ନୂଆଦିଲ୍ଲୀ,୨୯ ।୯: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଗୁରୁବାର କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀଙ୍କୁ ତାଙ୍କ ବାସ ଭବନ ୧୦ ଜନପଥରେ ଭେଟିଥିଲେ । ଏହାଥିଲା ଏକ ଗୁରୁତ୍ୱପୂର୍ଣ୍ଣ ସାକ୍ଷାତ୍କାର । ଏହାପରେ ରାଜସ୍ଥାନ ମୁଖ୍ୟମନ୍ତ୍ରୀ ପଦକୁ ନେଇ ଏକ ପ୍ରଶ୍ନରେ ଗେହଲୋଟ କହିଛନ୍ତି, ରାଜସ୍ଥାନ ମୁଖ୍ୟମନ୍ତ୍ରୀ ଆସନ କାହାର ତାହା ମୁଁ ନୁହେଁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ସ୍ଥିର କରିବେ । ଏହାସହ ଗେହଲୋଟ ସ୍ପଷ୍ଟ କରିଛନ୍ତି କି ଏଭଳି ପରିସ୍ଥିତିରେ ସେ କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ଲଢିବେ ନାହିଁ ।
ମୁଖ୍ୟମନ୍ତ୍ରୀ ଅଶୋକ ଗେହଲୋଟ କହିଛନ୍ତି, ମୁଁ ସୋନିଆ ଗାନ୍ଧୀଙ୍କ ସହ ସମ୍ପୂର୍ଣ୍ଣ ଭାବେ କଥା ହେବା ପରେ ତାଙ୍କୁ କ୍ଷମା ମାଗିଛି । ଗତ ୫୦ ବର୍ଷ ଧରି ଦଳର ଜଣେ ବିଶ୍ୱସ୍ତ ସିପାହୀ ଭାବେ କାମ କରିଛି । ସୋନିଆ ଗାନ୍ଧୀଙ୍କ ଆଶୀର୍ବାଦରୁ ତୃତୀୟ ଥର ମୁଖ୍ୟମନ୍ତ୍ରୀ ହୋଇଛି ।
ଗଣମାଧ୍ୟମ ସହ କଥା ହୋଇ ଗେହଲୋଟ କହିଛନ୍ତି, ଗୋଟିଏ ଧାଡିର ସଂକଳ୍ପ ଆମର ପରମ୍ପରା । ଦୁର୍ଭାଗ୍ୟଯୋଗୁ ଏମିତି ପରିସ୍ଥିତି ଉପୁଜିଲା ଯେ ପ୍ରସ୍ତାବ ପାସ ହୋଇ ପାରିଲା ନାହିଁ । ଏହା ମୋର ନୈତିକ ଦାୟିତ୍ୱ ଥିଲା ହେଲେ ମୁଖ୍ୟମନ୍ତ୍ରୀ ଥିବା ସତ୍ତ୍ୱେ ପ୍ରସ୍ତାବ ପାସ କରିପାରିଲି ନାହିଁ । ରାଜସ୍ଥାନର ଏହି ଘଟଣା ବାର୍ତ୍ତା ଦେଉଛି କି ମୁଁ ମୁଖ୍ୟମନ୍ତ୍ରୀ ହେବାକୁ ଚାହୁଁଛି । ଏହି ଘଟଣାକୁ ନେଇ ମୁଁ କଂଗ୍ରେସ ଅଧ୍ୟକ୍ଷଙ୍କୁ କ୍ଷମା ମାଗିଛି ।
ଏବେ ଗୋଟିଏ ପଟେ ସୋନିଆଙ୍କ ସହ ସାକ୍ଷାତ୍ ପରେ ଅଶୋକ ଗେହଲୋଟ ସାମାନ୍ୟ ଅସନ୍ତୁଷ୍ଟ ନଜର ଆସୁଥିବା ବେଳେ ଅନ୍ୟପଟେ ସଚ୍ଚିନ ପାଇଲଟଙ୍କୁ ମୁଖ୍ୟମନ୍ତ୍ରୀ ଆସନରେ ଦେଖିବାକୁ ଅରାଜି ଅଛନ୍ତି ଅଶୋକ ଓ ତାଙ୍କ ସମର୍ଥକ । ତେଣୁ ଏବେ ରାଜସ୍ଥାନ ମୁଖ୍ୟମନ୍ତ୍ରୀ ପଦକୁ ନେଇ ସସପେନ୍ସ ଆରମ୍ଭ ହୋଇଥିବା ଅନୁମାନ କରାଯାଉଛି ।
