ନରେଶ ଚନ୍ଦ୍ର ପଟ୍ଟନାୟକ
କେନ୍ଦୁଝର,୩୧ା୧: ଏକଦା ବିପର୍ଯ୍ୟସ୍ତ ରାସ୍ତା ଘାଟ ଯୋଗୁ କେନ୍ଦୁଝର ଜିଲାରେ ଦୁର୍ଘଟଣା ଘଟି ବ୍ୟାପକ ଧନଜୀବନ ହାନି ହେଉଛି ବୋଲି କୁହାଯାଉଥିଲା। ଏବେ ପ୍ରଶାସନ ପକ୍ଷରୁ ରାସ୍ତାଘାଟର ବିକାଶ ଓ ଉନ୍ନତୀକରଣ କରାଯାଇଛି। ଏହା ସତ୍ତ୍ୱେ ଦୁର୍ଘଟଣା ରୋକାଯାଇ ପାରୁ ନାହିଁ। ବହୁ ସଂଖ୍ୟାରେ ଗାଡ଼ି ଚଳାଚଳ, ଦ୍ରୁତ ଗତିରେ ଗାଡ଼ିଚାଳନା, ତ୍ରୁଟିପୂଣ୍ଣର୍ର୍ ରାସ୍ତା ଓ ରାଜପଥ, ନିଶାସକ୍ତ ହୋଇ ଗାଡ଼ି ଚାଳନା ଆଦି ଦୁର୍ଘଟଣାର ମୁଖ୍ୟକାରଣ ବୋଲି କୁହାଯାଉଛି। ରିପୋର୍ଟକୁ ଦେଖିଲେ ଗତ ୪ବର୍ଷ ମଧ୍ୟରେ କୋଭିଡ୍ କଟକଣା ସତ୍ତ୍ୱେ ୧୩୬୯ ଜଣଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିବା ଚିନ୍ତାର କାରଣ ପାଲଟିଛି।
ପରିବହନ ବିଭାଗ ତଥ୍ୟ ଅନୁଯାୟୀ, ୨୦୨୧ ତୁଳନାରେ ୨୦୨୨ରେ ଅଧିକ ଦୁର୍ଘଟଣା ଘଟିଛି। କିନ୍ତୁ ମୃତ୍ୟୁ ସଂଖ୍ୟା ସମାନ ରହିଥିବାରୁ ପ୍ରଶାସନ କିଛିଟା ଆଶ୍ୱସ୍ତ ହୋଇଛି। ତେବେ ଆହତଙ୍କ ସଂଖ୍ୟା ମଧ୍ୟ ୨୦୨୨ରେ ଅଧିକ ହୋଇଥିବା ଜଣାପଡ଼ିଛି। ବିଶେଷ କରି ରାସ୍ତା ଉପରେ ବେଆଇନ ଗାଡ଼ି ପାର୍କିଂ ଯୋଗୁ ଅନେକ ସମୟରେ ଦୁର୍ଘଟଣା ଘଟୁଥିଲେ ହେଁ ସେସବୁ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ୨୦୨୨ରେ ୭୧୩ଟି ଦୁର୍ଘଟଣା ଘଟିଥିବା ବେଳେ ୩୪୧ଜଣଙ୍କ ପ୍ରାଣହାନି ହୋଇଛି ଓ ୫୪୯ଜଣ ଆହତ ହୋଇଛନ୍ତି। ୨୦୨୧ରେ ସମୁଦାୟ ୬୭୫ଟି ଦୁର୍ଘଟଣା ଘଟିଥିବା ବେଳେ ୩୪୧ ଜଣଙ୍କ ମୃତ୍ୟୁ ହୋଇଛି ଏବଂ ୫୦୯ ଜଣ ଆହତ ହୋଇଛନ୍ତି। ୨୦୨୦ରେ ୬୪୯ଟି ଦୁର୍ଘଟଣାରେ ୩୫୪ଜଣଙ୍କ ମୃତ୍ୟୁ ଘଟିଥିବା ବେଳେ ୪୩୫ଜଣ ଆହତ ହୋଇଛନ୍ତି। ସେହିପରି ୨୦୧୯ରେ ୬୭୪ଟି ଦୁର୍ଘଟଣା ଘଟିଥିବା ବେଳେ ୩୩୩ଜଣଙ୍କ ମୃତ୍ୟୁ ହୋଇଛି ଓ ୭୦୮ଜଣ ଆହତ ହୋଇଛନ୍ତି। ୨୦୨୨ ଜାନୁୟାରୀ, ମେ ଓ ନଭେମ୍ବର ମାସରେ ସର୍ବାଧିକ ୩୯ଜଣଙ୍କ ମୃତ୍ୟୁ ହୋଇଥିବା ବେଳେ ଏପ୍ରିଲରେ ସର୍ବନିମ୍ନ ୧୬ ଜଣଙ୍କ ମୃତ୍ୟୁ ହୋଇଥିବା ପରିବହନ ବିଭାଗ ସୂତ୍ରରୁ ଜଣାପଡ଼ିଛି। ଏନେଇ ଆର୍ଟିଓ ଗୋପାଳକୃଷ୍ଣ ଦାସଙ୍କୁ ପଚାରିବାରୁ ଗତବର୍ଷ ଅପେକ୍ଷା ଦୁର୍ଘଟଣା ବଢ଼ିଥିଲେ ହେଁ ମୃତ୍ୟୁ ସଂଖ୍ୟା ବଢ଼ିିନାହିଁ। ଲୋକଙ୍କୁ ସଚେତନ କରିବା ସହ ମଦ୍ୟପାନ କରି ଗାଡ଼ି ଚଳାଇବା, ଦ୍ରୁତ ଗତିରେ ଗାଡ଼ି ଚଳାଚଳ, ଟ୍ରାଫିକ ନୀତିନିୟମ ଅବଜ୍ଞାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି କହିଛନ୍ତି। ତେବେ ତ୍ରୁଟିପୂର୍ଣ୍ଣ ରାସ୍ତା ଓ ଦୁର୍ଘଟଣା ସ୍ଥାନ ଚିହ୍ନଟ କରି ଠିକ୍ କରିବା ସହ ଦ୍ରତ ଗତିରେ ଗାଡ଼ିଚାଳନା ରୋକିବା, ରାସ୍ତା ଉପରେ ବେଆଇନ ପାର୍କିଂ ଆଦି ଉପରେ କଟକଣା ଜାରି କରାଗଲେ ଦୁର୍ଘଟଣା ରୋକାଯାଇପାରିବ ବୋଲି ସାମାଜିକ କର୍ମୀ ଦିଲୀପ ସାହୁ କହିଛନ୍ତି ା
ଦୁର୍ଘଟଣା ରୋକିବା ପାଇଁ ପରିବହନ ବିଭାଗ ତଥା ଜିଲା ପ୍ରଶାସନ ପକ୍ଷରୁ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଉଛି। ବିନା ଫିଟ୍ନେସ୍ ଓ ଇନସ୍ୟୁରାନ୍ସରେ ଗାଡ଼ିଚାଳନା ଯୋଗୁ ଗାଡ଼ି ଦୁର୍ଘଟଣା ଗ୍ରସ୍ତ ହେବା ସହ ମୃତାହତଙ୍କ ପରିବାର କ୍ଷତିପୂରଣ ପାଇ ପାରୁନାହାନ୍ତି। ଫଳରେ ଦୁର୍ଘଟଣାଗ୍ରସ୍ତଙ୍କ ପରିବାର ଲୋକେ ବହୁ କଷ୍ଟରେ ଜୀବନ ଅତିବାହିତ କରୁଥିବା ଜିଲା ଓକିଲ ସଂଘ ସଭାପତି ଅଶୋକ ଦାସ କହିଛନ୍ତି।
