ନୂଆଦିଲ୍ଲୀ,୧୩ା୧୧(ପି.ଟି.): ପରିସଂଖ୍ୟାନ ଓ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ତଥ୍ୟ ଅନୁଯାୟୀ, ସେପ୍ଟେମ୍ବରରେ ଉପଭୋକ୍ତା ମୂଲ୍ୟ ସୂଚକାଙ୍କ (ସିପିଆଇ) ଭିତ୍ତିକ ମୁଦ୍ରାସ୍ଫୀତି ୫.୫୪ ପ୍ରତିଶତ ରହିଥିଲା। ପୂର୍ବରୁ ୨୦୨୪ ଅକ୍ଟୋବରରେ ଏହା ୬.୨୫ ପ୍ରତିଶତ ରେକର୍ଡ କରାଯାଇଥିଲା। ଆରବିଆଇକୁ ମୁଦ୍ରାସ୍ଫୀତି ହାର ୨ରୁ ୬ ପ୍ରତିଶତ ମଧ୍ୟରେ ସୀମିତ ରଖିବାକୁ ଦାୟିତ୍ୱ ଦିଆଯାଇଛି। ତେବେ ଖୁଚୁରା ମୁଦ୍ରାସ୍ଫୀତି ବୃଦ୍ଧି କାରଣଗୁଡ଼ିକୁ ଦେଖିଲେ, ସେପ୍ଟେମ୍ବରରେ ଖାଦ୍ୟ ମୁଦ୍ରାସ୍ଫୀତି ୭.୭୪% ଥିବାବେଳେ ଅକ୍ଟୋବରରେ ଏହା ୮.୯୪% କୁ ବୃଦ୍ଧି ପାଇଛି। ବିଶେଷକରି ପିଆଜ (୧୧୬.୨୨%), ରସୁଣ (୬୦.୭୪%), ଅଦା (୪୮.୩୨%) ଏବଂ ଲେମ୍ବୁ (୪୭.୩୦%) ଭଳି ନିତ୍ୟବ୍ୟବହାର୍ଯ୍ୟ ପରିବା ଦର ଆକାଶଛୁଆଁ ହୋଇଛି। ଅନ୍ୟପକ୍ଷରେ ଜଳଭଣ୍ଡାରଗୁଡ଼ିକରେ ଜଳସ୍ତର କମ୍ ରହିବା କାରଣରୁ ରବି ଫସଲ ଉତ୍ପାଦନ ପ୍ରଭାବିତ ହେବା ଆଶଙ୍କା ଦେଖାଦେଇଛି, ଯାହା ବଜାରରେ ଯୋଗାଣ ଶୃଙ୍ଖଳକୁ ବାଧାପ୍ରାପ୍ତ କରି ଦର ବଢ଼ାଇଛି। ସେହିପରି ପଶ୍ଚିମ ଏସିଆରେ ଯୁଦ୍ଧ ପ୍ରଭାବରେ ଅଶୋଧିତ ତୈଳ ଦରରେ ଅସ୍ଥିରତା, କଞ୍ଚାମାଲଗୁଡ଼ିକର ଅତ୍ୟଧିକ ମୂଲ୍ୟ ବୃଦ୍ଧି ଏବଂ ପରିବହନ, ରେଷ୍ଟୁରାଣ୍ଟ (୧୦.୦୬%) ଏବଂ ଅନ୍ୟାନ୍ୟ ସେବା କ୍ଷେତ୍ର ମହଙ୍ଗା ହୋଇଛି। ମୋଟ ୧୨ଟି ବର୍ଗ ମଧ୍ୟରୁ ୧୧ଟି ବର୍ଗରେ ଦରଦାମ ବୃଦ୍ଧି ପରିଲକ୍ଷିତ ହୋଇଛି। ଖାଦ୍ୟ ଓ ପାନୀୟ (ଏଫ୍ ଆଣ୍ଡ ବି)ରେ ୮.୫୧% ଏବଂ ବ୍ୟକ୍ତିଗତ ଯତ୍ନ ଓ ବିବିଧ ସାମଗ୍ରୀ କ୍ଷେତ୍ରରେ ୧୦.୧୪% ରେକର୍ଡ କରାଯାଇଛି।
ଏଭଳିସ୍ଥଳେ ଆସନ୍ତା ଡିସେମ୍ବର ୨ରୁ ୪ ତାରିଖ ମଧ୍ୟରେ ଅନୁଷ୍ଠିତ ହେବାକୁ ଥିବା ଆର୍ବିଆଇର ମୁଦ୍ରାନୀତି କମିଟି (ଏମ୍ପିସି) ବୈଠକରେ ରେପୋ ରେଟ୍ରେ ଆଉ ୨୫ ବେସିସ୍ ପଏଣ୍ଟ (୦.୨୫%) ବୃଦ୍ଧି ହେବା ପ୍ରାୟ ନିଶ୍ଚିତ ବୋଲି ‘ଇକ୍ରା’ର ମୁଖ୍ୟ ଅର୍ଥନୀତିଜ୍ଞ ଅଦିତି ନାୟାର ଏବଂ ଡିବିଏସ୍ ବ୍ୟାଙ୍କର ବରିଷ୍ଠ ଅର୍ଥନୀତିଜ୍ଞ ରାଧିକା ରାଓ ମତ ଦେଇଛନ୍ତି। ଗତ ଅକ୍ଟୋବରରେ ଆର୍ବିଆଇ ପ୍ରାୟ ୪ ବର୍ଷ ପରେ ସୁଧ ହାର ୦.୨୫% ବଢ଼ାଇ ୫.୫୦% କରିଥିଲା। ତେବେ ଖାଦ୍ୟ ମୁଦ୍ରାସ୍ଫୀତି ଆହୁରି କିଛି ମାସ ୬% ଉପରେ ରହିବ ବୋଲି ‘୩୬୦ ୱାନ ଆସେଟ୍’ର ବରିଷ୍ଠ ଅର୍ଥନୀତିଜ୍ଞ ବିକ୍ରମ ଛାବ୍ରା ଆଶଙ୍କା ପ୍ରକାଶ କରିଛନ୍ତି। ଅନ୍ୟପକ୍ଷରେ ସୁଧ ହାର ବୃଦ୍ଧି ପାଇଲେ ଋଣ ମହଙ୍ଗା ହେବା ସହ ରିଅଲ ଇଷ୍ଟେଟ ବଜାରରେ ଗ୍ରାହକଙ୍କ ଚାହିଦା ହ୍ରାସ ପାଇବ ବୋଲି ନାଇଟ୍ ଫ୍ରାଙ୍କ୍ ଇଣ୍ଡିଆର ଜାତୀୟ ନିର୍ଦ୍ଦେଶକ ବିବେକ ରାଠୀ କହିଛନ୍ତି।