ଧାମନଗର, ୮।୭ (ଡି.ଏନ.ଏ.) ଭଦ୍ରକ ଜିଲା ଧାମନଗର ବ୍ଲକ ଦୋବଲ ବଜାରରେ ଦିନକୁ ଦିନ ଟ୍ରାଫିକ ଓ ଡ୍ରେନେଜ ସମସ୍ୟା ଗୁରୁତର ହେବାରେ ଲାଗିଛି। ଦୋବଲ ବସ୍ଷ୍ଟାଣ୍ଡଠାରୁ କାଳୀବଜାର ରାସ୍ତାର ଉଭୟ ପାର୍ଶ୍ୱରେ ବିଭିନ୍ନ ଗାଡ଼ି ଦୀର୍ଘ ସମୟ ଧରି ଛିଡ଼ା ହୋଇ ରହୁଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଛି। ଏପରିକି ଜଣେ ଚାଲି ଚାଲି ଯିବା ମଧ୍ୟ କଷ୍ଟକର ହୋଇପଡୁଛି। ଅନ୍ୟପଟେ ସେହି ସ୍ଥାନରେ ବର୍ଷାପାଣି ନିଷ୍କାସନ ହୋଇ ନ ପାରି ରାସ୍ତାରେ ଜମି ରହୁଛି। ଫଳରେ ପଥଚାରୀଠାରୁ ଆରମ୍ଭ କରି ସାଇକେଲ ଆରୋହୀ ଓ ହାଲୁକା ଯାନ ଯାତାୟାତରେ ସମସ୍ୟା ଉପୁଜୁଛି। ସାମାନ୍ୟ ବର୍ଷା ହେଲେ ରାସ୍ତାରେ ଆଣ୍ଠୁଏ ପାଣି ଜମୁଛି। ରାସ୍ତାର ଉଭୟ ପାର୍ଶ୍ୱରେ ଦୋକାନ ଥିବାରୁ ପାଣି ନିଷ୍କାସନ ହୋଇପାରୁ ନାହିଁ। କେତେକ ଦୋକାନୀ ଜବରଦଖଲ କରି ଆଗକୁ ମାଡ଼ି ଆସିଥିବାରୁ ରାସ୍ତା ସଂକୀର୍ଣ୍ଣ ହୋଇଛି। ଫଳରେ ବର୍ଷାଦିନେ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି।
ଧାମନଗର-ଦୋବଲ ରାସ୍ତାର ଧାମନଗର କଲେଜଠାରୁ ଦୋବଲ ବଜାର ଗେଙ୍ଗୁଟି ନଦୀବନ୍ଧ ବସ୍ଷ୍ଟାଣ୍ତ ପର୍ଯ୍ୟନ୍ତ ରାସ୍ତାର ଦୁଇପାର୍ଶ୍ୱରେ କେତେଜଣ ବ୍ୟକ୍ତି ଜବରଦଖଲ କରି ଦୋକାନ ଗୃହ ସହ ସ୍ଥାୟୀ ପକ୍କାଘର କରୁଥିବାରୁ ରାସ୍ତା ସଂକୁଚିତ ହେବାରେ ଲାଗିଛି। ସମ୍ପ୍ରସାରଣ ହୋଇ ନ ପାରିବା ସାଙ୍ଗକୁ ଡ୍ରେନେଜ୍ ବ୍ୟବସ୍ଥା ନ ଥିବାରୁ ରାସ୍ତାରେ ବର୍ଷାପାଣି ଜମିବା ସହ କେତେକ ଦୋକାନ ଓ ଘରେ ମଧ୍ୟ ପଶୁଛି। ସେହିପରି ରାସ୍ତା ସଂକୀର୍ଣ୍ଣକୁ ଦୋକାନୀମାନେ ଦୋକାନ ସମ୍ମୁଖରେ ଘଣ୍ଟା ଘଣ୍ଟା ଧରି ବଡ଼ ଟ୍ରକ୍ ଓ ପିକ୍ଅପ୍ ଗାଡ଼ିକୁ ଠିଆ କରି ରଖୁଥିବା ଯୋଗୁ ରାସ୍ତା ଜାମ୍ ରହୁଛି। ପ୍ରଶାସନ ପକ୍ଷରୁ ଦୋବଲ ବଜାର ରାସ୍ତାର ଉଭୟ ପାର୍ଶ୍ୱରେ ଡ୍ରେନେଜ ବ୍ୟବସ୍ଥା କରାଯିବା ସହ ଜବରଦଖଲ ହଟାଇବାକୁ ସାଧାରଣରେ ଦାବି ହେଉଛି।
