ଧାମନଗର,୨୭।୭( ସନ୍ତୋଷ କୁମାର ମହାପାତ୍ର): ଧାମନଗର ବ୍ଲକ ଭଗବାନପୁର ପଞ୍ଚାୟତ ସ୍ଥିତ ବାଇଦିପୁର ଗ୍ରାମ ( ୱାର୍ଡ ନଂ ୩) ମୁଖ୍ୟ ରାସ୍ତା ଦୀର୍ଘ ବର୍ଷ ହେବ ମରାମତି ହୋଇ ନାହିଁ । ଏନେଇ ପଞ୍ଚାୟତ ଠାରୁ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ବାରମ୍ବାର ଅଭିଯୋଗ କରିଥିଲେ କୌଣଷି କାର୍ଯ୍ୟାନୁଷ୍ଠାନ ନିଆଯାଉ ନାହିଁ ବୋଲି ଗ୍ରାମବାସୀ କହିଛନ୍ତି।
ସୂଚନା ମୁତାବକ ଭଗବାନପୁର ପଞ୍ଚାୟତର ବାଇଦିପୁର ଗ୍ରାମ (ୱାର୍ଡ ନଂ ୩ ) ପ୍ରାୟ ଶହେରୁ ଉର୍ଦ୍ଧ୍ବ ପରିବାର ଲୋକେ ବସବାସ କରୁଥିବା ବେଳେ ଭୋଟର ସଂଖ୍ୟା ୪ ଶହରୁ ଅଧିକ ରହିଛି । ଗ୍ରାମ୍ୟ ଉନ୍ନୟନ ବିଭାଗ ମୁଖ୍ୟ ରାସ୍ତା ଠାରୁ ବାଇଦିପୁର ଗ୍ରାମ ପର୍ଯ୍ୟନ୍ତ
ପ୍ରାୟ ୬ ଶହ ମିଟର ଦୂରତା କଚା ମାଟି ରାସ୍ତାଟି ଗ୍ରାମ ପଞ୍ଚାୟତ ଅଧିନରେ ରହିଛି । ଦୀର୍ଘ ୧୫ ବର୍ଷ ପୂର୍ବରୁ ପଞ୍ଚାୟତା ପକ୍ଷରୁ ଏହି ରାସ୍ତାରେ ନାଲି ମାଟି ଓ ମେଟାଲ ପକାଇ ମରାମତି ହୋଇଥିଲା । ସମୟାନୁକ୍ରମେ ରାସ୍ତାକୁ ରକ୍ଷଣ ବେକ୍ଷଣ ଅଭାବରୁ ଏବେ ସମ୍ପୂର୍ଣ ନଷ୍ଟ ହୋଇ ଅତ୍ୟନ୍ତ ଜରାଜୀର୍ଣ୍ଣ ଅବସ୍ଥାରେ ପରିଣତ ହୋଇଯାଇଛି।
ଗ୍ରାମବାସୀଙ୍କ କହିବା କଥା ରାସ୍ତା ମରାମତି ନେଇ ବାରମ୍ବାର ପଞ୍ଚାୟତ ସରପଞ୍ଚଙ୍କ ସମେତ ବ୍ଲକ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉନାହିଁ। ଏବେ ବର୍ଷା ଦିନ ଥିବାରୁ ରାସ୍ତାଟି ଖାଲ ଢିପ ସାଙ୍ଗକୁ କାଦୁଅରେ ଦୈନିକ ଯାତାୟାତ କରୁଥିବା ବିଦ୍ୟାଳୟ ଛାତ୍ରୀଛାତ୍ର ନାନାଦି ସମସ୍ୟା ଭୋଗୁଛନ୍ତି । ଏପରିକି ନିକଟରେ ଥିବା ଅଙ୍ଗନୱାଡ଼ି କେନ୍ଦ୍ରକୁ ମଧ୍ୟ କୁନି କୁନି ପିଲା ଯାଇ ପାରୁନାହାନ୍ତି। ଆମ୍ବୁଲାନ୍ସ କିମ୍ବା ଅଗ୍ନିଶମ ବିଭାଗ ଗାଡ଼ି ଆସିବାରେ ସମସ୍ୟା ଦେଖାଦେଉଛି । ଏହି କିଛି ଦିନ ପୂର୍ବରୁ ଦୁଇ ଜଣ ଗ୍ରାମ ଲୋକେ ବାଇକରେ ଆସୁଥିବା ସମୟରେ ଏହି ରାସ୍ତାରେ ପଡ଼ି ଦୁର୍ଘଟଣା ହୋଇଥିଲା।
ରାଜ୍ୟ ସରକାରଙ୍କ ବିକଶିତ ଯୋଜନା ମାଧ୍ୟମରେ ବିଭିନ୍ନ ଉନ୍ନତି ମୂଳକ କାର୍ଯ୍ୟ ନେଇ ଗ୍ରାମ ପଞ୍ଚାୟତ ସ୍ତରରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ସରପଞ୍ଚ ପଞ୍ଚାୟତର ଅନ୍ୟାନ୍ୟ ଗ୍ରାମ ରାସ୍ତାକୁ ମରାମତି କରୁଥିବା ବେଳେ ଗ୍ରାମର ମୁଖ୍ୟ ରାସ୍ତାକୁ ମରାମତି ନକରିବା ତାଙ୍କର କାର୍ଯ୍ୟଦକ୍ଷତା ପ୍ରତି ନା ଅନ୍ୟ କୌଣସି ମନ୍ଦ ଉଦ୍ଦେଶ୍ୟ ଥାଇପାରେ ବୋଲି ଗ୍ରାମବାସୀ କହିଛନ୍ତି । ସେହିପରି ବିକଶିତ ଗାଁ ବିକଶିତ ଓଡ଼ିଶା ଯୋଜନାରେ ଆର୍ଥିକ ବର୍ଷ ୨୦୨୪-୨୫ ଏବଂ ୨୦୨୫-୨୬ପଞ୍ଚାୟତ ସ୍ତରର ପ୍ରକଳ୍ପ କୁ ମନମୁଖୀ ଏବଂ ଏକ ତରଫା ଭାବେ ଦିଆଯାଇ କାର୍ଯ୍ୟକାରୀ କରାଯାଉଛି ବୋଲି ସାଧାରଣରେ ଅଭିଯୋଗ ହେଉଛି। ଫଳରେ ପଞ୍ଚାୟତ ବିଭିନ୍ନ ୱାର୍ଡ ନାନାଦି ସମସ୍ୟା ଥିବା ବେଳେ ଲକ୍ଷାଧିକ ବିଭିନ୍ନ ଉନ୍ନତିମୂଳକ ପ୍ରକଳ୍ପ କାର୍ଯ୍ୟ ର ସରକାରୀ ସ୍ତରରେ ଅନୁମୋଦନ ହୋଇଥିଲେ ବି ଅଦ୍ୟାବଧି କାର୍ଯ୍ୟ ନହୋଇ ଫାଇଲ ତଳେ ପଡ଼ିଛି ବୋଲି ସ୍ଥାନୀୟ ଲୋକେ ଆଲୋଚନା କହିଛନ୍ତି।
ତୁରନ୍ତ ରାସ୍ତା ମରା ମତି ନହେଲେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବେ ବୋଲି ଘନଶ୍ୟାମ ସ୍ବାଇଁ, ବାଇଧର ପ୍ରଧାନ, କୃପାସିନ୍ଧୁ ସାମଲ, ଦେବେନ୍ଦ୍ର ସ୍ବାଇଁ, ଗୋବର୍ଦ୍ଧନ ପ୍ରଧାନ, ମାମିନା ପ୍ରଧାନ, ବିରଞ୍ଚି ନାରାୟଣ ସ୍ବାଇଁ, ଶସ୍ମିତା ପ୍ରଧାନ, ମମତା ସ୍ବାଇଁ, ଭାରତୀ ସ୍ବାଇଁ, ଦ୍ରୌପଦୀ ସ୍ବାଇଁ ପ୍ରମୁଖ ଶତାଧିକ ଗ୍ରାମବାସୀ ଉପସ୍ଥିତ କହିଛନ୍ତି। ଏ ସମ୍ପର୍କରେ ପଞ୍ଚାୟତ ସରପଞ୍ଚଙ୍କ ପ୍ରତିନିଧି କପିଳେନ୍ଦ୍ର ବଳ କହିଛନ୍ତି ରାସ୍ତା ସମସ୍ୟା ନେଇ ଦେଖୁଛି କଣ କରାଯିବ ।
