ପାରାଦୀପ,୧୬ା୧୦(ସ୍ବ.ପ୍ର.): ପାରାଦୀପ ବନ୍ଦର ଭିତ୍ତିକ ଶିଳ୍ପ ନଗରୀରେ କିଛି ଦିନ ହେଲା ଭିନ୍ନ ଦୃଶ୍ୟ ଦେଖିବାକୁ ମିଳୁଛି। ବନ୍ଦର ଓ ଶିଳ୍ପସଂସ୍ଥାରେ ପଣ୍ୟ ପରିବହନ କରୁଥିବା ପ୍ରାୟ ୨୦ ହଜାରରୁ ଅଧିକ ଭାରିଯାନର ଖଲାସୀ ଆଶ୍ରୟ ନେବା ପାଇଁ ହୀନସ୍ତା ହେଉଛନ୍ତି। ଏପରି କି ପାରାଦୀପର ମୁଖ୍ୟ ପ୍ରବେଶ ପଥ ଅଠରବାଙ୍କୀର ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ସ୍ଥଳ ଖୋଲା ଆକାଶ ତଳେ ପ୍ରତ୍ୟେକ ରାତିରେ ଶତାଧିକ ଖଲାସୀ ଶୋଇବା ପାଇଁ ବାଧ୍ୟ ହେଉଛନ୍ତି। ଏପରି ହେବା ପଛରେ ବନ୍ଦର ପ୍ରଶାସନର ପରିବର୍ତ୍ତିତ ବ୍ୟବସ୍ଥା ବୋଲି କୁହାଯାଉଛି।
ସୂଚନା ମୁତାବକ, ବନ୍ଦର ନିଷିଦ୍ଧାଞ୍ଚଳକୁ ପ୍ରତିଦିନ ୨ରୁ ଅଢ଼େଇ ହଜାର ଟ୍ରକ୍ ପଣ୍ୟ ନେଇ ପ୍ରବେଶ ଓ ପ୍ରସ୍ଥାନ କରିଥାନ୍ତି। ପ୍ରତି ଟ୍ରକ୍ରେ ଜଣେ ଚାଳକ ଓ ଜଣେ ଖଲାସୀ ଥାଆନ୍ତି। ସେମାନଙ୍କ ପାଇଁ ଗେଟ ପାସ୍ କରିବା ଏବଂ ବନ୍ଦର ନିଷିଦ୍ଧାଞ୍ଚଳରେ ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି ଗୋଟିଏ ଗାଡ଼ିରେ କେବଳ ଜଣେ ଚାଳକଙ୍କୁ ଯାତାୟାତ କରିବାକୁ ନିୟମ ରହିଛି। ଫଳରେ ଖଣି ଅଞ୍ଚଳରୁ ଗାଡ଼ିରେ ଆସିଥିବା ଖଲାସୀ ଅଠରବାଙ୍କୀଠାରେ ରହିଥାନ୍ତି। ଗାଡି ପଣ୍ୟ ଖଲାସ କିମ୍ବା ବୋଝେଇ କରି ବନ୍ଦରରୁ ବାହାରିବା ପରେ ପୁଣି ସେମାନେ ଯାଇଥାନ୍ତି। ବନ୍ଦର ଭିତରୁ ବାହାରିବା ପାଇଁ ଗୋଟିଏ ଗାଡିକୁ ଅନ୍ୟୁନ ୪ରୁ ୮ଘଣ୍ଟା ସମୟ ଲାଗିଥାଏ। ସେତିକି ସମୟ ପାଇଁ ଖଲାସୀମାନେ ଅଠରବାଙ୍କି ଗୋଲେଇ ଛକ ଚତୁପାଶର୍ବରେ ଥିବା ଫୁଟପାଥ ଓ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ମଣ୍ଡପରେ ଶୋଇପଡନ୍ତି ବୋଲି ମନୋଜ ନାୟକ ନାମକ ଟ୍ରକ ମାଲିକ କୁହନ୍ତି। ଏମିତି ଶୋଇବା ବେଳେ ପ୍ରତିରାତିରେ କେତେକ ଲୁଟେରା ସେମାନଙ୍କଠାରୁ ମୋବାଇଲ ଓ ଟଙ୍କା ଚୋରି କରୁଛନ୍ତି ବୋଲି ଖଲାସୀ କିଟୁ ମଜୁମ୍ଦାର ଅଭିଯୋଗ କରିଛନ୍ତି। ଏଭଳି ଖଲାସୀଙ୍କ ଅସୁବିଧା ସମ୍ପର୍କରେ ୩ଟି ଟ୍ରକ ମାଲିକ ସଂଘକୁ ନେଇ ଗଠିତ ଜେସିସି (ଜଏଣ୍ଟ କୋଅର୍ଡିନେଶନ କମିଟି)ର ବରିଷ୍ଠ କର୍ମକର୍ତ୍ତା ପ୍ରକାଶ କୁମାର ଜେନା କହଛନ୍ତି, ଆମ୍ଭେ ଏକ ଆଶ୍ରୟ କେନ୍ଦ୍ର ପାଇଁ ବନ୍ଦର କର୍ତ୍ତୃପକ୍ଷଙ୍କ ସହିତ ଆଲୋଚନା କରିଛୁ। ଖୁବଶୀଘ୍ର ଏହି କେନ୍ଦ୍ର କରିବା ପାଇଁ ସହମତି ମିଳିଛି। ଏହା ନିର୍ମାଣ ହେଲେ ସେମାନେ ଭଲରେ ବିଶ୍ରାମ ନେଇପାରିବେ।
