ଦୁବାଇ, ୩।୧୦: ଚଳିତ ଆଇପିଏଲ୍ରେ ଶୁକ୍ରବାର ଅନୁଷ୍ଠିତ ଏକ ମ୍ୟାଚ୍ରେ ଚେନ୍ନାଇ ସୁପର୍ କିଙ୍ଗ୍ସ ୭ ରନରେ ସନ୍ରାଇଜର୍ସ ହାଇଦ୍ରାବାଦ୍ ନିକଟରୁ ପରାସ୍ତ ହୋଇଥିଲା। ଏହି ମ୍ୟାଚ୍ରେ ହାଇଦ୍ରାବାଦ୍ ପକ୍ଷରୁ ଧାର୍ଯ୍ୟ ୧୬୫ ରନର ଟାର୍ଗେଟ୍କୁ ପିଛା କରି ମହେନ୍ଦ୍ର ସିଂ ଧୋନୀଙ୍କ ଦଳ ୫ ଉଇକେଟ୍ରେ ୧୫୭ ରନ କରିବାକୁ ସମର୍ଥ ହୋଇଥିଲା। ଷ୍ଟାର୍ ଅଲ୍ରାଉଣ୍ଡର ରବୀନ୍ଦ୍ର ଜାଡେଜା ୩୫ ବଲରୁ ୫୦ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ ମଧ୍ୟ ଦଳକୁ ଜିତାଇ ପାରି ନ ଥିଲେ। ତେବେ ଏହି ଅର୍ଦ୍ଧଶତକ ସହ ସେ ଆଇପିଏଲ୍ରେ ଏକ ସ୍ବତନ୍ତ୍ର କ୍ଲବରେ ସାମିଲ ହୋଇଛନ୍ତି। ଆଇପିଏଲ୍ ଇତିହାସରେ ପ୍ରଥମ ଖେଳାଳି ଭାବେ ଜାଡେଜା ୨ ହଜାର ରନ୍ ପୂରଣ କରିବା ସହିତ ୧୦୦ ଉଇକେଟ୍ ମଧ୍ୟ ହାସଲ କରିଛନ୍ତି। ୨୦୦୮ରେ ଦିଲ୍ଲୀ ଡେୟାରଡେଭିଲ୍ସ ବିପକ୍ଷରେ ଖେଳି ଆଇପିଏଲ୍ କ୍ୟାରିୟାର ଆରମ୍ଭ କରିଥିବା ଜାଡେଜା ବର୍ତ୍ତମାନ ସୁଦ୍ଧା ୧୭୪ ମ୍ୟାଚ୍ରେ ୨୪.୧ ଆଭରେଜରେ ୨ ହଜାର ରନ୍ ପୂରଣ କରିଛନ୍ତି। ସେ ଆଇପିଏଲ୍ରେ ଗୋଟିଏ ଅର୍ଦ୍ଧଶତକ ସହ ୬୭ ଛକା ମାରିଛନ୍ତି। ସେହିଭଳି ବୋଲିଂରେ ସେ ୭.୬୬ ଇକୋନୋମିରେ ୧୧୦ ଉଇକେଟ୍ ଅକ୍ତିଆର କରିଛନ୍ତି। ଗୋଟିଏ ଥର ଜାଡେଜା ୫ ଉଇକେଟ୍ ସଫଳତା ପାଇଛନ୍ତି।
