗୋଟିଏ ଅର୍ଦ୍ଧଶତକ ହାସଲ କରିଛନ୍ତି। ତେବେ ଜିମ୍ବାୱେ ବିପକ୍ଷରେ ବିଜୟ ହାସଲ ପରେ ରୋହିତ ଏକ ରେକର୍ଡ ହାସଲ କରିଛନ୍ତି।
ଏକ କ୍ୟାଲେଣ୍ଡର ବର୍ଷରେ ଅଧିନାୟକ ଭାବରେ ରୋହିତ ସର୍ବାଧିକ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଜିତିଥିବା ଖେଳାଳି ହୋଇଛନ୍ତି। ରୋହିତ ଚଳିତ ବର୍ଷ ୨୮ଟି ମ୍ୟାଚରେ ଟିମ ଇଣ୍ଡିଆର ଅଧିନାୟକତ୍ୱ କରିଛନ୍ତି ଏବଂ ଦଳ ୨୧ଟି ଜିତିଛି। ରୋହିତଙ୍କ ଅଧିନାୟକତ୍ୱରେ ଭାରତୀୟ ଦଳ ଚଳିତ ବର୍ଷ ୭ଟି ମ୍ୟାଚ ହାରିଛି। ଏହି ପରିପ୍ରେକ୍ଷୀରେ ରୋହିତ ପାକିସ୍ତାନ ଅଧିନାୟକ ବାବର ଆଜାମଙ୍କୁ ପଛରେ ପକାଇଛନ୍ତି। ଗତ ବର୍ଷ ୨୯ଟି ମ୍ୟାଚରେ ବାବର ଅଧିନାୟକ ଭାବେ ପାକିସ୍ତାନ ଦଳକୁ ୨୦ଟି ମ୍ୟାଚ ଜିତାଥିଲେ। ପାକିସ୍ତାନ ୬ଟି ମ୍ୟାଚ ହାରିଥିଲା ଏବଂ ତିନୋଟି ମ୍ୟାଚର ଫଳାଫଳ ଶୂନ ଥିଲା।
ରୋହିତ ଗତ ଏକ ବର୍ଷ ମଧ୍ୟରେ ଭାରତକୁ ଟି-୨୦ର ଶୀର୍ଷକୁ ନେଇଥିଲେ। ଟିମ ଇଣ୍ଡିଆ ବର୍ତ୍ତମାନ ଟି-୨୦ ର଼୍ୟାଙ୍କିଙ୍ଗରେ ଏକ ନମ୍ବର ଦଳ। ତାଙ୍କ ଅଧିନାୟକତ୍ୱରେ ଭାରତ ଚଳିତ ବର୍ଷ ଦେଶ ତଥା ବିଦେଶରେ ସମସ୍ତ ଦ୍ୱିପାକ୍ଷିକ ଟି-୨୦ ସିରିଜ ଜିତିଛି। ତେବେ ତାଙ୍କୁ କିଛି ଟି-୨୦ ସିରିଜରେ ମଧ୍ୟ ବିଶ୍ରାମ ଦିଆଯାଇଥିଲା। ୨୦୨୨ରେ ଭାରତ ମୋଟ ୩୭ ଟି-୨୦ ମ୍ୟାଚ ଖେଳିଥିଲା, ଯାହା କୌଣସି ଦଳ ଦ୍ୱାରା ସର୍ବାଧିକ। ଟିମ ଇଣ୍ଡିଆ ଏଥିମଧ୍ୟରୁ ୨୭ଟି ମ୍ୟାଚ ଜିତିଛି। ଟିମ ଇଣ୍ଡିଆକୁ ନଅଟି ମ୍ୟାଚ୍ରେ ପରାଜୟର ସମ୍ମୁଖୀନ ହେବାକୁ ପଡୁଥିବାବେଳେ ଗୋଟିଏ ମ୍ୟାଚର ଫଳାଫଳ ଶୂନ ଥିଲା। ୩୭ଟି ମ୍ୟାଚ ମଧ୍ୟରୁ ୨୮ରେ ରୋହିତ ଶର୍ମା ଅଧିନାୟକ ଥିଲେ। ଏଥି ସହିତ ଚଳିତ ବର୍ଷ ହାର୍ଦ୍ଦିକ ପାଣ୍ଡ୍ୟା, ରିଷଭ ପନ୍ତ ମଧ୍ୟ ଟି-୨୦ରେ ଟିମ ଇଣ୍ଡିଆର ଦାୟିତ୍ୱ ଗ୍ରହଣ କରିଛନ୍ତି।
