ଜୟପୁର,୨୯।୪: ଗତ ବର୍ଷ ଜଣେ ୧୫ ବର୍ଷୀୟ ନାବାଳିକାଙ୍କୁ ବଳାତ୍କାର ଏବଂ ନିର୍ମମ ଭାବେ ହତ୍ୟା ଅଭିଯୋଗରେ ୨ ଅଭିଯୁକ୍ତଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରିଛନ୍ତି ରାଜସ୍ଥାନର ଏକ ପୋକ୍ସୋ କୋର୍ଟ। ୨୦୨୧ ଡିସେମ୍ବର ୨୩ରେ ଘଟିଥିବା ଏହି ଜଘନ୍ୟ କାଣ୍ଡ ଉପରେ ଶୁଣାଣି କରି ବିଚାରପତି ବାଳକୃଷ୍ଣ ମିଶ୍ର ଅଭିଯୁକ୍ତ ସୁଲତାନ୍(୨୭) ଏବଂ ଛୋଟୁଲାଲ୍(୬୨)ଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଆସନ୍ତା ୧୧ ଦିନ ମଧ୍ୟରେ କୋର୍ଟର ଆଦେଶକୁ କାର୍ଯ୍ୟକାରୀ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଏଥିସହ ଉଭୟ ଅଭିଯୁକ୍ତଙ୍କ ଉପରେ ୧.୨୦ ଲକ୍ଷର ଜରିମାନା ଲଗାଯାଇଛି। ତେବେ ପୋକ୍ସୋ କୋର୍ଟରେ ଅଭିଯୁକ୍ତଙ୍କୁ ମୃତ୍ୟୁ ଦଣ୍ଡାଦେଶ ଦିଆଯିବା ଦେଶରେ ପ୍ରଥମ ବୋଲି ପବ୍ଲିକ୍ ପ୍ରୋସିକ୍ୟୁଟର ମହାବିର ସିଂହ ଦାବି କରିଛନ୍ତି।
ବୁନ୍ଦି ପୋଲିସ ଅଧୀକ୍ଷକ ଜୟ ଯାଦବ ଏନେଇ ସୂଚନା ଦେଇ କହିଛନ୍ତି, ୨୦୨୧ ଡିସେମ୍ବର ୨୩ରେ ବାସୋଲି ପୋଲିସ ଷ୍ଟେଶନ ଅନ୍ତର୍ଗତ ଏକ ଜଙ୍ଗଲରୁ ଉଲଗ୍ନ ଅବସ୍ଥାରେ ଜଣେ ନାବାଳିକାଙ୍କ ମୃତଦେହ ଉଦ୍ଧାର କରାଯାଇଥିଲା। ନାବାଳିକାଜଣଙ୍କ ଛେଳି ଚରାଇବାକୁ ଯାଇଥିବା ବେଳେ ୩ଜଣ ତାଙ୍କୁ ଅପହରଣ କରିନେଇ ବଳାତ୍କାର କରିଥିଲେ। ପରେ ତାଙ୍କର ଗଳାକାଟି ହତ୍ୟା କରିଥିଲେ। ମୃତ୍ୟୁ ପରେ ମଧ୍ୟ ସେମାନେ ତାଙ୍କୁ ବଳାତ୍କାର କରିଥିବା ଜଣାପଡ଼ିଥିଲା। ନାବାଳିକାଙ୍କ ଦେହର ୧୯ଟି ସ୍ଥାନରେ କାମୁଡ଼ା ଚିହ୍ନ ରହିଥିଲା। ୨୦୦ରୁ ଅଧିକ ପୋଲିସ କର୍ମଚାରୀଙ୍କ ଏକ ଟିମ୍ ଅପରାଧର ୧୨ ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ଗିରଫ କରିଥିଲା। ପରେ ତାଙ୍କର ସ୍ବିକାରୋକ୍ତି ଗ୍ରହଣ କରି ତିନି ଦିନରେ ପୋକ୍ସୋ କୋର୍ଟରେ ଶହେ ପୃଷ୍ଠା ବିଶିଷ୍ଟ ଚାର୍ଜସିଟ ଦାଖଲ କରିଥିଲା। ତୃତୀୟ ଅଭିଯୁକ୍ତ ନାବାଳକ ଥିବାରୁ ତାଙ୍କୁ ସୁଧାରଗୃହକୁ ପଠାଯାଇଥିଲା। ତେବେ ବାଳିକା ଏବଂ ମହିଳାଙ୍କ ପ୍ରତି ହେଉଥିବା ଅପରାଧରେ ପୋଲିସ ସମ୍ବେଦନଶୀଳ ହୋଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ସେ କହିଛନ୍ତି।
ଅପରପକ୍ଷେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏକ ବିବୃତ୍ତିରେ ତାଙ୍କ ସରକାର ମହିଳାଙ୍କ ସୁରକ୍ଷା ପ୍ରତି ପ୍ରତିବଦ୍ଧ ଏବଂ ଏପରି ଅପରାଧ ଘଟାଇଥିବା କୌଣସି ଦୋଷୀଙ୍କୁ କ୍ଷମା କରାଯିବ ନାହିଁ ବୋଲି କହିଛନ୍ତି। ସେହିଭଳି କୋର୍ଟଙ୍କ ନିଷ୍ପତ୍ତିକୁ ଉଲ୍ଲେଖ କରି ସେ କହିଛନ୍ତି, ରାଜ୍ୟରେ ଏହା ପ୍ରଥମ ଘଟଣା ଯେଉଁଠି ପୋକ୍ସୋ ଅଧିନିୟମ ଅନୁଯାୟୀ ଦୁଇଜଣ ଦୋଷୀଙ୍କୁ ଏକାସହ ମୃତ୍ୟୁଦଣ୍ଡ ଦିଆଯାଇଛି। ସରକାର କ୍ଷମତାକୁ ଆସିବା ପରେ ୬୨୦ ଅଭିଯୁକ୍ତ ପୋକ୍ସୋ ଅଧିନିୟମରେ ଦୋଷୀ ସାବ୍ୟସ୍ତ ହୋଇଛନ୍ତି। ସେମାନଙ୍କ ମଧ୍ୟରୁ ୮ଜଣଙ୍କୁ ମୃତ୍ୟୁଦଣ୍ଡ ଏବଂ ୧୩୭ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିବା ସେ ମଧ୍ୟ କହିଛନ୍ତି।
