ନୂଆଦିଲ୍ଲୀ, ୧୧।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ସାଙ୍ଘାଇ ସହଯୋଗ ସଂଗଠନ (ଏସ୍ସିଓ) ସମିଟ୍ରେ ଉଦ୍ବୋଧନ ଦେବା ଅବସରରେ ଦେଶଗୁଡ଼ିକ ପରସ୍ପରର ସାର୍ବଭୌମତ୍ୱ ଏବଂ ଆଞ୍ଚଳିକ ସଂହତିକୁ ସମ୍ମାନ ଦେବା ଉପରେ ଗୁରୁତ୍ୱାରୋପ କରିଛନ୍ତି। ଏସ୍ସିଓ ଦେଶଗୁଡ଼ିକ ସହ ଭାରତର ଦୃଢ଼ ସାଂସ୍କୃତିକ ଓ ଐତିହାସିକ ସମ୍ପର୍କ ରହିଛି। ସମ୍ପର୍କ ବଢ଼ାଇବା ବେଳେ ପରସ୍ପରର ସାର୍ବଭୌମତ୍ୱ ଓ ସଂହତିକୁ ସମ୍ମାନ ଦେବା ମୌଳିକ ନୀତି। ତେବେ ଏସ୍ସିଓ ଏଜେଣ୍ଡାକୁ ରୋକିବା ଲାଗି ଉଦ୍ୟମ ହେଉଛି। ଦ୍ୱିପାକ୍ଷିକ ପ୍ରସଙ୍ଗଗୁଡ଼ିକୁ ଅଯଥା ଏସ୍ସିଓ କାର୍ଯ୍ୟସୂଚୀରେ ସ୍ଥାନ ଦେବା ପାଇଁ ବାରମ୍ବାର ଉଦ୍ୟମ ହେବା ଦୁର୍ଭାଗ୍ୟଜନକ ବୋଲି ଭର୍ଚୁଆଲ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ। ଏଭଳି ଉଦ୍ୟମ ଏସ୍ସିଓର ବିଶେଷାଧିକାର ଏବଂ ସାଙ୍ଘାଇ ବିଚାରଧାରାର ଉଲ୍ଲଂଘନ କରୁଛି।
ଭାରତ ଓ ଚାଇନା ମଧ୍ୟରେ ସୀମା ବିବାଦ ଲାଗିରହିଥିବାବେଳେ ମଙ୍ଗଳବାର ଏସ୍ସିଓ ରାଷ୍ଟ୍ରମୁଖ୍ୟ ପରିଷଦର ୨୦ତମ ସମିଟ୍ ଅନୁଷ୍ଠିତ ହୋଇଛି। ୬ ମାସରୁ ଊର୍ଦ୍ଧ୍ୱ ସମୟ ଧରି ପୂର୍ବ ଲଦାଖରେ ଉତ୍ତେଜନା ଲାଗି ରହିଥିବାବେଳେ ପ୍ରଥମ ଥର ଲାଗି ପ୍ରଧାନମନ୍ତ୍ରୀ ମୋଦି ଓ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ ଏହି ଭିଡିଓ କନ୍ଫରେନ୍ସିଂ ବୈଠକରେ ମୁହାଁମୁହିଁ ହୋଇଥିଲେ। କରୋନା କାରଣରୁ ପ୍ରଥମ ଥର ପାଇଁ ବୈଠକ ଭର୍ଚୁଆଲି କରାଯାଇଛି। ଭାରତ ଶାନ୍ତି, ନିରାପତ୍ତା ଓ ସମୃଦ୍ଧି ଉପରେ ଦୃଢ଼ ବିଶ୍ୱାସ କରେ। ଏହା ଆତଙ୍କବାଦ ଓ ନିଶା ଚୋରା କାରବାରକୁ ଦୃଢ଼ ବିରୋଧ କରିଆସିଛି ବୋଲି ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ। ସମସ୍ତ ଅଂଶୀଦାରଙ୍କ ଆଶାଆକାଂକ୍ଷା, ସମସାମୟିକ ଚ୍ୟାଲେଞ୍ଜ ଏବଂ ମାନବୀୟ କଲ୍ୟାଣ ସମ୍ପର୍କରେ ଦେଶଗୁଡ଼ିକ ଆଲୋଚନା କରିବାକୁ ପ୍ରଧାନମନ୍ତ୍ରୀ ପ୍ରସ୍ତାବ ଦେବା ସହ ଏସ୍ସିଓ ସଦସ୍ୟ ରାଷ୍ଟ୍ରଗୁଡ଼ିକର ପୂର୍ଣ୍ଣ ସମର୍ଥନ ଆଶା କରିଥିଲେ। ଭର୍ଚୁଆଲ ମିଟିଂରେ ଏସ୍ସିଓର ୮ ସଦସ୍ୟ ରାଷ୍ଟ୍ର ରୁଷିଆ, ଚାଇନା, ଭାରତ, ପାକିସ୍ତାନ, କାଜାଖ୍ସ୍ତାନ, କିର୍ଗିଜସ୍ତାନ, ତାଜିକିସ୍ତାନ ଏବଂ ଉଜ୍ବେକିସ୍ତାନ ଅଂଶଗ୍ରହଣ କରିଛନ୍ତି। ରୁଷିଆ ରାଷ୍ଟ୍ରପତି ଭ୍ଲାଡିମିର୍ ପୁଟିନ ଏଥିରେ ଅଧ୍ୟକ୍ଷତା କରିଥିଲେ।
