ନିରାକାରପୁର,୨୨।୭(ଡି.ଏନ୍.ଏ.): ଖୋର୍ଦ୍ଧା ଜିଲା ନିରାକାରପୁର ପଞ୍ଚାୟତରେ ଥିବା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଗୃହ ଶୋଚନୀୟ ଅବସ୍ଥାରେ ପଡ଼ିରହିଛି। ଲଗାଣ ବର୍ଷା ହେଲେ କାନ୍ଥ ବାଡଠାରୁ ଆରମ୍ଭ କରି ଆଜବେଷ୍ଟସରୁ ପାଣି ଝରୁଛି। ଏଥିସହ ଗୃହର ଚାରିଆଡ ବିରାଟକାୟ ହୁଙ୍କା ରହିଛି। କିଛି ପୁରୁଣା କବାଟ ରହିଥିବାରୁ ଭଗ୍ନାବସ୍ଥାରେ ଅଛି। ଏହା ଯୋଗୁ ଉକ୍ତ କାର୍ଯ୍ୟାଳୟରେ ଲୋକମାନଙ୍କର କାର୍ଯ୍ୟଥିଲେ ମଧ୍ୟ ସେଠି ଯିବାକୁ ଭୟ କରୁଛନ୍ତି। ଏହି ସମସ୍ୟା ପ୍ରତି ପ୍ରଶାସନ ଦୃଷ୍ଟିକୁ ଆଣିବା ପରେ ପୁରୁଣା ଆଜବେଷ୍ଟସକୁ ଉଠାଇ ଛାତ ପକାଇବା ସାହିତ କାର୍ଯ୍ୟାଳୟ ମରାମତି ପାଇଁ ୫ଲକ୍ଷ ଟଙ୍କା ମଞ୍ଜୁର ହୋଇଥିବା ବେଳେ ଆଉ ଗୋଟିଏ ଷ୍ଟକ୍ ରୁମ ପାଇଁ ୫ ଲକ୍ଷ ଗ୍ରାମ୍ୟ ଉନ୍ନୟନ ପକ୍ଷରୁ ମଞ୍ଜୁର ହୋଇ କାର୍ଯ୍ୟ ମଧ୍ୟ ସରିଛି। ହେଲେ ଦୁଃଖର ବିଷୟ ଯେ, ବର୍ଷା ହେଲେ ନୂତନ ଛାତର ଚତୁଃପାଶର୍ବରୁ ବର୍ଷା ଜଳ ଝରି ଘର ଭିତରେ ଲହଡ଼ି ମାରୁଛି। ବିଭିନ୍ନ ଜାଗାର କୋଣରେ ସିମେଣ୍ଟ ଠିକ୍ ଭାବେ ଲଗାଯାଇ ନ ଥିବା ଦେଖିବାକୁ ମିଳିଛି। ଫଳରେ କାର୍ଯ୍ୟାଳୟ ଘର ଭିତରେ ବର୍ଷାଜଳ ସନ୍ତେଇ ହୋଇ ଅଫିସ ମଧ୍ୟରେ ଥିବା କାଗଜପତ୍ର ନଷ୍ଟ ହେବାକୁ ବସିଲାଣି। ଅନ୍ୟପଟେ ଯେଉଁ ୫ ଲକ୍ଷ ଟଙ୍କା ଖର୍ଚ୍ଚ କରି ଷ୍ଟକ୍ ରୁମ କରାଯାଇଛି ତାହା ନିମ୍ନମାନର ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ତେଣୁ ଏହାର ଠିକ୍ ଭାବେ ତଦନ୍ତ କରାଯାଉ ବୋଲି ବୃଦ୍ଧିଜୀବୀମାନେ ମତ ପ୍ରକାଶ କରିଛନ୍ତି। ବିଶେଷ କଥା ହେଲା ଏହି କାର୍ଯ୍ୟାଳୟ ଭିତରେ ପାନୀୟ ଜଳର ବ୍ୟବସ୍ଥା ନ ଥିବାବେଳେ ଶୌଚାଳୟର ସୁବିଧା ମଧ୍ୟ ନାହିଁ। ଏ ନେଇ ନିରାକାରପୁର ରାଜସ୍ବ ନିରୀକ୍ଷକ ଅଧିକାରୀ ରମାକାନ୍ତ ନାୟକ କହିଛନ୍ତି, କିଛିଦିନ ହେବ ଆସିଛି, ତେଣୁ କୌଣସି ଉପର ଅଧିକାରୀଙ୍କୁ ଜଣାଇ ନାହିଁ। ପ୍ରାୟତଃ ହାତରୁ ଖର୍ଚ୍ଚ କରି ଅଧିକାଂଶ ଏ ହୁଙ୍କା ଏବଂ ପାଣିକୁ ସଫା କରୁଛି ବୋଲି ସେ ପ୍ରକାଶ କରିଛନ୍ତି ।
