ଚଣ୍ଡିଗଡ଼, ୧୨।୫ : ମୋହାଲିରେ ଆତଙ୍କବାଦୀ ଆକ୍ରମଣ ପରେ ବର୍ତ୍ତମାନ ପଞ୍ଜାବ ସରକାର ରାଜ୍ୟର ଗୁରୁତ୍ୱପୂର୍ଣ୍ଣ ବିଲ୍ଡିଂର ସୁରକ୍ଷା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିବା ଆରମ୍ଭ କରିଛନ୍ତି। ଏହି ଆକ୍ରମଣର ତଦନ୍ତ ମଧ୍ୟରେ ପୋଲିସ ପ୍ରଶାସନ ରାଜ୍ୟରେ ଗୁରୁତ୍ୱପୂର୍ଣ୍ଣ ବିଲ୍ଡିଂର ସୁରକ୍ଷାକୁ ବୃଦ୍ଧି ଲାଗି ପଦକ୍ଷେପ ନେବା ଆରମ୍ଭ କରିଛି। ଏକ ରିପୋର୍ଟ ଅନୁଯାୟୀ, ରାଜ୍ୟର ୨୩ ଟି ଜିଲାର ପ୍ରାୟ ୧୭୦ଟି ବିଲ୍ଡିଂକୁ ପୋଲିସ ଚିହ୍ନଟ କରିଛି। ଏସବୁ ବିଲ୍ଡିଂର ସୁରକ୍ଷା ଦାୟିତ୍ୱରେ ପ୍ରାୟ ୨୦୦୦ ଯବାନଙ୍କୁ ନିୟୋଜିତ କରାଯିବାର ଯୋଜନା ରହିଛି।
ସୂତ୍ରରୁ ପ୍ରକାଶ ଯେ ଲୁଧିଆନା କୋର୍ଟ କମ୍ପ୍ଲେକ୍ସରେ ବିସ୍ଫୋରଣ ପରେ ମୋହାଲି ଷ୍ଟେଟ ଇଣ୍ଟେଲିଜେନ୍ସ ବିଲ୍ଡିଂ ଉପରେ ହୋଇଥିବା ଆକ୍ରମଣ ହେଉଛି ବିସ୍ଫୋରଣର ଦ୍ୱିତୀୟ ଘଟଣା। ସରକାର ଏହାକୁ ଗୁରୁତର ସହ ନେଇଛନ୍ତି।
ଏହାକୁ ଆତଙ୍କବାଦୀ ଘଟଣା ସହ ଯୋଡି ପୋଲିସ ମୋହାଲି ବିସ୍ଫୋରଣ ଘଟଣାର ଖୋଳତାଡ ଆରମ୍ଭ କରିଛି। ତେବେ ଆତଙ୍କବାଦୀ ଆକ୍ରମଣ ହୋଇଥିବା ନେଇ ପୋଲିସକୁ ଏପର୍ଯ୍ୟନ୍ତ ପ୍ରମାଣ ମିଳି ନାହିଁ।
ଡିଜିପି ପ୍ରତ୍ୟେକ ଜିଲାର ଅଧିକାରୀଙ୍କୁ ସଜାଗ ରହିବାକୁ ଏବଂ ନିଜ ନିଜ ଅଞ୍ଚଳର ଗୁରୁତ୍ୱପୂର୍ଣ୍ଣ ସ୍ଥାନ ତଥା କୋଠା ଉପରେ କଡା ନଜର ରହିବାକୁ ନିର୍ଦ୍ଦେଶ ଦେଇଛନ୍ତି।
ବୈନିକ ଭାସ୍କରରେ ପ୍ରକାଶିତ ଏକ ରିପୋର୍ଟ ଅନୁଯାୟୀ ମୋହାଲି, ଫିରୋଜପୁର ସହର ସମ୍ବେଦନଶୀଳ ବର୍ଗରେ ରହିଛନ୍ତି। ସେହିପରି ଅମୃତସର, ଜଲନ୍ଦର, ପଠାନକୋଟ, ଫେରୋଜପୁର, ମୋହାଲି,ପଟିଆଲା ଜିଲାକୁ ଅତି ସମ୍ବେଦନଶୀଳ ବର୍ଗରେ ରଖାଯାଇଛି। ରିପୋର୍ଟ ଅନୁଯାୟୀ, ମୋହାଲିରେ ସର୍ବାଧିକ ୩୭ ଟି ଅତି ସମ୍ବେଦନଶୀଳ କୋଠା ରହିଛି। ଏହାପରେ ତାଲିକାରେ ଦ୍ୱିତୀୟ ସ୍ଥାନ ଅମୃତସରର ରହିଛି। ଏଠାରେ ୧୭ ଟି ଅତି ସମ୍ବେଦନଶୀଳ କୋଠା ଅଛି। ସେଥିମଧ୍ୟରେ କେନ୍ଦ୍ରୀୟ ଏବଂ ରାଜ୍ୟ ସୁରକ୍ଷା ଏଜେନ୍ସିର ମୁଖ୍ୟାଳୟ ମଧ୍ୟ ଅଛି ।
ଅପୀପକ୍ଷରେ ଟ୍ରିବ୍ୟୁନ ରିପୋର୍ଟରେ କୁହାଯାଇଛି ଯେ ମୋହାଲିରେ ପଞ୍ଜାବ ପୋଲିସର ଗୁପ୍ତଚର କାର୍ଯ୍ୟାଳୟ ଉପରେ ଆରପିଜି ଆକ୍ରମଣ ଘଟଣାରେ ପୋଲିସ ଅନେକ ଲୋକଙ୍କୁ ଅଟକ ରଖିଛି। କିନ୍ତୁ ଏହି ମାମଲାରେ କାହାର ଗିରଫ ହୋଇଥିବା ନିଶ୍ଚିତ କରାଯାଇନାହିଁ। ଅମ୍ବାଲାରୁ ଗିରଫ ହୋଇଥିବା ଦୁଇ ସନ୍ଦିଗ୍ଧଙ୍କୁ ପଚରାଉଚରା ଜାରି ରହିଛି। କିନ୍ତୁ ପୋଲିସ ପକ୍ଷରୁ ଏନେଇ କୌଣସି ସୂଚନା ପ୍ରଦାନ କରାଯାଇନାହିଁ।
