ନୂଆଦିଲ୍ଲୀ,୨୧।୧୦: ଚଳିତ ବର୍ଷ ଦୀପାବଳିରେ ସାରା ଦେଶର ବଜାରରେ ରେକର୍ଡ ବ୍ୟବସାୟ ହୋଇଛି। କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (CAIT) ର ରିପୋର୍ଟ ଅନୁଯାୟୀ, ଦୀପାବଳିରେ ମୋଟ ୬.୦୫ ଲକ୍ଷ କୋଟି ଟଙ୍କାର କାରବାର ହୋଇଛି, ଯାହା ଏପର୍ଯ୍ୟନ୍ତ ସବୁଠାରୁ ଅଧିକ।
ଏହି ସମୟରେ, ‘ଭୋକାଲ୍ ଫର୍ ଲୋକାଲ୍’ ଏବଂ ‘ସ୍ୱଦେଶୀ ଦୀପାବଳି’ ଅଭିଯାନର ପ୍ରଭାବ ଦେଖିବାକୁ ମିଳିଛି। ରିପୋର୍ଟ ଅନୁସାରେ, ୮୭ ପ୍ରତିଶତ ଗ୍ରାହକ ବିଦେଶୀ ସାମଗ୍ରୀ ବଦଳରେ ଭାରତୀୟ ଉତ୍ପାଦକୁ କିଣିବାକୁ ପ୍ରାଥମିକତା ଦେଇଛନ୍ତି।
ଗତ ବର୍ଷ ତୁଳନାରେ ଏଥର ବ୍ୟବସାୟରେ ୨୫% ବୃଦ୍ଧି ଘଟିଛି। ଦେଶୀ ସାମଗ୍ରୀର ଚାହିଦା ବଢ଼ିଥିବାରୁ ଚାଇନା ସାମଗ୍ରୀର ଚାହିଦା କମିଛି। ବ୍ୟବସାୟରେ ୫.୪୦ ଲକ୍ଷ କୋଟି ଟଙ୍କାର ବସ୍ତୁ ବ୍ୟାପାର ଓ ୬୫,୦୦୦ କୋଟି ଟଙ୍କାର ସେବା ବ୍ୟାପାର ସାମିଲ୍ ଅଛି। ଏହି ସମୟରେ ଗ୍ରୋସରୀ, ସୁନା-ରୂପା, ଇଲେକ୍ଟ୍ରୋନିକ୍ସ, ପୋଷାକ ଓ ଉପହାର ସାମଗ୍ରୀର ଚାହିଦା ଅଧିକ ଥିଲା।
CAIT ର କହିବାନୁଯାୟୀ, ଦୀପାବଳି ବ୍ୟବସାୟରୁ ପ୍ରାୟ ୫୦ ଲକ୍ଷ ଅସ୍ଥାୟୀ ନିଯୁକ୍ତି ସୃଷ୍ଟି ହୋଇଛି। ଏହି ରେକର୍ଡ ବ୍ୟବସାୟ ଭାରତୀୟ ଅର୍ଥନୀତି ପ୍ରତି ବଢ଼ୁଥିବା ଆତ୍ମବିଶ୍ୱାସକୁ ଦର୍ଶାଉଛି।
