ରାଞ୍ଚି, ୩୦।୭: ରାଜସ୍ଥାନରେ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ଙ୍କ ସରକାରରେ ବିଦ୍ରୋହ ହେବା ପରେ ଏବେ ଝାଡ଼ଖଣ୍ଡରେ ମଧ୍ୟ ସମାନ ସ୍ଥିତି ସୃଷ୍ଟି ହୋଇଛି। ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କ ସରକାରଙ୍କୁ ସମର୍ଥନ ଦେଉଥିବା କଂଗ୍ରେସ ଦଳର ୯ ଜଣ ବିଧାୟକ ବିଦ୍ରୋହ କରିଛନ୍ତି। ଅସନ୍ତୁଷ୍ଟ ବିଧାୟକଙ୍କୁ ମନେଇବା ପାଇଁ ପ୍ରୟାସ ଜାରି ରହିଛି। ଇତିମଧ୍ୟରେ ବିଧାୟକଙ୍କ ଅଭିଯୋଗ କଂଗ୍ରେସ ହାଇକମାଣ୍ଡଙ୍କ ପାଖରେ ପହଞ୍ଚିଛି। ମେଣ୍ଟ ସରକାରରେ ହେମନ୍ତଙ୍କ କାର୍ଯ୍ୟ ଶୈଳୀ ଅସନ୍ତୁଷ୍ଟଙ୍କୁ ପସନ୍ଦ ଆସୁ ନ ଥିବା ଅଭିଯୋଗ ହୋଇଛି। ବିଧାୟକମାନେ ରାଜ୍ୟ କଂଗ୍ରେସ ମୁଖ୍ୟ ଆର୍ .ପିି. ସିଂଙ୍କ ଉପରେ ମଧ୍ୟ କ୍ଷୁବ୍ଧ ଥିବା କୁହାଯାଉଛି। ରାଜ୍ୟସଭା ଏମ୍ପି ଧୀରଜ ପ୍ରସାଦ ସାହୁଙ୍କ ନେତୃତ୍ୱରେ ଅସନ୍ତୁଷ୍ଟ ବିଧାୟକ ଦିଲ୍ଲୀ ଯାଇଥିଲେ। ସେମାନେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ରାଜନୈତିକ ପରାମର୍ଶଦାତା ଅହମ୍ମଦ ପଟେଲ ଏବଂ ଗୁଲାମନବୀ ଆଜାଦ୍ଙ୍କୁ ଭେଟି ରାଜ୍ୟକୁ ଫେରିଛନ୍ତି। ବିଧାୟକମାନେ କୌଣସି ସୂଚନା ନ ଦେଇ ନୀରବତା ଅବଲମ୍ବନ କରିଛନ୍ତି। ଝାଡ଼ଖଣ୍ଡର ୮୧ ବିଧାନସଭା ଆସନ ପାଇଁ ମ୍ୟାଜିକ୍ ନମ୍ବର ୪୨ ରହିଛି। ଏପରିସ୍ଥଳେ ହେମନ୍ତଙ୍କ ପାଖରେ ଜେଏମ୍ଏମ୍ର ୩୦, କଂଗ୍ରେସର ୧୬ ଏବଂ ଆରଜେଡିର ଜଣେ ବିଧାୟକ ଅଛନ୍ତି। ଫଳରେ ହେମନ୍ତଙ୍କୁ ୪୭ ବିଧାୟକଙ୍କ ସମର୍ଥନ ରହିଛି। ଅପରପକ୍ଷରେ ରାଜ୍ୟରେ ଭାଜପା ପାଖରେ ୨୫ ଜଣ ବିଧାୟକ ଅଛନ୍ତି। ମେଣ୍ଟ ସରକାରରେ ଅସ୍ଥିରତା ସୃଷ୍ଟି ପାଇଁ ଭାଜପା ଅପରେଶନ୍ ଲୋଟସ ଅଭିଯାନ ଲୁଚାଛପାରେ କରୁଥିବା ବିରୋଧୀ ଦଳ ପକ୍ଷରୁ ଅଭିଯୋଗ କରାଯାଇଛି।
