ହାଟଡିହି/ଛେନାପଦୀ,୨୭l୪(ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ସଂସ୍କୃତି ଅଧିକାରୀ ରମେଶ ଚନ୍ଦ୍ର ନାୟକ ସମସ୍ତ ବ୍ଲକକୁ ଅନୁଷ୍ଠିତ ‘ଲୋକ କଳା ପାଇଁ ଦିନଟିଏ’ କାର୍ଯ୍ୟକ୍ରମ ସମ୍ପର୍କିତ ରିପୋର୍ଟ ମାଗିଥିବା ପ୍ରକାଶ କରିଛନ୍ତି l ଅଧିକାରୀ ନାୟକ କହିଛନ୍ତି , ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ନିର୍ଦ୍ଦେଶ ଅନୁସାରେ ’ଲୋକ କଳା ପାଇଁ ଦିନଟିଏ’ କାର୍ଯ୍ୟକ୍ରମ ଆୟୋଜନ କରିବାକୁ ଜିଲାର ସମସ୍ତ ବ୍ଲକକୁ ଚିଠି ଦ୍ୱାରା ଅବଗତ କରାଇଥିଲୁ। ଉକ୍ତ କାର୍ଯ୍ୟକ୍ରମ ଆୟୋଜିତ କରିଥିବା ଅଳ୍ପ କେତକ ବ୍ଲକ ରିପୋର୍ଟ ପ୍ରଦାନ କରିଛନ୍ତି । କାର୍ଯ୍ୟକ୍ରମ ବାବଦରେ ବ୍ଲକ ତରଫରୁ ହୋଇଥିବା ଖର୍ଚ୍ଚ ବିଲ ଦାଖଲ କରିବା ପରେ ତାହା ଭରଣା କରାଯାଇଥାନ୍ତା । ଯେଉଁ ବ୍ଲକ ଏହି କାର୍ଯ୍ୟକ୍ରମ କରିନାହାଁନ୍ତି ସେମାନଙ୍କୁ କାରଣ ଦର୍ଶାଅ ଚିଠି ଜାରି କରାଯିବ ।
ସୂଚନା ଯୋଗ୍ୟ, ଅନୁଦାନ ଅଭାବରୁ ଆନନ୍ଦପୁର ଉପଖଣ୍ଡ ହାଟଡିହୀ, ଆନନ୍ଦପୁର, ଘସିପୁରା ବ୍ଲକରେ ’ଲୋକ କଳା ପାଇଁ ଦିନଟିଏ’ କାର୍ଯ୍ୟକ୍ରମ ଅନୁଷ୍ଠିତ ହୋଇନଥିଲା। ଜିଲାପାଳଙ୍କ କାର୍ଯ୍ୟାଳୟ ତରଫରୁ ୨୫ ମାର୍ଚ୍ଚ ୨୦୨୬ରେ ବିଭିନ୍ନ ବ୍ଲକକୁ ଜାରି ହୋଇଥିବା ଚିଠି ଅନୁସାରେ ଉକ୍ତ କାର୍ଯ୍ୟକ୍ରମରେ ପ୍ରତିଷ୍ଠିତ ପାରମ୍ପରିକ କଳାକାରମାନଙ୍କୁ ସମ୍ମାନିତ ଏବଂ ସମ୍ବର୍ଦ୍ଧନା କରାଯିବା ସହ ପ୍ରତିଷ୍ଠିତ ଲୋକ କଳାର ପ୍ରଚାର ପ୍ରସାର କରିବା ମୁଖ୍ୟ ଲକ୍ଷ୍ୟ ଥିଲା ବୋଲି ଦର୍ଶାଯାଇଥିଲା । ଏଥିସହ ଉକ୍ତ କାର୍ଯ୍ୟକ୍ରମର ସମସ୍ତ ଦସ୍ତାବିଜ ଓଡ଼ିଆ ପକ୍ଷ -୨୦୨୬ ପାଇଁ ଉର୍ଦ୍ଦିଷ୍ଟ ୱେବସାଇଟରେ ସ୍ଥାନିତ କରିବାକୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଶାସନ ସଚିବ ବିଜୟ କେତନ ଉପାଧ୍ୟାୟ ୨୩ ଫେବୃୟାରୀ ୨୦୨୬ ରେ ସମସ୍ତ ଜିଲା ସଂସ୍କୃତି ଅଧିକାରୀ ମାନଙ୍କୁ ଜାରି କରିଥିବା ଚିଠିରେ ଉଲ୍ଲେଖ କରିଥିଲେ ।