ବେଙ୍ଗାଲୁରୁ, ୧୨ା୩-ଆସନ୍ତା ଆଇପିଏଲ୍ ସଂସ୍କରଣ ପାଇଁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଶନିବାର ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଫାଫ୍ ଡୁ’ପ୍ଲେସିଙ୍କୁ ସେମାନଙ୍କ ନୂଆ ଅଧିନାୟକ ଭାବେ ନିଯୁକ୍ତି ଦେଇଛି। ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ରେ ଡୁ’ପ୍ଲେସି ଜଣେ ସ୍ଥିର ପ୍ରଦର୍ଶନକାରୀ ଖେଳାଳି ଥିଲେ। ଦଶନ୍ଧି ଧରି ଫ୍ରାଞ୍ଚାଇଜର ନେତୃତ୍ୱ ନେଇ ଆସୁଥିବା ବିରାଟ କୋହଲି ଏବେ ତାଙ୍କ ପଦରୁ ହଟିଯାଇଛନ୍ତି। ତାଙ୍କ ସ୍ଥାନରେ ଡୁ’ପ୍ଲେସି ପ୍ରଥମ ପସନ୍ଦ ଥିଲେ। ୩୭ ବର୍ଷୀୟ ଡୁ’ପ୍ଲେସି ଇତିମଧ୍ୟରେ ୧୦୦ ଆଇପିଏଲ ମ୍ୟାଚ୍ ଖେଳିସାରିଛନ୍ତି। ୧୩୧ରୁ ଅଧିକ ଷ୍ଟ୍ରାଇକ୍ ରେଟ୍ରେ ସେ ୨୯୩୫ ରନ ସ୍କୋର କରିଛନ୍ତି। ଗତବର୍ଷ ସିଏସ୍କେର ଆଇପିଏଲ୍ ବିଜୟ ଅଭିଯାନରେ ସେ ୬୩୩ ରନ ସଂଗ୍ରହ କରିଥିଲେ।
