କାକଟପୁର,୩।୯(ଡି.ଏନ୍.ଏ.): ଦୀର୍ଘବର୍ଷ ପୂର୍ବେ ରାଜ୍ୟ ସରକାର ବସ ଯାତ୍ରୀମାନଙ୍କର ସୁବିଧା ପାଇଁ ପୂର୍ତ୍ତବିଭାଗ କାକଟପୁର ବ୍ଲକର ସୋମନାଥପୁର ଛକ, କଲେଜ ଛକ, ତହସିଲ ଛକ ଓ ମଲାମାଛ ଛକଠାରେ ଯାତ୍ରୀ ବିଶ୍ରାମାଗାର ନିର୍ମାଣ କରିଥିଲେ। ପରେ ରକ୍ଷଣାବେକ୍ଷଣ ନ କରିବାରୁ ତାହା ବିପଦସଙ୍କୁଳ ଅବସ୍ଥାରେ ପଡ଼ିରହିଛି। ଅଧିକାଂଶ ବିଶ୍ରାମାଗାରରେ ଛାତ ଭାଙ୍ଗିଯାଇଥିବାବେଳେ ଅନ୍ୟ କେଉଁଠି ବସିବା ସ୍ଥାନ ଅପରିଷ୍କାର, ଦୁର୍ଗନ୍ଧମୟ ହେଉଥିବାରୁ ଲୋକେ ସେଠାକୁ ଯିବାକୁ ମଣୁନାହାନ୍ତି, ଏପରିକି କେତାଟି ସ୍ଥାନରେ ରାତିହେଲେ ଅସାମାଜିକ ଲୋକଙ୍କ ଆଡ୍ଡା ଜମୁଛି। ଏଗୁଡ଼ିକ ପ୍ରତି ପ୍ରଶାସନର ଦୃଷ୍ଟି ପଡ଼ୁ ନ ଥିବାରୁ ଦିନକୁଦିନ ଏଭଳି ଭାବେ ନଷ୍ଟ ହେବାରେ ଲାଗିଛି। ତେଣୁ ଜିଲାପାଳ ଦୃଷ୍ଟି ଦେଇ ମରାମତି ପାଇଁ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ କାକଟପୁର ବିଡିଓ କହିଛନ୍ତି, ଏହିସବୁ କାର୍ଯ୍ୟ ଆମ ପରିସର ବାହାରେ। କେନ୍ଦ୍ର ଓ ରାଜ୍ୟ ଅର୍ଥ କମିଶନଙ୍କ ଗାଇଡଲାଇନକୁ ଅନୁସରଣ କରି ଆମେ କାର୍ଯ୍ୟ କରୁଛୁ ବୋଲି କହିଛନ୍ତି। କାକଟପୁର ପୂର୍ତ୍ତବିଭାଗ ଅଧିକାରୀ ଏଠାରେ ଅନୁପସ୍ଥିତ ରହୁଥିବାରୁ ଯୋଗାଯୋଗ କରିବା ସମ୍ଭବ ହୋଇପାରି ନାହିଁ।
