ନୂଆଦିଲ୍ଲୀ,୧୬।୨: ଆଫଗାନିସ୍ତାନର ଅଧିନାୟକ ରଶିଦ ଖାନ୍ କ୍ରିକେଟ୍ ଜଗତରେ ଏକ ନୂତନ ମାଇଲଖୁଣ୍ଟ ସ୍ଥାପନ କରିଛନ୍ତି। ସୋମବାର ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଅନୁଷ୍ଠିତ ଆଇସିସି ପୁରୁଷ ଟି-୨୦ ବିଶ୍ୱକପ୍ ୨୦୨୬ ର ଏକ ଗ୍ରୁପ୍ ପର୍ଯ୍ୟାୟ ମ୍ୟାଚରେ ସଂଯୁକ୍ତ ଆରବ ଏମିରେଟ୍ସ (UAE) ବିପକ୍ଷରେ ସେ ଏହି ଐତିହାସିକ ସଫଳତା ହାସଲ କରିଛନ୍ତି। ଟି-୨୦ କ୍ରିକେଟ୍ ଇତିହାସରେ ୭୦୦ ୱିକେଟ୍ ଅକ୍ତିଆର କରିବାରେ ସେ ବିଶ୍ୱର ପ୍ରଥମ ବୋଲର ହୋଇଛନ୍ତି।
UAE ଇନିଂସର ୧୬ତମ ଓଭରରେ ମହମ୍ମଦ ଅରଫାନଙ୍କୁ ‘ହିଟ୍-ୱିକେଟ୍’ କରି ରଶିଦ ନିଜର ୭୦୦ତମ ୱିକେଟ୍ ପୂରଣ କରିଥିଲେ। ରଶିଦ ମାତ୍ର ୫୧୩ଟି ଇନିଂସରେ ଏହି ଲକ୍ଷ୍ୟ ହାସଲ କରିଛନ୍ତି। ମାତ୍ର ୨୭ ବର୍ଷ ବୟସରେ ସେ ଏହି ସଫଳତା ପାଇ ସମସ୍ତଙ୍କୁ ପଛରେ ପକାଇ ଦେଇଛନ୍ତି।
୭୦୦ ୱିକେଟ୍ କ୍ଲବରେ ରଶିଦ ଏକାକୀ ଥିବା ବେଳେ ତାଙ୍କ ପଛକୁ ଡ୍ୱେନ୍ ବ୍ରାଭୋ (୬୩୧ ୱିକେଟ୍) ଏବଂ ସୁନିଲ ନାରାୟଣ (୬୧୩ ୱିକେଟ୍) ରହିଛନ୍ତି।
ଟି-୨୦ ଅନ୍ତର୍ଜାତୀୟ (T20I) କ୍ରିକେଟରେ ମଧ୍ୟ ରଶିଦ ୧୯୧ ୱିକେଟ୍ ସହ ପ୍ରଥମ ସ୍ଥାନରେ ରହିଛନ୍ତି। ଏହି ତାଲିକାରେ ଟିମ୍ ସାଉଦି (୧୬୪ ୱିକେଟ୍) ଦ୍ୱିତୀୟ ଏବଂ ଈଶ ସୋଢୀ (୧୬୨ ୱିକେଟ୍) ତୃତୀୟ ସ୍ଥାନରେ ଅଛନ୍ତି।
