ଭୁବନେଶ୍ୱର,୫ା୬(ବ୍ୟୁରୋ): ବାଲେଶ୍ୱର ଜିଲାର ବାହାନଗା ଟ୍ରେନ ଦୁର୍ଘଟଣାରେ ୨୭୫ଜଣଙ୍କ ମୃତ୍ୟୁ ଘଟିଥିବା ରେଲଓ୍ବେ ଏବଂ ଓଡ଼ିଶା ସରକାରଙ୍କ ପକ୍ଷରୁ କୁହାଯାଇଛି। ତେବେ ଏହି ମୃତ୍ୟୁସଂଖ୍ୟାକୁ ନେଇ ପ୍ରଶ୍ନ ଉଠାଇଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ପ୍ରକୃତ ମୃତ୍ୟୁସଂଖ୍ୟା ଲୁଚାଯାଉଛି ବୋଲି ସେ ରବିବାର କୋଲକାତାରେ ଖବରଦାତା ସମ୍ମିଳନୀରେ କହିଛନ୍ତି। ସେ କହିଛନ୍ତି ଯେ, ଏହି ଟ୍ରେନ ଦୁର୍ଘଟଣାରେ ପଶ୍ଚିମବଙ୍ଗର ୬୨ଜଣଙ୍କ ମୃତ୍ୟୁ ଘଟିଥିବାବେଳେ ୫୬ଜଣ ଓଡ଼ିଶାର ବିଭିନ୍ନ ହସ୍ପିଟାଲରେ ଚିକିତ୍ସିତ ହୋଇ ଘରକୁ ଫେରିଛନ୍ତି। ଆଉ ୭୩ଜଣଓଡ଼ିଶାରେ ଚିକିତ୍ସିତ ହେଉଛନ୍ତି ଏବଂ
୧୮୨ ଜଣ ନିଖୋଜ ଅଛନ୍ତି। ନିଖୋଜଙ୍କ ବାବଦରେ କିଛି କୁହାଯାଉନାହିଁ କି ଖୋଜିବା ପାଇଁ କୌଣସି କାର୍ଯ୍ୟ କରାଯାଉନାହିଁ। ଦୁର୍ଘଟଣା ପଛରେ ରେଲଓ୍ବେର ଅବହେଳା ରହିଥିବାରୁ ତାହାକୁ ଘୋଡ଼ାଇବା ପାଇଁ ମୃତ୍ୟୁସଂଖ୍ୟାକୁ ଜାଣିଶୁଣି କମ୍ ଦର୍ଶାଯାଉଛି। ମମତା ଆହୁରି କହିଛନ୍ତି ଯେ, ସତ ପଦାକୁ ଆସୁ ବୋଲି ସେ ଚାହୁଁଛନ୍ତି, କାହାରି ଇସ୍ତଫା ମାଗୁନାହାନ୍ତି। ଗୋଟିଏ ଦିନରେ କ’ଣ ତଦନ୍ତ ଶେଷ ହୋଇଗଲା। ଏତେବଡ଼ ଦୁର୍ଘଟଣା ପରେ ବି ଘଟଣାସ୍ଥଳକୁ କେନ୍ଦ୍ରୀୟ ଟିମ୍ ସମେତ ମାନବାଧିକାର, ମହିଳା, ଶିଶୁ ଆଦି ଆୟୋଗର ଟିମ୍ ଯାଇଛି କି ବୋଲି ମମତା ପ୍ରଶ୍ନ କରିଛନ୍ତି।
