ରାୟଗଡ଼ା,୨୯ା୧(ଆଶିଷ ରଞ୍ଜନ ପଣ୍ଡା): ଜିଲା କଂଗ୍ରେସ ସଭାପତି ତଥା ରାୟଗଡ଼ା ବିଧାୟକ ଆପଲସ୍ବାମୀ କାଡ୍ରାକାଙ୍କ ସଭାପତିତ୍ୱରେ ଗଠନ ହୋଇଛି ନୂତନ ଜିଲା କଂଗ୍ରେସ କମିଟି। ଜିଲା ସଭାପତି ଆପଲସ୍ବାମୀ ବିଭିନ୍ନ ପଦପଦବୀ ପାଇଁ ନାମ ଚୟନ କରି ଏକ ତାଲିକା ପ୍ରଦେଶ କଂଗ୍ରେସ କମିଟିକୁ ପଠାଇଥିଲେ। ଯାହା ବୁଧବାର ଅନୁମୋଦିତ ହୋଇ ପ୍ରକାଶ ପାଇଛି। ପ୍ରଥମଥର ବିଧାୟକ ଭାବେ ନିର୍ବାଚିତ ହୋଇଥିବା ବେଳେ କଂଗ୍ରେସ ଦଳ ପକ୍ଷରୁ ଆପଲସ୍ବାମୀ କାଡ୍ରାକାଙ୍କୁ ଜିଲା ସଭାପତିର ଗୁରୁ ଦାୟିତ୍ୱ ପ୍ରଦାନ କରାଯାଇଛି। ଆଗାମୀ ପଞ୍ଚାୟତ ନିର୍ବାଚନକୁ ଦୃଷ୍ଟିରେ ରଖି ଆପଲସ୍ବାମୀ ଏକ ୧୦୩ ଜଣିଆ ଟିମ୍ ଗଠନ କରିଛନ୍ତି। ବର୍ତ୍ତମାନ ରାଜ୍ୟରେ ଭାଜପା ସରକାର ରହିଥିବା ବେଳେ ରାୟଗଡ଼ା ଜିଲାରେ ତିନୋଟି ବିଧାନସଭା ଆସନ କଂଗ୍ରେସ ଦଖଲରେ ରହିଛି। ତେବେ ପୂର୍ବରୁ ଜିଲାର ୨୨ଟି ଜିଲା ପରିଷଦ ଆସନ ମଧ୍ୟରୁ ୧୪ଟି ବିଜେ ଦଖଲରେ ରହିଥିବା କାରଣରୁ ଆଗାମୀ ପଞ୍ଚାୟତ ନିର୍ବାଚନରେ ସମସ୍ତ ଜିଲା ପରିଷଦ ଆସନ ଦଖଲ ସହିତ ପଞ୍ଚାୟତସମିତି ମଧ୍ୟ ଦଖଲ କରିବାକୁ ଦୃଷ୍ଟିରେ ରଖି ଏହି ଜିଲା ସଭାପତି କାଡ୍ରାକା ଏହି କମିଟି ଗଠନ କରିଥାଇପାରନ୍ତି ବୋଲି ରାଜନୈତିକ ସମୀକ୍ଷକମାନେ ମତ ପ୍ରକାଶ କରିଛନ୍ତି।
ଅନ୍ୟପଟେ ବିଷମକଟକ ବିଧାୟକ ନୀଳମାଧବ ହିକ୍କା ଏବଂ ଗୁଣପୁର ବିଧାୟକ ସତ୍ୟଜିତ ଗମାଙ୍ଗ ମଧ୍ୟ ଦଳକୁ ମଜଭୁତ କରିବାରେ ସମ୍ପୂର୍ଣ୍ଣ ସହଯୋଗ କରିବେ ବୋଲି ପ୍ରତିଶ୍ରୁତି ଦେଇଛନ୍ତି । ଏହି ଜିଲା କଂଗ୍ରେସ କମିଟିରେ ବରିଷ୍ଠ କଂଗ୍ରେସ ନେତା ତଥା ଜିଲା କଂଗ୍ରେସ ପୂର୍ବତନ ସଭାପତି ଦୁର୍ଗା ପ୍ରସାଦ ପଣ୍ଡାଙ୍କୁ ଉପଦେଷ୍ଟା ରଖାଯାଇଥିବା ବେଳେ ୭ ଜଣଙ୍କୁ ଉପସଭାପତି ଭାବେ ଚୟନ କରାଯାଇଛି । ବରିଷ୍ଠ କଂଗ୍ରେସ ନେତା ଶଙ୍କର୍ଷଣ ମଙ୍ଗରାଜ, ସୁନୀଲ ଚନ୍ଦ୍ର ପଣ୍ଡା, ଜଗନ୍ନାଥ ପଣ୍ଡା, ତରଣୀସେନ ଶତପଥୀ, ରାମକୃଷ୍ଣ ପାଣିଗ୍ରାହୀ, ଦାଶରଥି ନାୟକ ଓ ପଦ୍ମାବତୀ ମାଣ୍ଡାଙ୍ଗି ପ୍ରମୁଖ ଉପସଭାପତି ଭାବେ ଚୟନ ହୋଇଛନ୍ତି। ଏତଦବ୍ୟତୀତ ପାର୍ଥ ବର୍ଦ୍ଧନ ଓ ଆର.ହରିଶ ପଟ୍ଟନାୟକଙ୍କ ସମେତ ମୋଟ୍ ୧୭ଜଣ ସାଧାରଣ ସମ୍ପାଦକ ରହିଛନ୍ତି । ସେହିଭଳି ୪୫ଜଣ ଜିଲା ସମ୍ପାଦକ ରହିଛନ୍ତି । ଏହା ବ୍ୟତୀତ ସ୍ବତନ୍ତ୍ର ଆମନ୍ତ୍ରିତ ଓ କାର୍ଯ୍ୟକାରୀ ସଦସ୍ୟ ଭାବେ ପୂର୍ବତନ ମୁଖ୍ୟମନ୍ତ୍ରୀ ଡ.ଗିରିଧର ଗମାଙ୍ଗ, ଏମ୍ପି ସପ୍ତଗିରି ଶଙ୍କର ଉଲାକା, ଦୁଇ ବିଧାୟକ ନୀଳମାଧବ ହିକ୍କା ଓ ସତ୍ୟଜିତ ଗମାଙ୍ଗଙ୍କ ସମେତ ୩୩ ଜଣ ବରିଷ୍ଠ ଓ ଆଗଧାଡ଼ି ନେତା ରହିଛନ୍ତି।
