ଜେନେଭା,୧୬ ।୧୦: ଆମେରିକା କମ୍ପାନୀ ଗିଲିଏଡର ରେମଡେସିଭିର ଔଷଧ କରୋନା ସଂକ୍ରମିତଙ୍କ ଜୀବନ ବଞ୍ଚାଇବାରେ ଅସଫଳ ହୋଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନ(ଡବ୍ଲୁଏଚ୍ଓ) ନିକଟରେ ଏକ କ୍ଲିନିକାଲ ଟେଷ୍ଟରେ ପାଇଥିବା ତଥ୍ୟ ଅନୁଯାୟୀ, କରୋନା ସଂକ୍ରମିତଙ୍କ ଚିକିତ୍ସା କରିବା ଅବା ସେମାନଙ୍କର ଜୀବନ ବଞ୍ଚାଇବାରେ ରେମଡେସିଭିର ଆଦୌ ସଫଳ ନୁହେଁ କହିଲେ ଚଳେ । କରୋନା ସଂକ୍ରମଣ ଆରମ୍ଭରେ ପ୍ରଥମେ ଏହି ଆଣ୍ଟି ଭାଇରାଲ ମେଡିସିନର ବ୍ୟବହାର କରାଯାଇଥିଲା । ନିକଟରେ କରୋନାରେ ସଂକ୍ରମିତ ହୋଇଥିବା ଆମେରିକା ରାଷ୍ଟ୍ରପତିଙ୍କ ଚିକିତ୍ସାରେ ମଧ୍ୟ ଏହାକୁ ବ୍ୟବହାର କରାଯାଇଥିଲା । ନିକଟରେ ବିଶ୍ୱ ସ୍ୱାସ୍ଥ୍ୟ ସଂଗଠନ ୪ଟି ସମ୍ଭାବିତ ଔଷଧ ବ୍ୟବସ୍ଥାକୁ ନେଇ ପରୀକ୍ଷଣ କରିଥିଲା । ଯେଉଁଥିରେ ରେମଡିସିଭିର, ହାଇଡ୍ରୋକ୍ଲୋରୋକୁଇନ୍, ଆଣ୍ଟି ଏଚ୍ଆଇଭି ଡ୍ରଗ୍ କମ୍ବିନେଶନ ଲୋପିନାଭିର-ରିଟୋନାଭିର ଓ ଇଣ୍ଟରଫୋରନ ସାମିଲ ହୋଇଥିଲା । ଏହି ପରୀକ୍ଷଣରେ ୩୦ ଦେଶର ପାଖାପାଖି ୧୧,୨୬୬ ବୟସ୍କ ରୋଗୀଙ୍କୁ ସାମିଲ କରାଯାଇଥିଲା । ଏଥିରୁ ଜଣାପଡିଥିଲା ଯେ ଯେଉଁମାନେ କରୋନାରେ ପୀଡ଼ିତ ହୋଇ ଲମ୍ବା ସମୟ ପର୍ଯ୍ୟନ୍ତ ହସ୍ପିଟାଲରେ ଚିକିତ୍ସିତ ହେଉଛନ୍ତି ସେମାନଙ୍କଠାରେ ଏହି ଔଷଧ କିଛି କାମ କରୁନାହିଁ । ସୂଚନାଯୋଗ୍ୟ, ମେ’ ୧ରେ ଆମେରିକାର ଫୁଡ ଆଣ୍ଡ ଡ୍ରଗ୍ସ ପ୍ରଶାସନ ରେମଡେସିଭିରକୁ ଆମେରିକା ଜରୁରୀ ପରିସ୍ଥିତିରେ ବ୍ୟବହାର କରିବାକୁ ମଞ୍ଜରୀ ପ୍ରଦାନ କରିଥିଲା । ଏହାପରେ କିଛି ଦେଶ ଏହାକୁ ବ୍ୟବହାର କରୁଥିଲେ ।
