ନୂଆଦିଲ୍ଲୀ,୨୪।୧୦: କରୋନା ସଂକ୍ରମଣ ଘଟଣା ହଠାତ୍ ବୃଦ୍ଧି ପାଇବାରେ ଲାଗିଛି। ଏହାର ସର୍ବାଧିକ ପ୍ରଭାବ ପଶ୍ଚିମବଙ୍ଗ ସମେତ ୭ଟି ରାଜ୍ୟରେ ଦେଖିବାକୁ ମିଳୁଛି। ଏହାର କାରଣ ନିକଟରେ ଶେଷ ହୋଇଥିବା ପାର୍ବଣ ବୋଲି ଅନୁମାନ କରାଯାଉଛି। ପଶ୍ଚିମବଙ୍ଗରେ ଶନିବାର ୯୭୪ ନୂଆ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଗତ ଚାରି ଦିନ ମଧ୍ୟରେ ପଶ୍ଚିମବଙ୍ଗରେ ଦୈନିକ ମାମଲା ସଂଖ୍ୟା ୮୦୦ ଅତିକ୍ରମ କରିଛି।
ଏହି ସପ୍ତାହରେ ଅନ୍ୟ ଦୁଇଟି ରାଜ୍ୟ ଆସାମ ଏବଂ ହିମାଚଳ ପ୍ରଦେଶରେ ମଧ୍ୟ ନୂଆ ଆକ୍ରାନ୍ତଙ୍କ ବଢ଼ିବାରେ ଲାଗିଛି। ସେହିପରି ମଣିପୁର ଏବଂ ଝାଡଖଣ୍ଡରେ ମଧ୍ୟ ନୂଆ ଆକ୍ରାନ୍ତଙ୍କ ସଂଖ୍ୟା ବଢୁଛି। ପଶ୍ଚିମବଙ୍ଗରେ ଗତ ସାତ ଦିନ ମଧ୍ୟରେ ୫.୫୬୦ ନୂଆ ମାମଲା ଚିହ୍ନଟ ହୋଇଛି। ଯାହା ଗତ ସାତ ଦିନ ତୁଳନାରେ ୨୮.୪ ପ୍ରତିଶତ ଅଧିକ। ଏହି ସମୟ ମଧ୍ୟରେ ଆସାମରେ ନୂଆ ଆକ୍ରାନ୍ତଙ୍କ ସଂଖ୍ୟା ୫୦.୪ ପ୍ରତିଶତ ବଢ଼ିଛି।
ଅପରପକ୍ଷରେ ହିମାଚଳ ପ୍ରଦେଶରେ ଏହା ୩୮.୪ ପ୍ରତିଶତ ରହିଛି। ଶନିବାର କେରଳରେ ୮,୯୦୯ ନୂଆ ମାମଲା ଚିହ୍ନଟ ହୋଇଛି। ମହାରାଷ୍ଟ୍ରରେ ୧,୭୦୧ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ତାମିଲନାଡୁରେ ଏହି ସମୟରେ ୧,୧୪୦ ଜଣଙ୍କ ନମୁନା ରିପୋର୍ଟ କରେନା ପଜିଟିଭ୍ ଆସିଛି।
ହଠାତ୍ ନୂଆ ଆକ୍ରାନ୍ତଙ୍କ ସଂଖ୍ୟା ବଢୁଥିବାରୁ ଲୋକେ ତୃତୀୟ ଲହର ନେଇ ଆତଙ୍କିତ ହୋଇପଡ଼ିଛନ୍ତି।
