ମୋହନା, ୨୫।୩(ମ୍ନମଥ ମିଶ୍ର): ମୋହନା ସହରଠାରୁ ମାତ୍ର ଦୁଇ କି.ମି. ଦୂର ଲେକାପଦର ଗାଁର ରମେଶ ମଳିକ। ଯକ୍ଷ୍ମା ରୋଗରେ ଆକ୍ରାନ୍ତ ହୋଇ ସେ ଅର୍ଥ ଅଭାବରୁ ଚିକିତ୍ସା କରିପାରୁନାହାନ୍ତି। ବିଜୁ ସ୍ବାସ୍ଥ୍ୟ କାର୍ଡ ପାଖରେ ଥାଇ ମଧ୍ୟ ଏବେ ଅଲୋଡ଼ା ହୋଇପଡିଥିବା ବେଳେ ଆୟୁଷ୍ମାନ କାର୍ଡ ଏପର୍ଯ୍ୟନ୍ତ ମିଳିନି ତାଙ୍କୁ। ରମେଶ ଦଶ ବର୍ଷ ତଳେ ଯକ୍ଷ୍ମା ରୋଗରେ ଆକ୍ରାନ୍ତ ହୋଇଥିଲେ। କିଛି ଦିନ ପରେ ଧୀରେ ଧୀରେ ତାଙ୍କ ଛାତିରେ କଫ ରହି ଇମ୍ଫେକ୍ସନ ହୋଇ ଟ୍ୟୁମର ହୋଇଯାଇଥିଲା। ଗୁରୁତର ଅବସ୍ଥାରେ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲରେ ଭର୍ତ୍ତି କରି ଚିକିତ୍ସା କରାଇଥିଲେ ପରିବାର ଲୋକେ। ସେଠାରେ ତାଙ୍କ ଅବସ୍ଥାରେ କୌଣସି ସୁଧାର ଆସି ନ ଥିଲା। ଫଳରେ ୨୦୨୪ରେ ତାଙ୍କୁ ଆନ୍ଧ୍ର ପ୍ରଦେଶର ଶ୍ରୀୀକାକୁଲମ ପରେ ବିଶାଖାପାଟଣାର ଏକ ଘରୋଇ ଡାକ୍ତରଖାନାରେ ପରିବାର ଲୋକେ ଚିକିତ୍ସା କରି ଅପରେଶନ କରିଥିଲେ। ସେତେବେଳେ ବିଜୁ ସ୍ବାସ୍ଥ୍ୟ କାର୍ଡ ମାଧ୍ୟମରେ ଅପରେସନ ହୋଇଗଲା ହେଲେ ଏବେ ଆଉ ସେହି କାର୍ଡ କାମ କରୁନାହିଁ। ରମେଶଙ୍କ ପାଖରେ ଆୟୁଷ୍ମାନ କାର୍ଡ଼ ନ ଥିବାରୁ ସେ ମାଗଣା ସ୍ବାସ୍ଥ୍ୟସେବାରୁ ବଞ୍ଚତ୍ତ ହୋଇଛନ୍ତି। ଏବେ ସେ ଅର୍ଥ ଅଭାବରୁ ଘରେ ପଡ଼ି ରହିଛନ୍ତି। ଘରେ ଆର୍ଥିକ ଅନାଟନ ଲାଗି ରହିଛି। ପୁଅ ସନାତନ ଡିପ୍ଲୋମା ପଢି ଚାକିରି ନ ପାଇ ଏବେ ଜଙ୍ଗଲରେ ଛେଳି ଚରାଇବା ସହ କୁଲି ମଜୁରି କରି ପରିବାର ଚଳାଉଛନ୍ତି। ଅନ୍ୟପଟେ ସ୍ତ୍ରୀ ସୁଲୋଚନା ଜଙ୍ଗଲରୁ ଶୁଖିଲା କାଠ ଆଣି ବିଡ଼ା କରି ବିକ୍ରି କରିବା ସହ କୁଲି ମଜୁରି କରି ରମେଶଙ୍କ ସେବା କରିବା ସହ ଘର ଚଳାଉଛନ୍ତି । ଯଦି ସରକାର ରମେଶଙ୍କୁ ଭଲ ମେଡିକାଲରେ ଚିକତ୍ସା କରାନ୍ତେ ସେ ଭଲ ହୋଇପାରନ୍ତେ ବୋଲି ଆଶା ରଖିଛନ୍ତି। କୌଣସି ବଦାନ୍ୟ ବ୍ୟକ୍ତି ତାଙ୍କୁ ଆର୍ଥତ୍କ ସହାୟତା ଯୋଗାଇ ଦେବାକୁ ନିବେଦନ କରିଛନ୍ତି ରମେଶ।
