ମହାକାଳପଡ଼ା,୨୮ା୩ (ଡି.ଏନ.ଏ.):ଶିଳ୍ପବିହୀନ କେନ୍ଦ୍ରାପଡ଼ା ଜିଲାରେ ଶିଳ୍ପକୁ ନେଇ ବିଭିନ୍ନ ମହଲରେ ସ୍ବାଗତ କରାଯାଇଛି। ମହାକାଳପଡ଼ା ବ୍ଲକର ଉପକୂଳବର୍ତ୍ତୀ ଅଞ୍ଚଳରେ ପ୍ରସ୍ତାବିତ ଶିଳ୍ପ ପ୍ରତିଷ୍ଠା ହେଲେ ପ୍ରତ୍ୟକ୍ଷ ଓ ପରୋକ୍ଷ ଭାବେ ସ୍ଥାନୀୟ ଅଞ୍ଚଳର ବେକାର ଯୁବତୀଯୁବକମାନଙ୍କୁ ନିଯୁକ୍ତି ମିଳିବ ବୋଲି କୁହାଯାଇଛି। ସାମାଜିକ ଓ ଅର୍ଥନୈତିକ କ୍ଷେତ୍ରରେ ବୈପ୍ଲବିକ ପରିବର୍ତ୍ତନ ହେବା ସହ ବିକାଶର ସୂର୍ଯ୍ୟ ଉଦୟ ହେବ। ପ୍ରସ୍ତାବିତ ଶିଳ୍ପକୁ ନେଇ ସୋମବାର ସ୍ଥାନୀୟ କାଳିବାଡ଼ିଠାରେ ପ୍ରାକ୍ତନ ସରପଞ୍ଚ ନାରାୟଣ ଚନ୍ଦ୍ର ହାଲ୍ଦାରଙ୍କ ସଭାପତିତ୍ୱରେ ଅନୁଷ୍ଠିତ ବୈଠକ ରାମନଗର ଓ ଖରିନାସୀ ପଞ୍ଚାୟତର ଶତାଧିକ ଲୋକ ମେଳି ହୋଇ ନିଜ ଜମି, ଭିଟାମାଟି ସମସ୍ୟାର ସମାଧାନ ପାଇଁ ବାଟ ଖୋଜିଥିଲେ।
ମିଳିଥିବା ସୂଚନା ଅନୁସାରେ, ଏହି ଅଞ୍ଚଳରେ ୧୯୭୬ ମସିହାରେ ରାଜସ୍ବ ବିଭାଗ ପକ୍ଷରୁ ବହୁ ଲୋକଙ୍କୁ ଜମି ପଟ୍ଟା ବଣ୍ଟନ କରାଯାଇଥିଲା। ପରବର୍ତ୍ତୀ ସମୟରେ ପ୍ରଶାସନ ଏହି ଜମି ପଟ୍ଟାକୁ ଜଙ୍ଗଲ କିସମ ଦର୍ଶାଇ ପାଉତି କାଟିବା ବନ୍ଦ କରିଥିଲା। ପରେ ଏ ନେଇ ଖରିନାସୀ ଅଞ୍ଚଳର କେତେଜଣ ବୁଦ୍ଧିଜୀବୀ ହାଇକୋର୍ଟରେ ଜମିଜମା ସମସ୍ୟାକୁ ନେଇ ମାମଲା ଦାଏର କରିଥିଲେ। ହାଇକୋର୍ଟ ମାମଲାର ବିଚାରକରି ତୁରନ୍ତ ଜମିଜମା ସମସ୍ୟା ସମାଧାନ ପାଇଁ ଜିଲା ପ୍ରଶାସନକୁ ନିର୍ଦ୍ଦେଶ ଦେଇଥିଲା। ଚଳିତ ମାସ ୩ୟ ସପ୍ତାହରେ ଜିଲା ସର୍କିଟ ହାଉସ୍ଠାରେ ଜିଲାପାଳ, ପ୍ରଶାସନର ବରିଷ୍ଠ ଅଧିକାରୀମାନେ ଓ ଅଞ୍ଚଳର ବୁଦ୍ଧିଜୀବୀ, ଜନ ପ୍ରତିନିଧିମାନଙ୍କୁ ନେଇ ଏକ ବୈଠକ ହୋଇଥିଲା। ଜିଲା ପ୍ରଶାସନ ପକ୍ଷରୁ ବୈଠକରେ ଉପସ୍ଥିତ ଲୋକମାନଙ୍କୁ ଆପଣଙ୍କ ପାଖରେ ଯାହା ଜମିଜମା ରେକର୍ଡ ଅଛି ତୁରନ୍ତ ପ୍ରଶାସନ ନିକଟରେ ଦାଖଲ ପାଇଁ କୁହାଯାଇଛି। ରେକର୍ଡ ଦାଖଲ ପରେ ପ୍ରଶାସନ ପକ୍ଷରୁ ଯାଞ୍ଚ କରାଯାଇ ଉପୁଜିଥିବା ସମସ୍ୟାର ସମାଧାନ ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ମିଳିଥିଲା ବୋଲି ସୋମବାର ବୈଠକରେ ଲୋକମାନଙ୍କୁ ସଚେତନ କରାଯାଇଛି। କାଳିବାଡ଼ିରେ ଅନୁଷ୍ଠିତ ବୈଠକରେ ସ୍ଥାନୀୟ ସରପଞ୍ଚ ବନିତା ରାଉତ, ରାମନଗର ସରପଞ୍ଚ ମିଲନ ଦେବନାଥ, ଜିଲା ପରିଷଦ ସଦସ୍ୟ ମୃତ୍ୟୁଞ୍ଜୟ ମଣ୍ଡଳ, ବ୍ଲକ ଉପାଧ୍ୟକ୍ଷ ବିଜୟ ଶୁକ୍ଳା, ସମୀର ମିସ୍ତ୍ରି, ସୁବାସ ବିଶ୍ୱାସ, କଲ୍ୟାଣ ରାୟ, ଭକ୍ତ ରଞ୍ଜନ ମାହାଳି, ତୁଷାର ସର୍ଦ୍ଦାର, ରଞ୍ଜନ ଦାସ, ଗୌତମ ଦାସଙ୍କ ସମେତ ଶତାଧିକ ଲୋକ ଉପସ୍ଥିତ ଥିଲେ।
