ଜଗତସିଂହପୁର ଅଫିସ, ୨୫।୯: ଦୁର୍ଗାପୂଜା ନେଇ ଜଗତ୍ସିଂହପୁର ସହରରେ ଧୀରେ ଧୀରେ ପରିବେଶ ଚଳଚଞ୍ଚଳ ହେବାକୁ ଲାଗିଲାଣି। ମୂର୍ତ୍ତି, ମେଢ, ସାଜସଜ୍ଜା ଆଦି କିପରି ଅଧିକ ଆକର୍ଷଣୀୟ ହେବ ସେନେଇ ବିଭିନ୍ନ ପୂଜା କମିଟି ପକ୍ଷରୁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଯାଇଛି। କିନ୍ତୁ ଦୁର୍ଗା ବଜାରସ୍ଥିତ ଦୁର୍ଗା ମନ୍ଦିରରେ ପୂଜା କମିଟି ପକ୍ଷରୁ ପୂଜାପାଠ ଉପରେ ଅଧିକ ଧ୍ୟାନ ଦିଆଯିବ ବୋଲି କୁହାଯାଇଛି। କମିଟି ପକ୍ଷରୁ କୁହାଯାଇଛି, ଦୁର୍ଗା ମନ୍ଦିରରେ ପ୍ରତ୍ୟହ ରୀତିନୀତି ଅନୁଯାୟୀ ପୂଜାପାଠ କରାଯାଏ। ଦୁର୍ଗାପୂଜାରେ ପୂଜାପାଠକୁ ଅଧିକ ନିଷ୍ଠା ଓ ଆଧ୍ୟାତ୍ମିକମୟ କରିବା ପାଇଁ ଉଦ୍ୟମ କରାଯାଉଛି। ଏଥିସହ ଆଲୋକ ସାଜସଜ୍ଜା ଉପରେ ମଧ୍ୟ ଧ୍ୟାନ ଦିଆଯିବ ।
୧୯୮୩ରୁ ଏଠାରେ ଦୁର୍ଗାପୂଜା ହୋଇଆସୁଛି। ସେତେବେଳେ ଦୁର୍ଗା ବଜାର ଏତେ ସମ୍ପ୍ରସାରିତ ହୋଇ ନ ଥିଲା । ହାତ ଗଣତି କେତୋଟି କେବିନ୍ ଥିଲା । ସେତେବେଳେ ବଜାରକୁ ଲାଗି ଥିବା ସାହିର ଲୋକେ ପୂଜା କରିବା ପାଇଁ ଅଣ୍ଟା ଭିଡିଥିଲେ । ଭୋଳାନାଥ ରାଉତ, ଡ. ନଟବର ନାୟକ, ସ୍ବର୍ଗତ ନଗେନ୍ଦ୍ର ମହାନ୍ତି, ଡ.ଆର୍. ଏନ୍. ମିତ୍ର ପ୍ରମୁଖ ଦୁର୍ଗାପୂଜା କରିବା ପାଇଁ ପ୍ରାଥମିକ ପର୍ଯ୍ୟାୟରେ ଏକ ବୈଠକ କରି ନିଷ୍ପତ୍ତି ନେଇଥିଲେ। ଏଥିରେ ସାହି ଲୋକଙ୍କ ପୂର୍ଣ୍ଣ ସହଯୋଗ କରିବାରୁ ପୂଜା ଆରମ୍ଭ ହୋଇଥିଲା। ଅତୀତରେ ମାଟିର ପ୍ରତିମା ପୂଜା ପାଉଥିଲା। ୧୯୯୬-୯୭ରେ ସିମେଣ୍ଟ ପ୍ରତିମା ହେଲା। ରଶ୍ମି ଟକିଜ୍ ମାଲିକ ବନମାଳୀ ସାହୁ ମନ୍ଦିର ନିର୍ମାଣ ପାଇଁ ଜମି ଦାନ କରିଥିଲେ। ଏହାପରେ ୨୨ ଫୁଟ ଲମ୍ବ, ୧୫ ଫୁଟ ଓସାର ଓ ୨୦ ଫୁଟ ଉଚ୍ଚତାର ମନ୍ଦିର ତିଆରି ହୋଇଥିଲା। ୧୯୯୯ ପୂର୍ବରୁ ମନ୍ଦିର କାମ ଶେଷ ହୋଇଥିଲା। ଜଗତ୍ସିଂହପୁରର ଏହା ଦ୍ୱିତୀୟ ଦୁର୍ଗା ମନ୍ଦିର ଭାବେ ପରିଚିତ। ମନ୍ଦିର ଭିତରେ ମା’ ଦୁର୍ଗା, ଶିବ, ପାର୍ବତୀ, ଲକ୍ଷ୍ମୀ, ଗଣେଶ, କାର୍ତ୍ତିକ ଆଦି ପୂଜା ପାଉଛନ୍ତି। ପ୍ରତ୍ୟହ ଷୋଡ଼ଶ ଉପଚାରରେ ପୂଜା କରାଯାଏ। ଦଶହରା ସମୟରେ ଅର୍ଥାତ୍ ମୂଳାଷ୍ଟମୀ ବୁଧବାରଠାରୁ ଦୁର୍ଗାଷ୍ଟମୀ ପର୍ଯ୍ୟନ୍ତ ୧୬ ଦିନ ଷୋଳପୂଜା କରାଯିବ। ଏହି ସମୟରେ ଘଟ ବସିବା ସାଙ୍ଗକୁ ଚଣ୍ଡୀପାଠ ଓ ଅନ୍ୟ କର୍ମକାଣ୍ଡ ହେବ। ଏହି ପୂଜା ଅତି ନିଷ୍ଠାର ସହ କରାଯାଉଥିବାରୁ ଅନେକ ଶ୍ରଦ୍ଧାଳୁଙ୍କ ଆଗମନ ହୋଇଥାଏ।
