ନୂଆଦିଲ୍ଲୀ,୨୬।୧୨: ଚାଇନାରେ କରୋନା ଭାଇରସ୍ ତାଣ୍ଡବ ରଚିବାରେ ଲାଗିଛି। ଉକ୍ତ ଦେଶରେ ଲଗାତର ଭାବେ ପଜିଟିଭ୍ ମାମଲା ବୃଦ୍ଧି ପାଇବା ସହ ମୃତକଙ୍କ ସଂଖ୍ୟା ମଧ୍ୟ ଦ୍ରୁତ ଗତିରେ ବଢ଼ିବାରେ ଲାଗିଛି। ଚାଇନାର ପରିସ୍ଥିତିକୁ ଦେଖି ଭାରତ ସରକାର ମଧ୍ୟ ସର୍ତକ ରହିବା ସହ ସଜାଗ ହୋଇଯାଇଛନ୍ତି। କେନ୍ଦ୍ର ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ, ଭାରତରେ କୋଭିଡକୁ ନେଇ ସମସ୍ତ ପ୍ରସ୍ତୁତିକୁ ମଜଭୁତ କରାଯାଉଛି। ଏଥିସହ ବିମାନ ବନ୍ଦରରେ ବିଦେଶରୁ ଆସୁଥିବା ଲୋକଙ୍କ ନମୁନା ସଂଗ୍ରହ କରାଯାଉଛି। ଯାହା ଦ୍ୱାରା ଯଦି ଜଣେ ବ୍ୟକ୍ତି କରୋନାରେ ସଂକ୍ରମିତ ହୁଅନ୍ତି, ତେବେ ତାଙ୍କୁ ଠିକ୍ ସମୟରେ କ୍ୱାରାଣ୍ଟାଇନ୍ କରାଯାଇପାରିବ। ଅନ୍ୟପଟେ ବିଭିନ୍ନ ବିମାନ ବନ୍ଦରରେ କରୋନାର ରାଣ୍ଡମ ଟେଷ୍ଟ କରାଯାଉଛି ବୋଲି ସୋମବାର କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିଆ ଟୁଇଟରରେ ସୂଚନା ଦେଇଛନ୍ତି। ସେ ଟୁଇଟରରେ କେତେକ ଫଟୋ ଶେୟାର କରିଛନ୍ତି। ଯେଉଁଥିରେ ବିମାନ ବନ୍ଦରରେ କରୋନାର ରାଣ୍ଡମ ଯାଞ୍ଚ ଆରମ୍ଭ ହୋଇଥିବା ଦେଖିବାକୁ ମିଳିଛି। ବିମାନବନ୍ଦର କର୍ତ୍ତୃପକ୍ଷ ମଧ୍ୟ ସରକାରଙ୍କ ନିର୍ଦ୍ଦେଶ ପାଳନ କରୁଥିବା ଦେଖାଯାଉଛି। ସେହିପରି ମଙ୍ଗଳବାରରୁ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ହସ୍ପିଟାଲରେ ‘ମକ୍ ଡ୍ରିଲ୍’ କରାଯିବ। ଏହାଦ୍ୱାରା ସମସ୍ତ ଜିଲାରେ ସ୍ବାସ୍ଥ୍ୟ ସୁବିଧା ଉବଲବ୍ଧତା, କ୍ୱାରାଣ୍ଟାଇନ୍ ଶଯ୍ୟା କ୍ଷମତା, ଅକ୍ସିଜେନ୍ ସୁବିଧା, ଆଇସିୟୁ ଶଯ୍ୟା ଏବଂ ଭେଣ୍ଟିଲେଟର ଶଯ୍ୟା ସହିତ ଜିଲାରେ ଡାକ୍ତର ଓ ଅନ୍ୟାନ୍ୟ ସ୍ବାସ୍ଥ୍ୟ କର୍ମଚାରୀଙ୍କ ଉବଲବ୍ଧତା ଉପରେ ଧ୍ୟାନ ଦିଆଯିବ। ସୂଚନାଯୋଗ୍ୟ, ନିକଟରେ ମାଲେସିଆର କୁଆଲାଲମ୍ପୁରର ଜଣେ ମହିଳା କୋଲକାତା ବିମାନବନ୍ଦରରେ କରୋନା ପଜିଟିଭ ଚିହ୍ନଟ ହୋଇଥିଲେ। ଉକ୍ତ ୩୮ବର୍ଷିୟା ମହିଳାଙ୍କୁ ବେଲେଘାଟା ଆଇଡିରେ ଭର୍ତ୍ତି କରାଯାଇଛି।
