ମୁମ୍ବାଇ: ସାଉଥ୍ ଅଭିନେତା ରାମଚରଣଙ୍କ ଫିଲ୍ମ ‘ଆର୍ଆର୍ଆର୍’ର ଗୀତ ‘ନାଟୁ ନାଟୁ’କୁ ଓସ୍କାର ମିଳିବା ପରେ ତାହା ଏବେ ଟ୍ରେଣ୍ଡିଂରେ ରହିଛି। ଏଥିସହ ଅଭିନେତା ରାମଚରଣଙ୍କ ଲୋକପ୍ରିୟତା ଆହୁରି ବଢ଼ିଯାଇଛି। ତେବେ ସେ ଏବେ ତାଙ୍କ ଆଗାମୀ ଫିଲ୍ମକୁ ନେଇ ବ୍ୟସ୍ତ ଅଛନ୍ତି। ରାମଚରଣ ସୋମବାର ନିଜ ଜନ୍ମଦିନ ଅବସରରେ ତାଙ୍କ ଫିଲ୍ମର ନାମ ଘୋଷଣା କରିଛନ୍ତି। ଏନେଇ ରାମଚରଣ ତାଙ୍କ ଟୁଇଟର ହ୍ୟାଣ୍ଡେଲରେ ଶେୟାର କରିଛନ୍ତି। ପୂର୍ବରୁ ତାଙ୍କ ଫିଲ୍ମର ନାମ ଥିଲା ଆର୍ସି ୧୫। ପରେ ନାଁ ବଦଳି ‘ଗେମ୍ ଚେଞ୍ଜର’ ରଖାଯାଇଛି। ଏସ୍. ଶଙ୍କରଙ୍କ ନିର୍ଦ୍ଦେଶିତ ଏହି ଫିଲ୍ମ ଏକ ଭାରତୀୟ ତେଲଗୁ ରାଜନୈତିକ ଥ୍ରିଲର ଉପରେ ଆଧାରିତ। ଏଥିରେ ତାଙ୍କ ସହ ଅଭିନେତ୍ରୀ କିଆରା ଆଡ୍ଭାନୀଙ୍କୁ ଦେଖିବାକୁ ମିଳିବ। ଏଥିସହ ଫିଲ୍ମରେ ଅଞ୍ଜଳି, ସମୁଥିରାକାନି, ଏସ୍ଜେ ସୂର୍ଯ୍ୟ, ଶ୍ରୀକାନ୍ତ ଏବଂ ସୁନୀଲ ମଧ୍ୟ ଭିନ୍ନ ଚରିତ୍ରରେ ନଜର ଆସିବେ। ରାମଚରଣ ପୂର୍ବରୁ ଏସ୍ଏସ୍ ରାଜମୌଲିଙ୍କ ଫିଲ୍ମ ‘ଆର୍ଆର୍ଆର୍’ରେ ଅଭିନୟ କରିଥିଲେ। ତେବେ ରାମଚରଣ ୨୦୦୭ରେ ଫିଲ୍ମ ‘ଚିରୁଥା’ ଜରିଆରେ ଫିଲ୍ମ ଜଗତରେ ଏଣ୍ଟ୍ରି କରିଥିଲେ।
