ବଇଣ୍ଡା, ୧୭ା୧୦: ହାତରେ ଅଛି ମୋବାଇଲ। ହେଲେ ଜରୁରୀ ବେଳେ କରିହେଉନି କଲ୍। ବିପର୍ଯ୍ୟୟ ପୂର୍ବରୁ ସରକାର ପଠାଉଥିବା ସତର୍କ ସୂଚନା ବି ପହଞ୍ଚୁନି ଲୋକଙ୍କ ନିକଟରେ। ସୋସିଆଲ ମିଡିଆ ତ ଦୂରର କଥା, ଖାଦ୍ୟ ସୁରକ୍ଷା ଯୋଜନାରେ ମିଳୁଥିବା ରାଶନ ସାମଗ୍ରୀ ଆଣିବାକୁ ପ୍ରଥମେ ଚଢ଼ିବାକୁ ପଡ଼ୁଛି ପାହାଡ଼। କାରଣ ପାହାଡ଼ ଉପରେ ହିଁ ପହଞ୍ଚ ହେଉଛି ନେଟ୍ଓ୍ବର୍କ। ଆଉ ସେଠାରେ ଆଧାର ଲିଙ୍କ୍ କରିବା ପରେ ଯାଇ ମିଳୁଛି ଚାଉଳ ଗଣ୍ଡେ। ଆଜିର ଡିଜିଟାଲ ଯୁଗରେ ଏପରି ପଛରେ ପଡ଼ିଛି ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡର ୪୨ ଗଁା। ଦୀର୍ଘବର୍ଷ ହେଲା ଅଭିଯୋଗ ହେଉଥିଲେ ବି ଉପଖଣ୍ଡର ୭ ପଞ୍ଚାୟତରେ ଥିବା ଏହି ଗଁାଗୁଡ଼ିକର ସମସ୍ୟା ସମାଧାନ କରିପାରିନାହାନ୍ତି ସରକାର।
ଆଠମଲ୍ଲିକ ଉପଖଣ୍ଡ କିଶୋରନଗର ବ୍ଲକର ୩ ପଞ୍ଚାୟତ ଜାମ୍ବୁନାଳି, ହଣ୍ଡପା ଓ କଣ୍ଟେଇକୋଳିଆ ପଞ୍ଚାୟତରେ ଥିବା ୧୭ଟି ଗ୍ରାମ ମୋବାଇଲ ସେବାରୁ ବଞ୍ଚିତ ରହିଛି। କୌଣସି କମ୍ପାନୀର ନେଟ୍ୱର୍କ ଏଠାରେ ଆସୁନାହିଁ। ଫଳରେ ସେବା ପାଇବାକୁ ଅନେକ ସମୟରେ ଲୋକଙ୍କୁ ପାହାଡ଼, ଗଛ ଉପରେ ଚଢ଼ିବାକୁ ପଡୁଛି। ହଣ୍ଡପା ପଞ୍ଚାୟତର ଖୋଲାରେଗେଡ଼ା, ବାଲିଆମ୍ବ, ନୂଆଁ ବାଲିଖମଣ, କଣ୍ଟେଇକୋଳିଆ ପଞ୍ଚାୟତର ଅଁଳାବେରେଣି, ବାଲିଖମଣ, ହିଞ୍ଜିରିଡା, ଗୁଣ୍ଡୁରିଝରଣ, ରାଜନପାଳ, ଲକ୍ଷ୍ମୀପ୍ରିୟାପୁର, ବାଲିଆମ୍ବ ଏବଂ ଜାମ୍ବୁନାଳି ପଞ୍ଚାୟତର ମଧପୁର, ଗୋଳାସର, ବାଦିବାହଳ, ଅଶ୍ରୁବାହଳ, ନାଗାଝରଣ, ଖଣ୍ଡବର, ଜାମ୍ବୁନାଳି ଆଦି ଗ୍ରାମବାସୀ ଦୀର୍ଘବର୍ଷ ଏହି ଏହି ସମସ୍ୟା ଦେଇ ଗତି କରୁଛନ୍ତି। ସେହିପରି ଆଠମଲ୍ଲିକ ବ୍ଲକର ସାପଘରା, କନ୍ତପଡା, ମଇମୁରା ଓ ଆମ୍ବସରମୁଣ୍ଡା ପଞ୍ଚାୟତର ୨୨ଟି ଗ୍ରାମରେ ମୋବାଇଲ ସେବା ନାହିଁ। ସାପଘରା ପଞ୍ଚାୟତର ଲକ୍ଷ୍ମୀପୁର, ଆମ୍ବନାଳୀ, ରାଇନାଳି, ହେମାମୁରା, ବତ୍ରାଖୋଳ, ସାଲୁଣି, କନ୍ତପଡା ପଞ୍ଚାୟତର ସୋମନାଥପୁର, ଗୋଲେଖପୁର, କେଞ୍ଚୁଆନାଳି, ରଇଡ଼ା, ଜାମୁକଣି, ମଇମୁରା ପଞ୍ଚାୟତର କଂସାବ, କୋରାବ, ମଇମୁରା, କୁତୁଲିସିଙ୍ଗା, ଧୋଡାଖୋଳ, ଗୋପପୁର, ରାମପୁର, ଝାଟିକିବାହାଳ, ଘଣାଯୋଡି, ଲବିଙ୍ଗ, ପିତାବଳୀବାହାଳ, ତରଣ୍ଡା, ବିପ୍ରଡିହ, ଆମ୍ବସରମୁଣ୍ଡା ପଞ୍ଚାୟତର ପୋଡାପଦର, ଆଡେଶ୍ୱର, ଗିରିଦା ଗ୍ରାମରେ ନେଟ୍ଓ୍ବର୍କ ଆସୁନାହିଁ। ଫଳରେ ଏହି ଅଞ୍ଚଳବାସୀ କୌଣସି ସରକାରୀ ଯୋଜନା ସମ୍ପର୍କରେ ସୂଚନା ପାଇପାରୁ ନାହାନ୍ତି। ଜଙ୍ଗଲ ଅଧ୍ୟୁଷିତ ଅଞ୍ଚଳରେ ଏହି ଗ୍ରାମଗୁଡିକ ଥିବାବେଳେ ଅନେକ ଶ୍ରମିକ ଅଛନ୍ତି। ସେମାନେ ଜବ୍କାର୍ଡରେ କାମ କରିଥିବା ବେଳେ ମଜୁରି ଟଙ୍କା ଆକାଉଣ୍ଟକୁ ଆସିଲା କି ନାହିଁ ତାହା ମେସେଜ ମାଧ୍ୟମରେ ଜାଣିପାରୁନାହାନ୍ତି। ଏଥିସହ ରାଶନ ସାମଗ୍ରୀ ଆଣିବାକୁ ହେଲେ ଲିଙ୍କ ନ ଥିବା ଯୋଗୁ ହିତାଧିକାରୀମାନେ ଡିଲରଙ୍କ ସହ ପାହାଡ ଉପରକୁ ଯାଇ ଯେଉଁଠି ଲିଙ୍କ ଆସୁଛି ସେଠାରେ ଆଧାର ଲିଙ୍କ କରିବା ପରେ ଚାଉଳ, ଗହମ ଆଣୁଛନ୍ତି। ଘରପୋଡ଼ି ବେଳେ ଅଗ୍ନିଶମ ବିଭାଗ ଓ ଗୁରୁତରଙ୍କୁ ମେଡିକାଲ ନେବାକୁ ଆମ୍ବୁଲାନ୍ସ ସହ ଯୋଗାଯୋଗ କରିପାରୁ ନାହାନ୍ତି। ୫୫ ନମ୍ବର ଜାତୀୟ ରାଜପଥରୁ ୧୫ କି.ମି. ଦୂରରେ ଗ୍ରାମଗୁଡିକ ଥିଲେ ମଧ୍ୟ ଏହି ସୁବିଧା ଯୋଗାଇ ଦିଆଯାଉନାହଁି। ଜାମ୍ବୁନାଳିଠାରେ ଏକ ମୋବାଇଲ ଟାୱାର ନିର୍ମାଣ କରି ସେବା ଯୋଗାଇ ଦେବା ପାଇଁ ଅଞ୍ଚଳବାସୀ ୧୨ ମେ ୨୦୧୭, ୨୫ ଜୁନ ୨୦୧୯ , ୨ ଜାନୁୟାରୀ ୨୦୨୨ ଓ ମଇମୁରା ଗ୍ରାମବାସୀ ୫ ମେ ୨୦୨୨ରେ ଦାବିପତ୍ର ଜିଲା ପ୍ରଶାସନ ଠାରୁ ଆରମ୍ଭ କରି କେନ୍ଦ୍ର ଟେଲିକମ ମନ୍ତ୍ରୀ, କେନ୍ଦ୍ର ପେଟ୍ରୋଲିୟମ ମନ୍ତ୍ରୀଙ୍କୁ ପ୍ରଦାନ କରିଥିଲେ ମଧ୍ୟ ପଦକ୍ଷେପ ନିଆଯାଉ ନ ଥିବା ଅଭିଯୋଗ କରିଛନ୍ତି।
ପରିକ୍ଷିତ ସାହୁ
