ଦକ୍ଷିଣ ଭାରତୀୟ ସିନେମାରେ ରଜନୀକାନ୍ତ କେତେ ଲୋକପ୍ରିୟ ତାହା କହିବା ଅନାବଶ୍ୟକ। ତାଙ୍କ ଅଭିନୀତ ଫିଲ୍ମ ଶୁଟିଂ ଆରମ୍ଭ ହେବା ସମୟରୁ ହିଁ ଆଲୋଚନାର ପରିସରକୁ ଆସିଥାଏ। ଏବେ ପୁଣି ଥରେ ଚର୍ଚ୍ଚାର କେନ୍ଦ୍ର ବିନ୍ଦୁ ସାଜିଛନ୍ତି ଏହି ବରିଷ୍ଠ ତଥା ବର୍ଷୀୟାନ ଅଭିନେତା। ଶୁଟିଂ ଚାଲିଥିବା ତାମିଲ ଫିଲ୍ମ ‘ଲାଲ୍ ସଲାମ’ରେ ସେ ଅଭିନୟ କରୁଛନ୍ତି। ଏଥିରେ ତାଙ୍କର ଚରିତ୍ରଟି ହେଲା ମୋଇଦିନ୍ ଭାଇ। ସବୁଠାରୁ ଖାସ୍ କଥା ହେଲା ଭାରତୀୟ କ୍ରିକେଟ ଜଗତର ଆଇକନ୍ କପିଳ ଦେବ ଏଥିରେ ଏକ ଗେଷ୍ଟ ରୋଲ୍ରେ ଦେଖାଦେବେ। ତେଣୁ ଏହି ଯୋଡିକୁ ନେଇ ଏବେଠାରୁ ଚର୍ଚ୍ଚା ଆରମ୍ଭ ହେଲାଣି। ଏହି ଫିଲ୍ମର ଅନ୍ୟାନ୍ୟ ଭୂମିକାରେ ବିଷ୍ଣୁ ବିଶାଲ, ବିକ୍ରାନ୍ତ, ଜୀଭିତା, ଥାମ୍ଭି ରାମିୟା ପ୍ରମୁଖ କଳାକାର ଅଭିନୟ କରୁଛନ୍ତି। ଏହାର ଚିତ୍ରନାଟ୍ୟ ରଚନା କରିବା ସହ ନିର୍ଦ୍ଦେଶନା ଦେଉଛନ୍ତି ରଜନୀକାନ୍ତଙ୍କ ଝିଅ ଐଶ୍ୱର୍ଯ୍ୟା ଧନୁଷ। ଚିତ୍ରଟିକୁ ପ୍ରଯୋଜନା କରିଛନ୍ତି ଏ. ଶଙ୍କରନ୍। ଗୀତଗୁଡିକୁ ସ୍ବରରେ ସଜାଇଛନ୍ତି ବିଶିଷ୍ଟ ସ୍ବର ସଂଯୋଜକ ଏ.ଆର. ରେହମନ୍।
