ବେଙ୍ଗାଲୁରୁ କାଫେ ବିସ୍ଫୋରଣ ଘଟଣା: ସାମ୍ନାକୁ ଆସିଲା ନୂଆ ଭିଡିଓ, ହିନ୍ଦୁ ନାଁ ନେଇ କରିଥିଲେ ହୋଟେଲ ବୁକ୍
05 ବେଙ୍ଗାଲୁରୁ,୧୩ା୪: ବେଙ୍ଗାଲୁରୁର ରାମେଶ୍ୱରମ କାଫେ ବିସ୍ଫୋରଣ ମାମଲାରେ ଏନ୍ଆଇଏକୁ ଶୁକ୍ରବାର ଏକ ବଡ଼ ସଫଳତା ମିଳିଥିଲା। ତଦନ୍ତକାରୀ ସଂସ୍ଥା ବଙ୍ଗଳାର ଦୁଇ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତମାନଙ୍କ ମଧ୍ୟରେ ମୁସାଭିର ହୁସେନ ଶାଜେବ ଏହି ବିସ୍ଫୋରଣର ମାଷ୍ଟରମାଇଣ୍ଡ ଏବଂ ଏହି ବିସ୍ଫୋରଣ ଘଟାଇଥିବା ବ୍ୟକ୍ତି ଅବଦୁଲ ମାଥିନ ଅହମ୍ମଦ ତାହା।
ଅଭିଯୁକ୍ତ ଗିରଫ ହେବା ପରେ ବର୍ତ୍ତମାନ ଉଭୟଙ୍କ ସିସିଟିଭି ଫୁଟେଜ ମଧ୍ୟ ସାମ୍ନାକୁ ଆସିଛି। ଏହି ଭିଡିଓରେ ଉଭୟେ କୋଲକାତାର ଏକବଲପୁରର ଏକ ଘରୋଇ ହୋଟେଲରେ ରୁମ୍ ବୁକିଂ କରୁଥିବା ଦେଖିବାକୁ ମିଳିଛି। ମାର୍ଚ୍ଚ ୨୫ରେ ଶାଜେବ ତାଙ୍କ ପରିଚୟ ଲୁଚାଇ ଏଠାକୁ ଯାଇ ସେଠାରେ ତିନି ଦିନ ରହିଥିଲେ।
ଅଧିକାରୀଙ୍କ କହିବାନୁସାରେ, ଉଭୟ ସନ୍ଦିଗ୍ଧ ଆଇଏସ୍ ଆତଙ୍କବାଦୀ ଏକ ମାସ ଧରି ପଶ୍ଚିମବଙ୍ଗରେ ରହୁଥିଲେ। ମାର୍ଚ୍ଚ ୧୨ରେ ଦୁହେଁ ଦାର୍ଜିଲିଂ ଦେଇ ପର୍ଯ୍ୟଟକ ଭାବରେ କୋଲକାତାରେ ପହଞ୍ଚିଥିଲେ। ସେମାନେ ମହାନଗର ଏବଂ ହୋଟେଲର ପରିଚୟ ପରିବର୍ତ୍ତନ କରି ହୋଟେଲରେ ରହୁଥିଲେ। ସେ ନକଲି ଆଧାର କାର୍ଡ, ଡ୍ରାଇଭିଂ ଲାଇସେନ୍ସ ଏବଂ ଅନ୍ୟାନ୍ୟ ପରିଚୟପତ୍ର ତିଆରି କରିଥିଲେ।
ଶନିବାର ଏକ ସ୍ବତନ୍ତ୍ର ଏନ୍ଆଇଏ କୋର୍ଟ ରାମେଶ୍ୱରମ କାଫେ ବିସ୍ଫୋରଣ ମାମଲାରେ ଦୁଇଜଣ ଅଭିଯୁକ୍ତଙ୍କୁ ୧୦ ଦିନିଆ ଏନ୍ଆଇଏ ହେପାଜତକୁ ଅଧିକ ତଦନ୍ତ ପାଇଁ ପଠାଇଛି। ଆଜି ଜାତୀୟ ଅନୁସନ୍ଧାନ ଏଜେନ୍ସିର ସ୍ବତନ୍ତ୍ର ଅଦାଲତର ବିଚାରପତିଙ୍କ ସମ୍ମୁଖରେ ମୁସାଭିର ହୁସେନ ଶାଜେବ ଏବଂ ଅବଦୁଲ ମାଥିନ ଅହମ୍ମଦ ତାହାଙ୍କୁ ହାଜର କରାଯାଇଛି।
ସୂଚନାଯୋଗ୍ୟ, ମାର୍ଚ୍ଚ ୧ ରେ ରାମେଶ୍ୱରମ କାଫେ ବିସ୍ଫୋରଣରେ ୧୦ଜଣ ଆହତ ହୋଇଥିବା ଅଭିଯୋଗରେ ଅଭିଯୁକ୍ତମାନଙ୍କୁ ଟ୍ରାଞ୍ଜିଟ୍ ରିମାଣ୍ଡରେ କୋଲକାତାଠାରୁ ରାଜ୍ୟ ରାଜଧାନୀକୁ ଅଣାଯାଇଥିଲା।