ରାୟଗଡ଼ା ପୌର ପରିଷଦ ୫୨ବର୍ଷରେ ପଦାର୍ପଣ କରିଛି। ୧୯୭୧ ଜାନୁୟାରୀ ୧୫ରେ ରାୟଗଡ଼ା ପୌର ପରିଷଦ ଭାବେ ଘୋଷଣା ହୋଇଥିଲାା ହେଲେ ଦେଶ ସ୍ବାଧୀନ ହେବା ପୂର୍ବରୁ ୧୯୨୯ ଏପ୍ରିଲ ୧୦ରେ ରାୟଗଡ଼ା ୟୁନିୟନ ବୋର୍ଡ ଭାବେ ସହର ପରିଚାଳିତ ହେଉଥିଲା। ଦେଶ ସ୍ବାଧୀନତା ପାଇବା ପରେ ୧୧ଟି ରାଜସ୍ବ ଗ୍ରାମ ଯୋଡ଼ିହେବା ସହ ଜନସଂଖ୍ୟା ବୃଦ୍ଧି କାରଣରୁ ଅଞ୍ଚଳରେ ଉନ୍ନତମାନର ସେବା ପାଇଁ ୧୯୫୫ ମସିହା ମେ’ ୧୫ରେ ରାୟଗଡ଼ା ବିଜ୍ଞାପିତ ଅଞ୍ଚଳ ଭାବେ ଘୋଷଣା ହୋଇଥିଲା। ସ୍ବର୍ଗତ କୃଷ୍ଣଚନ୍ଦ୍ର ବକ୍ସିପାତ୍ର ରାୟଗଡ଼ା ପୌର ପରିଷଦର ଅଧ୍ୟକ୍ଷ ରହିଥିବା ସମୟରେ ରାୟଗଡ଼ା ସହରର ଏକ ରୋଡ୍ମ୍ୟାପ୍ ପ୍ରସ୍ତୁତ କରି ଏହାର ବିକାଶରେ ମୁଖ୍ୟ ଭୂମିକା ନେଇଥିଲେ। ରାୟଗଡ଼ା ସହରର ଗଳିକନ୍ଦିକୁ ରାସ୍ତା, ପାନୀୟ ଜଳ ଆଦିର ବ୍ୟବସ୍ଥା କରିବା ସହ ରାୟଗଡ଼ା ସହରର ଗଠନକୁ ମ୍ୟାପ୍ରେ ଏକ ସୁନ୍ଦର ସହର ଭାବେ ଗଢ଼ି ତୋଳିଥିଲେ। ତେଣୁ ତାଙ୍କୁ ରାୟଗଡ଼ା ସହରର ଆର୍କିଟେକ୍ଟ ବୋଲି ମଧ୍ୟ କୁହାଯାଏ। ସହରର ୧୧ଟି ରାଜସ୍ବ ଗ୍ରାମକୁ ନେଇ ଗଠିତ ରାୟଗଡ଼ା ପୌର ପରିଷଦ ୩ ଥର ଉନ୍ନତ ସହର ଭାବେ ପୁରସ୍କୃତ ହୋଇଛି।
ବର୍ତ୍ତମାନ ରାୟଗଡ଼ା ପୌର ପରିଷଦ ଅଧୀନରେ ୨୪ ୱାର୍ଡ ରହିଛି। ସହରର ପ୍ରତ୍ୟେକ ଗଳିକନ୍ଦି ଓ ଅଞ୍ଚଳକୁ ପକ୍କାରାସ୍ତା ମାଧ୍ୟମରେ ସଂଯୋଗୀକରଣ ରହିଛି। ରାୟଗଡ଼ା ପୌର ପରିଷଦ ମଧ୍ୟରେ ଜାତୀୟ ରାଜପଥ ଓ ରେଳପଥର ସୁବିଧା ରହିଛି। ସହର ପରିବେଶକୁ ନିର୍ମଳ ଓ ସ୍ବଚ୍ଛ ରଖିବା ପାଇଁ ପୌର ପରିଷଦ ପକ୍ଷରୁ ପ୍ରତିଦିନ ଅଳିଆ ଆବର୍ଜନା ଉଠାଯାଏ। ୨୦୧୧ ଜନଗଣନା ଅନୁସାରେ ପୌରାଞ୍ଚଳରେ ମୋଟ ୭୧,୨୦୮ ଜନସାଧାରଣ ବସବାସ କରୁଛନ୍ତି। ରାୟଗଡ଼ା ପୌର ପରିଷଦରେ ୧୧୭ ଜଣ କର୍ମଚାରୀ କାର୍ଯ୍ୟରତ ଥିବା ବେଳେ ୨୪ଟି ୱାର୍ଡର ସାନିଟାଇଜେଶନ କାର୍ଯ୍ୟକୁ ସୁଦୃଢ଼ ରଖିବା ନିମନ୍ତେ ସ୍ବଚ୍ଛ ସାଥୀ, ଜଳ ସାଥୀ ଆଦିର ବ୍ୟବସ୍ଥା କରାଯାଇଛି। ଜାଗା ମିଶନ ମାଧ୍ୟମରେ ବହୁ ହିତାଧିକାରୀଙ୍କୁ ରହିବା ପାଇଁ ପ୍ରମାଣପତ୍ର ଦିଆଯାଇଛି। ସହରର ୬୪ଟି ସ୍ଥାନରେ ବର୍ଷାଜଳ ସଂରକ୍ଷଣ ପାଇଁ ବ୍ୟବସ୍ଥା କରାଯାଇଛି। ୨୦୨୨-୨୩ ଆର୍ଥିକ ବର୍ଷରେ ୩୩ଟି ବିଭିନ୍ନ ଉନ୍ନୟନମୂଳକ କାର୍ଯ୍ୟ ମଧ୍ୟରୁ ୫ଟିର କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ ୨୮ଟିର କାମ ଚାଲୁରହିଛି। ସହରରେ ବିଭିନ୍ନ ବିବାହ, ବ୍ରତ ତଥା ସରକାରୀ କାର୍ଯ୍ୟକ୍ରମ ନିମନ୍ତେ ପୌର ପରିଷଦ ପକ୍ଷରୁ ଟାଉନହଲ୍, ଅଶୋକ କଲ୍ୟାଣମଣ୍ଡପ, ବିଜୁ କଲ୍ୟାଣମଣ୍ଡପ ରହିଥିବା ସହ ନୂତନ ଭାବେ ବିଜୁ ପଟ୍ଟନାୟକ ଅଡିଟୋରିୟମ ନିର୍ମାଣ ହୋଇଛି। ସହରର ଉନ୍ନତୀକରଣ ବିଷୟରେ ପୌର ନିର୍ବାହୀ ଅଧିକାରୀ ୟାସିର ବିଲାଲ ଅହମ୍ମଦଙ୍କୁ ପଚାରିବାରୁ ରାୟଗଡ଼ା ସହରରେ ନୂତନ ୩ଟି କଲ୍ୟାଣମଣ୍ଡପ ସାଇପ୍ରିୟା ନଗର, ଆମ୍ବାଗୁଡ଼ା ଓ ଅଣ୍ଟାରିଗୁଡ଼ା ଅଞ୍ଚଳରେ ନିର୍ମାଣ ପାଇଁ ପ୍ରସ୍ତାବ ରହିଛି ବୋଲି କହିଛନ୍ତି। ଏଥିସହିତ ବସ୍ଷ୍ଟାଣ୍ଡର ଉନ୍ନତୀକରଣ ପାଇଁ ୩ କୋଟି ୫୦ ଲକ୍ଷ ଟଙ୍କା ଅନୁଦାନ, ମୁକ୍ତା ଯୋଜନାରେ ୮ କୋଟି ୪୬ ଲକ୍ଷ ଟଙ୍କା, ସମସ୍ତ କଚ୍ଚାରାସ୍ତାକୁ ପକ୍କାରାସ୍ତା କରିବା ପାଇଁ ୧୯ କୋଟି ଟଙ୍କା ଅନୁଦାନ ମିଳିଛି ଏବଂ ସହରରେ ପାନୀୟ ଜଳଯୋଗାଣ ସୁବିଧା ପାଇଁ ୫୬ କୋଟି ଟଙ୍କା ବ୍ୟୟରେ କାର୍ଯ୍ୟ ଚାଲିଛି। ଏହା ଡିସେମ୍ବର ସୁଦ୍ଧା କାର୍ଯ୍ୟକ୍ଷମ ହେବ ବୋଲି ନିର୍ବାହୀ ଅଧିକାରୀ ୟାସିର ବିଲାଲ ସୂଚନା ଦେଇଛନ୍ତି। ଏଥିସହ ରାୟଗଡ଼ା ସହର ନିକଟସ୍ଥ ସାଇପ୍ରିୟା ନଗରର ୧୦ଟି ଲେନ୍କୁ ପୌର ପରିଷଦରେ ଅନ୍ତର୍ଭୁକ୍ତ କରିବା ନେଇ ଜିଲାପାଳଙ୍କୁ ପ୍ରସ୍ତାବ ଦେଇଥିବା ନିର୍ବାହୀ ଅଧିକାରୀ କହିଛନ୍ତି।
– ଆଶିଷ ରଞ୍ଜନ ପଣ୍ଡା, ରାୟଗଡ଼ା
