ଭୁବନେଶ୍ୱର,୨୭ା୮(ବ୍ୟୁରୋ): ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଘଟଣାରେ ଦିନକୁ ଦିନ ନୂଆ ତଥ୍ୟ ପଦାକୁ ଆସୁଛି। ଏହି ମାମଲାରେ ସିବିଆଇ ସୁଶାନ୍ତଙ୍କ ବାନ୍ଧବି ରିୟା ଚକ୍ରବର୍ତ୍ତୀଙ୍କୁ ପ୍ରାଥମିକ ସନ୍ଦିଗ୍ଧ ଭାବେ ଦେଖୁଛି। ଏହି ମାମଲାରେ ସିବିଆଇ ସବୁ ଦିଗକୁ ନେଇ ତଦନ୍ତ କରୁଥିବାବେଳେ ରିୟାଙ୍କ ଡ୍ରଗ୍ସ କାରବାର ନେଇ ସୂଚନା ମିଳିଛି। ସବୁଠୁ ବଡ଼ କଥା ହେଲା ଡ୍ରଗ୍ସ କାରବାରରେ ରିୟାଙ୍କ ଭୁବନେଶ୍ୱର ଲିଙ୍କ୍ ଥିବା ତାଙ୍କ ହ୍ବାଟ୍ସଆପ୍ ଚାର୍ଟରୁ ଜଣାପଡିବା ପରେ ଓଡ଼ିଶାରେ ଚର୍ଚ୍ଚା ଆରମ୍ଭ ହୋଇଛି। ତେବେ ଏନେଇ ଗୁରୁବାର ପୋଲିସ ଡିଜି ଅଭୟ ପ୍ରତିକ୍ରିୟା ରଖି କହିଛନ୍ତି, ରିୟାଙ୍କ ଭୁବନେଶ୍ୱର ଲିଙ୍କ୍ ନେଇ କିଛି ବି ଏଯାଏ ସ୍ପଷ୍ଟ ହୋଇନି। ଡ୍ରଗ୍ସ କାରବାର ସମ୍ପର୍କରେ ଅଭିଯୋଗ ଆସିବା ପରେ ତଦନ୍ତକାରୀ ସଂସ୍ଥା ଏହାର ଖୋଳତାଡ଼ କରୁଛି। ସେନେଇ ଆମେ କିଛି କହିପାରିବୁ ନାହିଁ। ଆମକୁ ଏ ପ୍ରସଙ୍ଗରେ ବି ଯୋଗାଯୋଗ କରାଯାଇ ନାହିଁ। ଆବଶ୍ୟକ ପଡ଼ିଲେ ଓଡ଼ିଶା ପୋଲିସ ତଦନ୍ତରେ ପୂର୍ଣ୍ଣ ସହଯୋଗ କରିବେ ବୋଲି ଅଭୟ କହିଛନ୍ତି।
