ଆସନ୍ତାକାଲି ମହାକାଶରେ ଘଟିବାକୁ ଯାଉଛି ଏକ ବିରଳ ଘଟଣା । ସୂର୍ଯ୍ୟ, ଚନ୍ଦ୍ର ଓ ପୃଥିବୀ ଗୋଟିଏ ସରଳରେଖାରେ ରହିବେ । ସୂର୍ଯ୍ୟ ଓ ପୃଥିବୀ ମଧ୍ୟରେ ଚନ୍ଦ୍ର ଗୋଟିଏ ସରଳରେଖାରେ ରହିବା ଯୋଗୁଁ ପୃଥିବୀ ପୃଷ୍ଠକୁ ସୂର୍ଯ୍ୟାଲୋକ ପଡ଼ିବ ନାହିଁ । ତେଣୁ ଦିନ ପାଲଟିଯିବ ରାତି । ଏହି ସଂପୂର୍ଣ୍ଣ ସୂର୍ଯ୍ୟୋପରାଗକୁ ନେଇ ସମସ୍ତଙ୍କ ମନରେ ଉତ୍ସୁକତା ରହିଥିବା ବେଳେ ଏହାକୁ ନେଇ ସୋସିଆଲ ମିଡିଆରେ ଏକ ବଡ଼ ଗୁଜବ ଏବେ ଚର୍ଚ୍ଚାର ବିଷୟ ପାଲଟିଛି ।
ଏହା ଭିତରେ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ଏକ ଗୁଜବ ଘୂରି ବୁଲୁଛି ଯେ ସୂର୍ଯ୍ୟୋପରାଗ ବେଳେ ୭.୩ ସେକେଣ୍ଡ ପାଇଁ ଜିରୋ ଗ୍ରାଭିଟି ହୋଇଯିବ ଅର୍ଥାତ୍ ୭.୩ ସେକେଣ୍ଡ ପାଇଁ ପୃଥିବୀର ମାଧ୍ୟାକର୍ଷଣ ଶକ୍ତି ଶୂନ ହୋଇଯିବ । ଏଭଳି ଏକ ସ୍ଥିତି ସୃଷ୍ଟି କରିବା ପାଇଁ ବର୍ଷେ ହେଲା ନାସା କାଳେ ଅଭିଯାନ ଚଳାଇଥିଲା ଆଉ କାଲି ସେଇ ସମୟ ଆସୁଛି ବୋଲି ସୋସିଆଲ ମିଡିଆରେ ଭାଇରାଲ ହେଉଛି ।
ଯଦିଓ ଆମେ ସମସ୍ତେ ଜାଣିଛେ ଯେ ପୃଥିବୀର ମାଧ୍ୟାକର୍ଷଣ ଶକ୍ତି କେବେ ବି ଶୂନ ହୋଇପାରିବ ନାହିଁ । ଜିରୋ ଗ୍ରାଭିଟିର କୌଣସି ବୈଜ୍ଞାନିକ ଆଧାର ବି ନାହିଁ । ଏଭଳି କଳ୍ପନାଭିତ୍ତିକ ପରିସ୍ଥିତି କେବେ ପ୍ରକୃତରେ ଘଟିପାରିବ ନାହିଁ କିନ୍ତୁ ମାଧ୍ୟାକର୍ଷଣ ଶକ୍ତି ଶୂନ ହୋଇଗଲେ, ପୃଥିବୀରେ କେଉଁ ପ୍ରକାର ପରିବର୍ତ୍ତନ ହୋଇପାରେ ଆସନ୍ତୁ ଜାଣିବା ।
ମାଧ୍ୟାକର୍ଷଣ ଶୂନ ହେଲେ କ’ଣ ହେବ? ମଣିଷ ଓ ବସ୍ତୁ ଓଜନହୀନ ହୋଇଯିବେ, ମଣିଷମାନେ ଭାସିବା ଭଳି ଅନୁଭବ କରିବେ, ସମସ୍ତ ସାମଗ୍ରୀ ଭାସମାନ ଅବସ୍ଥାକୁ ଚାଲିଯିବେ, ନଦୀ-ସମୁଦ୍ରର ପାଣି ପୃଥିବୀ ପୃଷ୍ଠରେ ରହିପାରିବ ନାହିଁ, ପାଣି ଉପରକୁ ଉଠି ବିକ୍ଷିପ୍ତ ଭାବେ ଛିଟିକି ଯାଇପାରେ, ପୃଥିବୀର ବାୟୁମଣ୍ଡଳ ଉପରକୁ ବିସ୍ତାରିତ ହୋଇପାରେ ଓ
ମଣିଷ, ପାଣି, ବାୟୁ, ଢିଲା ବସ୍ତୁରେ ଭୟଙ୍କର ଅସ୍ଥିରତା ଆସିପାରେ।
ବୈଜ୍ଞାନିକ ଅନୁସନ୍ଧାନ କୁହେ, ପୃଥିବୀ ସ୍ବଳ୍ପ ସମୟ ପାଇଁ ମାଧ୍ୟାକର୍ଷଣ ଶକ୍ତି ଶୂନ୍ୟ ହେଲେ ଯେତିକି ବିପଦ, ମାଧ୍ୟାକର୍ଷଣ ଫେରିବା ସମୟ ତାଠାରୁ ଆହୁରି ବିପଜ୍ଜନକ କାରଣ ଭାସମାନ ଅବସ୍ଥାରେ ରହିଥିବା ମଣିଷ, ପାଣି, ବସ୍ତୁ, ବାୟୁ ମାଧ୍ୟାକର୍ଷଣ ଶକ୍ତି ଫେରିଲେ ପୃଥିବୀ ପୃଷ୍ଠକୁ ତ୍ବରିତ ବେଗରେ ଖସିବେ । ଆଉ ସେତେବେଳେ ଭୟଙ୍କର ଘର୍ଷଣ, ପାଣିର ଚଳନ, ଧୂଳି ଓ ବାୟୁର ଅସମ୍ଭବ ଅସ୍ଥିରତା ଅକଳ୍ପନୀୟ ଅଘଟଣ ଘଟାଇପାରେ । ତେବେ ନାସା ପକ୍ଷରୁ ଏକଥା ସ୍ପଷ୍ଟ କରିଦିଆଯାଇଛି ଯଏ କୌଣସି ପରିସ୍ଥିତିରେ ପୃଥିବୀର ମାଧ୍ୟାକର୍ଷଣ ଶକ୍ତି ଶୂନ ହୋଇପାରିବ ନାହିଁ ।
