ମୁମ୍ବାଇ,୨୪।୬: ବଲିଉଡର ଜାତୀୟ ପୁରସ୍କାର ବିଜେତା ଅଭିନେତା ରାଜକୁମାର ରାଓ ପୂର୍ବତନ ଭାରତୀୟ କ୍ରିକେଟ ଅଧିନାୟକ ସୌରଭ ଗାଙ୍ଗୁଲିଙ୍କ ଜୀବନୀ ଉପରେ ନିର୍ମିତ ଏକ ବାୟୋପିକରେ ତାଙ୍କ ଚରିତ୍ରରେ ଅଭିନୟ କରିବେ। ଏକ ସାକ୍ଷାତକାରରେ ରାଜକୁମାର ଏହି ଖବରକୁ ନିଶ୍ଚିତ କରିଛନ୍ତି।
“ଯେହେତୁ ଦାଦା (ସୌରଭ ଗାଙ୍ଗୁଲି) ଏହା କହି ସାରିଛନ୍ତି, ମୁଁ ମଧ୍ୟ ଏହାକୁ ଆନୁଷ୍ଠାନିକ କରୁଛି – ହଁ, ମୁଁ ତାଙ୍କ ବାୟୋପିକରେ ତାଙ୍କ ଚରିତ୍ରରେ ଅଭିନୟ କରୁଛି,” ରାଜକୁମାର କହିଛନ୍ତି।
ଏହି ଭୂମିକା ପାଇଁ ସେ “ଅତ୍ୟନ୍ତ ନର୍ଭସ” ଥିବା ସ୍ୱୀକାର କରିଛନ୍ତି, କିନ୍ତୁ ଏହା ଏକ ବଡ଼ ଚ୍ୟାଲେଞ୍ଜ ବୋଲି ମଧ୍ୟ ଉତ୍ସାହିତ। “ମୁଁ ନର୍ଭସ… ଏହା ଏକ ବିଶାଳ ଦାୟିତ୍ୱ, କିନ୍ତୁ ଏହା ବହୁତ ମଜାଦାର ହେବ,” ସେ କହିଛନ୍ତି। ସାକ୍ଷାତକାର ସମୟରେ ରାଜକୁମାର ତାଙ୍କ ବଙ୍ଗଳା ଭାଷା ଦକ୍ଷତା ପ୍ରଦର୍ଶନ କରି ପ୍ରଶଂସକମାନଙ୍କୁ ଖୁସି କରିଛନ୍ତି। ତାଙ୍କ ପତ୍ନୀ ଅଭିନେତ୍ରୀ ପତ୍ରଲେଖା, ଯିଏ ବଙ୍ଗଳୀ, ତାଙ୍କ ଠାରୁ ସେ ଏହି ଭାଷା ଶିଖିଛନ୍ତି। ରାଜକୁମାର ପରଦାରେ ବଙ୍ଗଳା ଉଚ୍ଚାରଣ ଠିକ୍ କରିବା ପାଇଁ ଆତ୍ମବିଶ୍ୱାସୀ ବୋଲି ମଧ୍ୟ କହିଛନ୍ତି।
ଭାରତର ଅତ୍ୟନ୍ତ ସଫଳ କ୍ରିକେଟ ଅଧିନାୟକମାନଙ୍କ ମଧ୍ୟରୁ ଜଣେ ସୌରଭ ଗାଙ୍ଗୁଲି ନିକଟରେ ରାଜକୁମାରଙ୍କ ଚୟନକୁ ସମର୍ଥନ କରିଛନ୍ତି। “ମୁଁ ଭାବୁଛି ସଠିକ୍ ବ୍ୟକ୍ତି ଏହା କରୁଛନ୍ତି… ମୁଁ ତାଙ୍କୁ ସବୁ କ୍ଷେତ୍ରରେ ସାହାଯ୍ୟ କରିବି,” ଗାଙ୍ଗୁଲି କହିଛନ୍ତି। ୧୯୯୨ରୁ ୨୦୦୮ ମଧ୍ୟରେ ଭାରତ ପାଇଁ ଖେଳିଥିବା ଏହି ପୂର୍ବତନ ଅଧିନାୟକ ପ୍ରକାଶ କରିଛନ୍ତି ଯେ ଚଳଚ୍ଚିତ୍ରଟି ୨୦୨୬ ଜାନୁଆରୀରେ ଶୁଟିଂ ଆରମ୍ଭ କରିବ ଏବଂ ଡିସେମ୍ବର ୨୦୨୬ରେ ଥିଏଟରରେ ମୁକ୍ତିଲାଭ କରିବ।
ଗାଙ୍ଗୁଲି ଆହୁରି କହିଛନ୍ତି, “ରାଜକୁମାରଙ୍କୁ ଚଳଚ୍ଚିତ୍ର ପାଇଁ ଚୂଡ଼ାନ୍ତ କରାଯାଇଛି। ମୋ ଭୂମିକା ପାଇଁ ତାଙ୍କ ଠାରୁ ଉତ୍ତମ ଆଉ କେହି ନାହାନ୍ତି।” ସୌରଭ ଏହି ବାୟୋପିକର ସৃଜନାତ୍ମକ ପ୍ରକ୍ରିୟାରେ ନିବିଡ଼ ଭାବେ ଜଡ଼ିତ ଅଛନ୍ତି, ଯାହା କୋଲକାତାର ରାସ୍ତାଘାଟରୁ ଭାରତୀୟ କ୍ରିକେଟର ଉଚ୍ଚ ଶିଖରକୁ ତାଙ୍କ ଯାତ୍ରାକୁ ଚିତ୍ରଣ କରିବ।
ଏହି ଚଳଚ୍ଚିତ୍ର, ଯାହାର ନାମ ଏପର୍ଯ୍ୟନ୍ତ ଘୋଷଣା ହୋଇନାହିଁ, ଏହାର ନିର୍ଦ୍ଦେଶନା ଦେବେ ବିକ୍ରମାଦିତ୍ୟ ମୋଟଓ୍ୱାନେ।
ଏହା ପୂର୍ବରୁ ରାଜକୁମାର ରାଓ ପରଦାରେ ବାସ୍ତବ ଚରିତ୍ରରେ ଅଭିନୟ କରିଛନ୍ତି।। ସେ ଆଗରୁ ଓକିଲ-ମାନବାଧିକାର କର୍ତ୍ୟୟ ଶାହିଦ ଆଜମି (‘ଶାହିଦ’), ଆତଙ୍କବାଦୀ ଆହମଦ ଓମର ସଈଦ ଶେଖ (‘ଓମେର୍ତା’) ଏବଂ ଦୃଷ୍ଟିହୀନ ଶିଳ୍ପପତି ଶ୍ରୀକାନ୍ତ ବୋଲା (ଶ୍ରୀକାନ୍ତ ) ଭଳି ଚରିତ୍ରେ ଅଭିନୟ କରି ପ୍ରଶଂସା ପାଇଛନ୍ତି।
