ଭୁବନେଶ୍ୱର(ବ୍ୟୁରୋ)/ପୁରୁଣା ଭୁବନେଶ୍ୱର,୧ା୧୧(ଡି.ଏନ୍.ଏ.): ଆସନ୍ତା ମହାଶିବରାତ୍ରି ପୂର୍ବରୁ ଲିଙ୍ଗରାଜ ମନ୍ଦିରକୁ ସଂଯୋଗ କରୁଥିବା ସମସ୍ତ ରାସ୍ତାର ପ୍ରଶସ୍ତୀକରଣ କାର୍ଯ୍ୟ ଶେଷ ହେବ। ଏଥିସହିତ ଭକ୍ତମାନଙ୍କ ଯିବା ଆସିବା ସହଜ କରିବାକୁ ବିକଳ୍ପ ରାସ୍ତା ନିର୍ମାଣ କାର୍ଯ୍ୟ ଶେଷ କରିବାକୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ଭି.କେ. ପାଣ୍ଡିଆନ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ମହାଶିବରାତ୍ରିରେ ମହାଦୀପ ଦର୍ଶନ କରିବାକୁ ବହୁ ସଂଖ୍ୟାରେ ଭିଡ଼ ପରିଲକ୍ଷିତ ହେବ। ତେଣୁ ଏହା ପୂର୍ବରୁ ଏକାମ୍ର କ୍ଷେତ୍ରର ଗୁରୁତ୍ୱପୂର୍ଣ୍ଣ କାର୍ଯ୍ୟ ଶେଷ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହି କ୍ରମରେ ଶନିବାର ଭୋର ସମୟରେ ୫-ଟି ସଚିବ ଏକାମ୍ର ପ୍ରକଳ୍ପ ବୁଲି ଦେଖିବା ସହ କାର୍ଯ୍ୟ ଅଗ୍ରଗତିର ସମୀକ୍ଷା କରିଛନ୍ତି। ନଭେମ୍ବର ଶେଷ ସୁଦ୍ଧା ଜମି ଅଧିଗ୍ରହଣ ଶେଷ କରିବା ସହ କାର୍ଯ୍ୟ ତ୍ୱରାନ୍ବିତ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ପ୍ରକଳ୍ପ ପାଇଁ ୮୦ ପ୍ରତିଶତ ଜମି ଅଧିଗ୍ରହଣ କାର୍ଯ୍ୟ ଶେଷ ହୋଇଛି। କୋଭିଡ୍ ପରିସ୍ଥିତି ମଧ୍ୟରେ ପ୍ରକଳ୍ପ କାର୍ଯ୍ୟ ଯୁଦ୍ଧକାଳୀନଭିତ୍ତିରେ ଚାଲିଥିବାରୁ ସେ ଅଧିକାରୀମାନଙ୍କୁ ପ୍ରଶଂସା କରିଥିଲେ। ଏହି ସମୀକ୍ଷା ବେଳେ ପୂର୍ତ୍ତ ବିଭାଗ ସଚିବ କିଷନ କୁମାର ଏବଂ ବିଏମ୍ସି କମିଶନର ପ୍ରେମ୍ଚନ୍ଦ୍ର ଚୌଧାରୀ ଉପସ୍ଥିତ ଥିଲେ।
ବିନ୍ଦୁସାଗରକୁ ଯିବା ଲାଗି ନୂଆ ରାସ୍ତା ପଥଚାରୀମାନଙ୍କୁ ସହାୟତା କରିବ। ମନ୍ଦିରକୁ ଯିବା ଲାଗି ଇ-ଯାନବାହନର ବ୍ୟବହାର କରାଯିବ। ଯଦ୍ଦ୍ବାରା ସମ୍ପୃକ୍ତ ଅଞ୍ଚଳରେ ଯାନବାହନଜନିତ ଧୂଆଁ ଠାରୁ ମନ୍ଦିରକୁ ସୁରକ୍ଷିତ ରଖାଯାଇ ପାରିବ। ଏପରି କି ଯାତ୍ରୀ ଏବଂ କୀର୍ତ୍ତିରାଜିକୁ ପ୍ରଦୂଷଣ ଓ ଧୂଆଁରୁ ରକ୍ଷା କରାଯାଇ ପାରିବ। ନୂଆ ରାସ୍ତା ଲିଙ୍ଗରାଜ ହାଟରୁ ତାଳେଶ୍ୱର ଛକ ଏବଂ ଲିଙ୍ଗରାଜ ହାଟରୁ ବିନ୍ଦୁସାଗରକୁ ସଂଯୋଗ କରିବ। ମନ୍ଦିର ସମ୍ମୁଖ ଭାଗରେ ଇଷ୍ଟର୍ନ ପ୍ଲାଜା ଏବଂ ଉତ୍ତରରେ ଉତ୍ତର ପ୍ଲାଜାର ବିକାଶ କରାଯିବ। ଏଥିସହିତ ବଢ଼େଇବାଙ୍କ ବ୍ରଜବନ୍ଧୁ କଲ୍ୟାଣ ମଣ୍ଡପ ନିକଟରେ ବସ୍ ପାର୍କିଂ ପାଇଁ ବ୍ୟବସ୍ଥା କରାଯିବ। ମନ୍ଦିର ଚତୁଃପାର୍ଶ୍ୱରେ ଥିବା ଡ୍ରେନ୍ ବ୍ୟବସ୍ଥାର ମଧ୍ୟ ସମୀକ୍ଷା କରାଯାଇଥିଲା। ଗୋପାଳତୀର୍ଥ ମଠ ଏବଂ ଶଙ୍କରାନନ୍ଦ ମଠ ଜମି ଅଧିଗ୍ରହଣ କରାଯାଇଛି। ଅନ୍ୟାନ୍ୟ କୋଠା ଓ ଜମି ଅଧିଗ୍ରହଣ ପରେ ଭକ୍ତମାନେ ସେଠାରୁ ବିନ୍ଦୁସାଗରକୁ ଦେଖିପାରିବେ। ଖାଲିସ୍ଥାନ ଯୋଗୁ ମନ୍ଦିର ଓ ବିନ୍ଦୁସାଗରକୁ ଏକ ସଙ୍ଗେ ଭକ୍ତମାନେ ଦର୍ଶନ କରିବା ସହ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇପାରିବ। ମନ୍ଦିର ବେଢ଼ାକୁ ପରିବେଶ ଅନୁକୂଳ ବ୍ୟବସ୍ଥା ଅନୁଯାୟୀ ସଫା ରଖାଯିବ। ଏହି ସମୀକ୍ଷା ବୈଠକରେ ତୀର୍ଥଯାତ୍ରୀଙ୍କ ପାଇଁ ଥିବା ସୁବିଧା ସୁଯୋଗ ବିଷୟରେ ଆଲୋଚନା ହୋଇଥିଲା। ମହାଶିବରାତ୍ରି ପୂର୍ବରୁ ଲକ୍ଷ୍ୟଧାର୍ଯ୍ୟ କରାଯାଇଥିବା କାର୍ଯ୍ୟ ଶେଷ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।
