ପ୍ୟାରିସ୍, ୧୨ା୬: କ୍ଲେ କୋର୍ଟ ଟେନିସ୍ ଫ୍ରେଞ୍ଚ୍ ଓପନ୍ ଜିତିବା ସହିତ କ୍ୟାରିୟରର ୨୩ ତମ ଗ୍ରାଣ୍ଡସ୍ଲାମ ବିଜୟୀ ହୋଇଛନ୍ତି ସର୍ବିୟାର ନୋଭାକ୍ ଜୋକୋଭିଚ୍। ରବିବାର ଅନୁଷ୍ଠିତ ଫାଇନାଲରେ ନରଓ୍ବେରେ କାସ୍ପର ରୁଡ୍ଙ୍କୁ ୭-୬(୭-୧), ୬-୩ ଓ ୭-୫ ସେଟ୍ରେ ପରାସ୍ତ କରିବା ସହ ସେ ରାଫେଲ ନାଡାଲଙ୍କ ୨୨ତମ ଗ୍ରାଣ୍ଡସ୍ଲାମ ରେକର୍ଡକୁ ଭାଙ୍ଗିଛନ୍ତି। ଚଳିତ ଟୁର୍ନାମେଣ୍ଟରେ କ୍ଲେ କୋର୍ଟ କିଙ୍ଗ୍ ରାଫେଲ ନାଡାଲ ଅଂଶଗ୍ରହଣ କରୁ ନ ଥିବାବେଳେ ବିଶ୍ୱ ମାନ୍ୟତାର ୩ ନମ୍ବର ଖେଳାଳି ଜୋକୋଭିଚ୍ ଫେଭରିଟ୍ ଥିଲେ। କାରେନ୍ ଖାଚାନୋଭ ଓ କାର୍ଲୋସ୍ ଅଲକାରାଜଙ୍କ ବିପକ୍ଷ ମ୍ୟାଚ୍କୁ ବାଦ୍ ଦେଲେ ଅନ୍ୟ ମ୍ୟାଚ୍ରେ ସେ ଗୋଟିଏ ବି ସେଟ୍ ହାରି ନ ଥିଲେ। ଏହାସହିତ ନିଜ କ୍ୟାରିୟରର ତୃତୀୟ ଫ୍ରେଞ୍ଚ୍ ଓପନ ଟାଇଟଲ ହାସଲ କରିଛନ୍ତି ଜୋକୋଭିଚ୍। ୨୩ତମ ଗ୍ରାଣ୍ଡସ୍ଲାମ ମଧ୍ୟରେ ଜୋକୋଭିଚ୍ ୩ଥର ଲେଖାଏ ୟୁଏସ୍ ଓପନ ଓ ଫ୍ରେଞ୍ଚ୍ ଓପନ ବିଜୟୀ ହୋଇଥିବା ବେଳେ ୭ଥର ଓ୍ବିମ୍ବେଲଡନ୍ ଓ ୧୦ଥର ଅଷ୍ଟ୍ରେଲିଆନ୍ ଓପନ ଜିତିଛନ୍ତି। ବିଶ୍ୱ ମାନ୍ୟତାର ୪ ନମ୍ବର ସ୍ଥାନରେ ଥିବା ରୁଡ୍ଙ୍କ ବିପକ୍ଷରେ ସକାରାତ୍ମକ ଆରମ୍ଭ କରିଥିଲେ। ପ୍ରଥମରୁ ହିଁ ସେ ପ୍ରଭାବ ବିସ୍ତାର କରି ଖେଳି ୨-୦ରେ ଆଗୁଆ ରହିଥିଲେ। ତେବେ ରୁଡ୍ ପ୍ରତ୍ୟାବର୍ତ୍ତନ କରିବା ସହିତ ଏହି ସେଟ୍ଟି ଟାଇବ୍ରେକରରେ ଫଇସଲା ହୋଇଥିଲା। ଟାଇବ୍ରେକରରେ ଜୋକୋଭିଚ୍ ୭-୧ରେ ଜିତିଥିଲେ। ଦ୍ୱିତୀୟ ସେଟ୍ରେ ଜୋକୋଭିଚ୍ଙ୍କ ଟେକ୍ନିକ୍ ସମ୍ମୁଖରେ ଅସହାୟ ମନେ ହୋଇଥିଲେ ରୁଡ୍। ତୃତୀୟ ସେଟ୍ରେ ରୁଡ୍ ସାମାନ୍ୟ ସଂଘର୍ଷ କରିଥିଲେ ମଧ୍ୟ ଜୋକୋଭିଚ୍ ୭-୫ରେ ଏହାକୁ ଜିତିନେଇ ରୋଲାଣ୍ଡ ଗ୍ୟାରସ୍ରେ ରାଫେଲ ନାଡାଲଙ୍କୁ ପଛରେ ପକାଇଥିଲେ। ପୁରୁଷ ଖେଳାଳିଙ୍କ ମଧ୍ୟରେ ଜୋକୋଭିଚ୍ ଓ ମହିଳା ଖେଳାଳିଙ୍କ ମଧ୍ୟରେ ସେରେନା ଓ୍ବିଲିୟମ୍ସ ୨୩ଟି ଲେଖାଏ ଗ୍ରାଣ୍ଡସ୍ଲାମ ହାସଲ ରେକର୍ଡ ନିଜ ନାମରେ ରଖିଛନ୍ତି।
