ଅଯୋଧ୍ୟା,୨।୯: ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟକୁ ମିଳିଛନ୍ତି ପ୍ରଥମ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ)। ଭାରତୀୟ ବାୟୁସେନାର ଅବସରପ୍ରାପ୍ତ ଏୟାର ମାର୍ଶଲ ଜିତେନ୍ଦ୍ର ମିଶ୍ରାଙ୍କୁ ଏହି ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତ କରାଯାଇଛି। ୩୮ ବର୍ଷରୁ ଅଧିକ ସମୟ ଧରି ଦେଶସେବା କରିଥିବା ଏୟାର ମାର୍ଶଲ ମିଶ୍ରାଙ୍କୁ ସର୍ବୋତ୍ତମ ଯୁଦ୍ଧ ସେବା ମେଡାଲ, ଅତି ବିଶିଷ୍ଟ ସେବା ମେଡାଲ ଓ ବିଶିଷ୍ଟ ସେବା ମେଡାଲରେ ସମ୍ମାନିତ କରାଯାଇସାରିଛି।
ଟ୍ରଷ୍ଟର ନିୟମାନୁସାରେ, ରାମ ମନ୍ଦିର ସିଇଓଙ୍କ ଦରମା କୌଣସି ସରକାରୀ ପେ-ସ୍କେଲ୍ ଅନୁଯାୟୀ ହେବ ନାହିଁ। ବରଂ ଏହା ଆଲୋଚନା (Negotiation) ମାଧ୍ୟମରେ ସ୍ଥିର କରାଯିବ। ପ୍ରାର୍ଥୀଙ୍କ ପ୍ରଶାସନିକ ଅଭିଜ୍ଞତା, ପ୍ରଫେସନାଲ ବ୍ୟାକଗ୍ରାଉଣ୍ଡ ଓ ପୂର୍ବ କାର୍ଯ୍ୟରକର୍ଡକୁ ଦୃଷ୍ଟିରେ ରଖି ଏକ ହାଇ-ଲେଭେଲ୍ ଏକଜିକ୍ୟୁଟିଭ୍ ପ୍ୟାକେଜ୍ ସ୍ଥିର କରାଯିବ।
ସିଇଓ ପ୍ୟାକେଜ୍ରେ ମିଳିବାକୁ ଥିବା ସୁବିଧାସୁଯୋଗ:
ବାସଗୃହ: ଅଯୋଧ୍ୟାରେ ରହିବା ପାଇଁ ସ୍ୱତନ୍ତ୍ର ସରକାରୀ ବାସଗୃହ।
ସୁରକ୍ଷା ଓ ଯାତାୟାତ: ସରକାରୀ ଗାଡ଼ି ଏବଂ ଆଡମିନିଷ୍ଟ୍ରେଟିଭ୍ ସିକ୍ୟୁରିଟି।
ଅନ୍ୟାନ୍ୟ ଭତ୍ତା: ମନ୍ଦିରର ଦୈନନ୍ଦିନ ପରିଚାଳନା, ଲକ୍ଷାଧିକ ଭକ୍ତଙ୍କ ଭିଡ଼ ପରିଚାଳନା ଏବଂ ଟ୍ରଷ୍ଟର ଆର୍ଥିକ କାରବାର ପରିଚାଳନା ପାଇଁ ନିର୍ଦ୍ଧାରିତ ବିଶେଷ ସୁବିଧାସୁଯୋଗ।
ଭାରତୀୟ ବାୟୁସେନାରେ ଏୟାର ମାର୍ଶଲ ପଦବୀରେ ଥିବାବେଳେ ମୂଳ ଦରମା (Pay Level 15) ପ୍ରାୟ ₹୧,୮୨,୨୦୦ ଟଙ୍କା ପ୍ରତିମାସ ଥିଲା। ଏହା ବ୍ୟତୀତ ମହଙ୍ଗା ଭତ୍ତା (DA), ପରିବହନ ଭତ୍ତା, ସୈନ୍ୟ ସେବା ଦରମା (MSP) ଏବଂ ପୋଷ୍ଟିଂ ଅନୁଯାୟୀ ଫ୍ଲାଇଂ କିମ୍ବା ହାଇ-ଆଲଟିଚ୍ୟୁଡ୍ ଆଲାଉନ୍ସ ମିଳୁଥିଲା। ଅବସର ପରେ ମଧ୍ୟ ଏହି ପଦବୀର ଅଫିସରଙ୍କୁ ସରକାରଙ୍କ ପକ୍ଷରୁ ଅନେକ ଅବସରକାଳୀନ ଆର୍ଥିକ ସୁବିଧାସୁଯୋଗ ମିଳିଥାଏ।
ରାମ ମନ୍ଦିରର ନୂତନ ସିଇଓ ଭାବେ ଏୟାର ମାର୍ଶଲ ଜିତେନ୍ଦ୍ର ମିଶ୍ରଙ୍କ ନିଯୁକ୍ତି ଦ୍ୱାରା ମନ୍ଦିରର ଆଡମିନିଷ୍ଟ୍ରେସନ୍, ଆର୍ଥିକ ପରିଚାଳନା ଏବଂ ସୁରକ୍ଷା ବ୍ୟବସ୍ଥା ଅଧିକ ମଜବୁତ ହେବ ବୋଲି ଆଶା କରାଯାଉଛି।