ନୂଆଦିଲ୍ଲୀ, ୪।୭- କ୍ରିକେଟ୍ ଓ ବଲିଉଡ୍ ମଧ୍ୟରେ ସମ୍ପର୍କ ଅତି ପୁରୁଣା। ପୂର୍ବରୁ ବହୁ ଭାରତୀୟ କ୍ରିକେଟର୍ ବଲିଉଡ୍ ଅଭିନେତ୍ରୀଙ୍କ ପ୍ରେମରେ ପଡ଼ିଥିବା ଦେଖାଯାଇଛି। ନିକଟ ଅତୀତରେ ଭାରତୀୟ ଦଳର ଯୁବ ଉଇକେଟ୍କିପର ବ୍ୟାଟ୍ସମ୍ୟାନ ରିଷଭ ପନ୍ତ ଓ ଅଭିନେତ୍ରୀ ଉର୍ବଶୀ ରୌତେଲାଙ୍କ ପ୍ରେମ ସମ୍ପର୍କକୁ ନେଇ ଚାରିଆଡ଼େ ଚର୍ଚ୍ଚା ଚାଲିଥିଲା। କିନ୍ତୁ ଚଳିତ ବର୍ଷ ପ୍ରାରମ୍ଭରେ ଏହି ଯୋଡ଼ି ପରସ୍ପରଠାରୁ ଅଲଗା ହୋଇଯାଇଥିଲେ। ରିପୋର୍ଟ ମୁତାବକ, ଉର୍ବଶୀଙ୍କ ସହ କଥା ହେବାକୁ ଚାହୁଁ ନ ଥିଲେ ୨୨ ବର୍ଷୀୟ ପନ୍ତ। ଏହି କାରଣରୁ ସେ ଉଭୟ ହ୍ବାଟ୍ସଆପ୍ ଓ ଫୋନରୁ ଉର୍ବଶୀଙ୍କୁ ବ୍ଲକ କରିଦେଇଥିଲେ। ପନ୍ତ ଯେଉଁ ସମୟରେ ଉର୍ବଶୀଙ୍କୁ ବ୍ଲକ୍ କରିଥିଲେ ସେହି ସମୟରେ ସେ ଶ୍ରୀଲଙ୍କା ବିପକ୍ଷ ଟି୨୦ ସିରିଜ ଖେଳୁଥିଲେ। ସିରିଜର ୩ୟ ଟି୨୦ ମ୍ୟାଚ୍ରେ ତାଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳି ନ ଥିଲା। ସେହିଭଳି ସେ ଖରାପ ଫର୍ମ ଦେଇ ଗତି କରୁଥିଲେ। ଏହାକୁ ନେଇ ବେଶ୍ ଚିନ୍ତିତ ଥିବା ରିଷଭ ଫୋନ ଓ ହ୍ବାଟସଆପ୍ରୁ ୨୬ ବର୍ଷୀୟା ଉର୍ବଶୀଙ୍କୁ ବ୍ଲକ କରି ଦେଇଥିଲେ। ପନ୍ତଙ୍କ ଅତି ନିକଟତମ ସୂତ୍ରରୁ ମିଳିଥିବା ଖବର ଅନୁଯାୟୀ, ଉର୍ବଶୀ ବାରମ୍ବାର ପନ୍ତଙ୍କ ସହ କଥା ହେବାକୁ ଚାହୁଁଥିଲେ। ଯାହା ଫଳରେ ବାଧ୍ୟ ହୋଇ ପନ୍ତ ଏଭଳି ପଦକ୍ଷେପ ନେଇଥିଲେ। ଏଠାରେ ଉଲ୍ଲେଖଯୋଗ୍ୟ, ପୂର୍ବରୁ ଉର୍ବଶୀ ଓ ଅନ୍ୟତମ ଭାରତୀୟ କ୍ରିକେଟର୍ ହାର୍ଦ୍ଦିକ ପାଣ୍ଡ୍ୟାଙ୍କ ମଧ୍ୟରେ ଲମ୍ବା ସମୟ ପର୍ଯ୍ୟନ୍ତ ଆଫେୟାର୍ସ ରହିଥିଲା। କିନ୍ତୁ ନତାଶା ଷ୍ଟେନକୋଭିକଙ୍କୁ ପାଣ୍ଡ୍ୟା ଜୀବନ ସାଥୀ ବାଛିବା ପରେ ଉର୍ବଶୀ ତାଙ୍କଠାରୁ ଦୂରେଇ ଯାଇଥିଲେ। ଏହାପରେ ରିଷଭଙ୍କ ସହ ତାଙ୍କ ପ୍ରେମ ସମ୍ପର୍କ ଗଢ଼ି ଉଠିଥିଲା।
