ନୂଆଦିଲ୍ଲୀ,୨୭।୩: ଭାରତୀୟ ଟିମ୍ର ଅଧିନାୟକ ବିରାଟ କୋହଲି ଏଭଳି ଜଣେ ଷ୍ଟାର ବ୍ୟାଟ୍ସମ୍ୟାନ୍, ଯାହାଙ୍କୁ ସାମ୍ନା କରିବାକୁ ବୋଲରମାନେ ଦ୍ୱିଧା ପ୍ରକାଶ କରିଥାନ୍ତି। ଘରୋଇ ହେଉ ଅଥବା ବିଦେଶ ମଇଦାନରେ ଏହି ବ୍ୟlଟ୍ସମ୍ୟାନ୍ ନିଜର ଦମ୍ ଦେଖାଇବାର କ୍ଷମତା ରଖିଛନ୍ତି। ହେଲେ କିଛି ବୋଲର କୋହଲିଙ୍କୁ କିଭଳି ଆଉଟ୍ କରିବେ ତାହା ଜାଣି ସାରିଛନ୍ତି। ପୁଣେରେ ଶୁକ୍ରବାର ଖେଳାଯାଇଥିବା ମ୍ୟାଚ୍ରେ ଆଦିଲ ରସିଦ ବିରାଟଙ୍କ ଉଇକେଟ ନେବା ପରେ ଏକ ଆଶ୍ଚର୍ଯ୍ୟ କଲାଭଳି ଘଟଣା ସାମ୍ନାକୁ ଆସିଛି।
ବିରାଟ ଦ୍ୱିତୀୟ ଦିନିକିଆରେ ୭୯ ବଳ୍ରୁ ୩ ଚୌକା ଏବଂ ୧ ଛକା ସହ ୬୬ରନ୍ର ଅର୍ଦ୍ଧଶତକୀୟ ଇନିଂସ ଖେଳିଥିଲେ। ହେଲେ ରସିଦଙ୍କ ବଲ୍ରେ ଉଇକେଟକିପର ଜୋଶ ବଟଲରଙ୍କୁ କ୍ୟାଚ୍ ଦେଇଥିଲେ। ଦୀର୍ଘ ସମୟ ଧରି କୋହଲି ଶତକ ମାରିବାରୁ ବଞ୍ଚିତ ହେଉଥିବାରୁ ଏଥର ସୁଯୋଗ ହାତଛଡ଼ା କରିବାକୁ ଚାହୁଁ ନ ଥିଲେ। ବେଶ ସଂଯମତାର ସହ ଖେଳୁଥିଲେ ହେଁ ବିଦେଶୀ ସ୍ପିନର ରସିଦ ମ୍ୟାଚ୍ର ୩୨ ଓଭରର ଶେଷ ବଲ୍ରେ ଉଇକେଟ ନେଇଥିଲେ। ବିରାଟ ପଏଣ୍ଟ ଦିଗରେ ଏକ ଶଟ୍ ଖେଳିବାକୁ ଚାହୁଁଥିଲେ। କିନ୍ତୁ ରସିଦ ତାଙ୍କୁ ନିଜ ଜାଲରେ ଫସାଇ ଭାରତକୁ ଝଟକା ଦେଇଥିଲେ। ପୂର୍ବରୁ କୋହଲି ୩୫ରନ୍ରେ ଖେଳୁଥିବା ବେଳେ ରସିଦଙ୍କ ଅନ୍ୟ ଏକ ବଲ୍ରେ କ୍ୟାଚ୍ ଦେଇଥିଲେ। ହେଲେ ବଟଲରଙ୍କ ଯୋଗୁ ସେ ଜୀବନଦାନ ପାଇଥିଲେ।
କୋହଲି ଲଗାତାର ଭାବେ ରସିଦଙ୍କ ବଲ୍ର ଶିକାର ହେଉଥିବା ନଜର ଆସୁଛି। ଅନ୍ତର୍ଜାତୀୟ କ୍ରିକେଟରେ ଏପରି ୯ମ ଥର ପାଇଁ ହୋଇଛି। କୋହଲିଙ୍କୁ ଅଧିକାଂଶ ଥର ଆଉଟ୍ କରିବା ମାମଲାରେ ରସିଦ ଦ୍ୱିତୀୟ ସ୍ଥାନରେ ପହଞ୍ଚିଛନ୍ତି। ଏହି ମାମଲାରେ ଶୀର୍ଷରେ ରହିଛନ୍ତି ନ୍ୟୁଜିଲାଣ୍ଡର ଟିମ୍ ସାଉଥୀ। ସେ ୧୦ ଥର ବିରାଟଙ୍କ ଉଇକେଟ ନେଲେଣି। ସେହିଭଳି ଜେମ୍ସ ଆଣ୍ଡରସନ ୮ ଥର ବିରାଟଙ୍କ ଉଇକେଟ ନେଇଛନ୍ତି।
