ପୁରୀ, ୧୮।୭(ଅଜିତ୍ ମହାନ୍ତି ): ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ଘୋଷଯାତ୍ରା ଅବସରରେ ଶ୍ରୀକ୍ଷେତ୍ର ପୁରୀରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି। ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଭକ୍ତମାନେ ମହାପ୍ରଭୁଙ୍କ ଦର୍ଶନ ସହ ପବିତ୍ର ସମୁଦ୍ରରେ ସ୍ନାନ କରି ପୁଣ୍ୟଲାଭ କରୁଛନ୍ତି। ଭକ୍ତମାନଙ୍କ ସୁରକ୍ଷା ଏବଂ ଶୃଙ୍ଖଳିତ ସ୍ନାନ ପାଇଁ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ସହ ପୋଲିସ, ଅଗ୍ନିଶମ ଓ ଜୀବନରକ୍ଷକ ଦଳକୁ ନିୟୋଜିତ କରାଯାଇଛି।
ଏହି ମଧ୍ୟରେ ଶନିବାର ପୂର୍ବାହ୍ନରେ ସ୍ୱର୍ଗଦ୍ୱାର ବେଳାଭୂମିରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଥିଲା। ଦୁଇଟି ଷଣ୍ଢ ସମୁଦ୍ରର ପାଣି ମଧ୍ୟରେ ପରସ୍ପର ସହ ଲଢ଼େଇ କରୁଥିବା ଦେଖି ଉପସ୍ଥିତ ଭକ୍ତ ଓ ପର୍ଯ୍ୟଟକମାନେ କିଛି ସମୟ ପାଇଁ ଅଟକି ଯାଇଥିଲେ। ସମୁଦ୍ରର ଉଚ୍ଚ ଲହରିକୁ ଖାତିର ନ କରି ଉଭୟ ଷଣ୍ଢ ଲଢ଼େଇ ଜାରି ରଖିଥିଲେ।
ଘଟଣା ଦେଖି ବେଳାଭୂମିରେ ଉପସ୍ଥିତ ଲୋକମାନଙ୍କ ମଧ୍ୟରେ କିଛି ସମୟ ପାଇଁ କୌତୁହଳ ସୃଷ୍ଟି ହୋଇଥିଲା। କେତେକ ଲୋକ ଷଣ୍ଢ ଦୁଇଟିକୁ ସେଠାରୁ ଘଉଡ଼ାଇବା ପାଇଁ ପାଟି କରିବା ସହ ସେମାନଙ୍କୁ ସମୁଦ୍ରରୁ ବାହାର କରିବାକୁ ଉଦ୍ୟମ କରିଥିଲେ। ତେବେ ଏହି ଘଟଣାରେ କୌଣସି ଭକ୍ତ କିମ୍ବା ପର୍ଯ୍ୟଟକ ଆହତ ହୋଇଥିବାର ସୂଚନା ମିଳିନାହିଁ।
ଘୋଷଯାତ୍ରା ଅବସରରେ ପୁରୀରେ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ଼ ଥିବାରୁ ବେଳାଭୂମି ସମେତ ସହରର ସମସ୍ତ ପ୍ରମୁଖ ସ୍ଥାନରେ ପ୍ରଶାସନ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି।
