ମଦୁରାଈ,୩।୧୨ : ଧର୍ମାନ୍ତରୀକରଣ ପରେ ମୂଳ ଧର୍ମରେ ଥିବା ସମୟରେ ମିଳୁଥିବା ସଂରକ୍ଷଣ ଆଉ ମିଳିବ ନାହିଁ ବୋଲି ମାଡ୍ରାସ ହାଇକୋର୍ଟ ଏକ ମାମଲାର ବିଚାର କରି ଏଭଳି ରାୟ ପ୍ରଦାନ କରିଛନ୍ତି।
ମଦୁରାଈ ବେଞ୍ଚର ବିଚାରପତି ଜିଆର୍ ସ୍ବାମୀନାଥନ ତାମିଲନାଡୁ ପବ୍ଲିକ ସର୍ଭିସ କମିଶନରେ ନିଯୁକ୍ତି କ୍ଷେତ୍ରରେ ସଂରକ୍ଷଣ ଦାବି କରୁଥିବା ଜଣେ ବ୍ୟକ୍ତିଙ୍କ ଆବେଦନର ବିଚାର କରି ଏହାକୁ ଖାରଜ କରି ଦେଇଛନ୍ତି। ବିଚାରପତି କହିଛନ୍ତି ଯେ ସମ୍ପୃକ୍ତ ବ୍ୟକ୍ତି ହିନ୍ଦୁଧର୍ମରେ ଥିବାବେଳେ ପଛୁଆବର୍ଗ ସଂରକ୍ଷଣ ସୁବିଧା ହାସଲ କରିଥିଲେ। ତେବେ ପରବର୍ତ୍ତୀ ସମୟରେ ସେ ୨୦୦୮ରେ ଇସଲାମ ଧର୍ମରେ ଦୀକ୍ଷିତ ହୋଇଥିଲେ।
ତେବେ ସେ ୨୦୧୫ରେ ମୁସଲମାନ ଧର୍ମର ପଛୁଆବର୍ଗ ପ୍ରମାଣପତ୍ର ସ୍ଥାନୀୟ ତହସିଲଦାରଙ୍କଠାରୁ ହାସଲ କରିଥିଲେ। ସେ ତାମିଲନାଡୁ ପବ୍ଲିକ ସର୍ଭିସ କମିଶନ ପ୍ରିଲିମ୍ରେ ସଫଳତା ପରେ ୨୦୧୯ରେ ମେନ୍ସ ପରୀକ୍ଷା ଦେଇଥିଲେ। ତେବେ ସଫଳ ତାଲିକାରେ ତାଙ୍କ ନାମ ନ ଥିଲା। ଏନେଇ ସେ ଆଇଟିଆଇ ଅନ୍ତର୍ଗତ ଆବେଦନ କରିଥିଲେ। ଜଣା ପଡିଥିଲା ତାମିଲନାଡୁ ପବ୍ଲିକ ସର୍ଭିସ କମିଶନ ତାଙ୍କୁ ପଛୁଆ ବର୍ଗ ପରିବର୍ତ୍ତେ ସାଧାରଣ ବର୍ଗରେ ଗ୍ରହଣ କରିଥିଲେ। ଏନେଇ ସେ ସମ୍ବିଧାନର ଅନୁଚ୍ଛେଦ ୨୫ ଅନ୍ତର୍ଗତ ତାଙ୍କ ମୋଳିକ ଅଧିକାରକୁ ଉଲ୍ଲଂଘନ କରାଯାଇଥିବା ନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ମଦୁରାଈ ବେଞ୍ଚ କହିଥିଲେ, ସମ୍ପ୍ରତି ଏଭଳି ମାମଲା ସୁପ୍ରିମ୍କୋର୍ଟରେ ବିଚାରାଧୀନ ରହିଛି। ଏପରିସ୍ଥଳେ ହାଇକୋର୍ଟ ଏଥିରେ ହସ୍ତକ୍ଷେପ କରିପାରିବେ ନାହିଁ ବୋଲି ମଦୁରାଈ ବେଞ୍ଚ୍ କହିଛନ୍ତି।
