ଭୁବନେଶ୍ୱର,୨୮।୭(ବ୍ୟୁରୋ): ସହରକୁ ସ୍ବଚ୍ଛ ସୁନ୍ଦର କରି ଗଢ଼ିତୋଳିବା ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ତପତ୍ରତା ପ୍ରକାଶ ପାଇଛି। ବିଶେଷକରି ବ୍ୟବସାୟ ସ୍ଥଳରେ ସ୍ବଚ୍ଛତାରେ ଖିଲାପ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି ବିଏମ୍ସି। ଲଗାତାର ସହରର ବିଭିନ୍ନ ଦୋକାନ, ମଲ୍, ଫୁଡ୍ ଷ୍ଟଲକୁ ବିଏମ୍ସି ପକ୍ଷରୁ ସିଲ୍ କରାଯାଉଛି। ଏହି କ୍ରମରେ ବୁଧବାର ପଟିଆ ଅଞ୍ଚଳରେ ଥିବା ଶୋ’ରୁମ୍ ‘ପିଟର ଇଂଲଣ୍ଡ’ ସିଲ୍ କରାଯାଇଛି। ଶୋ’ରୁମର ୫ ମିଟର ପରିମିତ ଅଞ୍ଚଳରେ ପରିଚ୍ଛନ୍ନତା ଅଭାବରୁ ଏପରି ପଦକ୍ଷେପ ନିଆଯାଇଛି। ତେବେ ସମ୍ପୃକ୍ତ ଅଞ୍ଚଳ ତୁରନ୍ତ ସଫେଇ କରିବା ସହ ଆଗାମୀ ଦିନରେ ସ୍ବଚ୍ଛତା ବଜାୟ ରଖିବା ପାଇଁ ଏହି ବ୍ୟବସାୟିକ ପ୍ରତିଷ୍ଠାନକୁ ବିଏମ୍ସି ପକ୍ଷରୁ ତାଗିଦା କରାଯାଇଛି। ଏଥିସହ କାନ୍ଥବାଡ଼, ଇଲେକ୍ଟ୍ରି ପୋଲ, ଗଛ ଆଦିରେ ପୋଷ୍ଟର ଲଗାଇବାକୁ ବାରଣ କରାଯାଇଛି। ଏହି କ୍ରମରେ ୬ ନଂ. ଓ ୭ନଂ. ୱାର୍ଡରୁ ସଫେଇକର୍ମୀ ପୋଷ୍ଟର କାଢ଼ିଦେଇଛନ୍ତି। ସେହିପରି କାନ୍ଥରେ କିମ୍ବା ଗଛରେ ପୋଷ୍ଟର ଲଗାଇଲେ ଭାରି ଜରିମାନା ଦେବାକୁ ପଡ଼ିବ ବୋଲି ବିଏମ୍ସି ପକ୍ଷରୁ ଚେତାବନୀ ଦିଆଯାଇଛି। ଏହା ବ୍ୟତୀତ ବେଆଇନ ଭାବେ ଏଣେତେଣେ ହୋର୍ଡିଂ ଲଗାଇବାକୁ ମଧ୍ୟ ବାରଣ ହୋଇଛି। ଜନପଥରେ ନୀଳାଚଳ ହସ୍ପିଟାଲ ପକ୍ଷରୁ ଲଗାଯାଇଥିବା ସାଇନ ବୋର୍ଡ଼କୁ ବିଏମ୍ସି ପକ୍ଷରୁ କଢାଯାଇଛି।
ସୂଚନାନୁଯାୟୀ, ମଙ୍ଗଳବାର ଉକତ୍ଳ କନିକା ଗ୍ୟାଲେରିଆରେ ଚଢ଼ାଉ କରାଯିବା ସହ ୩ଟି ଦୋକାନ ସିଲ୍ କରାଯାଇଥିଲା। ସେହିପରି ନିଗମାଞ୍ଚଳର ଉତ୍ତର ଜୋନ୍ର ୬ଟି ଷ୍ଟୋର ବିଏମ୍ସି ସିଲ୍ କରିଥିଲା। ଧ୍ରୁତିଶ୍ରୀ ଏଣ୍ଟରପ୍ରାଇଜେସ୍ ପଞ୍ଚମୁଖୀ ଭେରାଇଟି ଷ୍ଟୋର, ଲ୍ୟାଣ୍ଡମାର୍କ କମ୍ୟୁନିକେଶନ, ଜୁସ୍ ସେଣ୍ଟର, ଜି ମାର୍ଟ ଭେରାଇଟି ଷ୍ଟୋର ଓ ତାରିଣୀ ଭେରାଇଟି ଷ୍ଟୋରକୁ ପରିମଳରେ ଖିଲାପ କାରଣରୁ ସିଲ୍ କରାଯାଇଛି। ଏହାବ୍ୟତୀତ ସହରର ବିଭିନ୍ନ କାନ୍ଥରେ ଲଗାଯାଇଥିବା ବିଜ୍ଞାପନ ପୋଷ୍ଟରର ସଫେଇ କାର୍ଯ୍ୟ ମଧ୍ୟ ହାତକୁ ନିଆଯାଇଛି।
