ବାଙ୍ଗିରିପୋଷି,୨୨।୧୧(ଡି.ଏନ.ଏ.)- ଅଦିନିଆ ବର୍ଷାରେ ମୟୂରଭଞ୍ଜ ଜିଲା ବାଙ୍ଗିରିପୋଷି ବ୍ଲକ ଅଞ୍ଚଳରେ ଫସଲ ଉଜୁଡ଼ି ଯାଇଛି। ଶୁକ୍ରବାର ଅପରାହ୍ନରେ ଓ ଶନିବାର ସକାଳେ ବର୍ଷା ଲାଗି ରହିଥିଲା। ବର୍ଷାରେ ଜମିରେ ପାଚିଲା ଧାନ ଭିଜୁଥିବା ବେଳେ ହେକ୍ଟର ହେକ୍ଟର ଜମିରେ ରବି ଫସଲ ନଷ୍ଟ ହୋଇଯାଇଛି। ଯାହାକି ଚାଷୀମାନଙ୍କ ରୋଜଗାର ଛଡ଼ାଇ ନେଇଛି।
ବର୍ଷା ଯୋଗୁ କୋହଲା ପାଗ ସାଙ୍ଗକୁ ଶୀତ ବେଶ୍ ଅନୁଭୂତ ହୋଇଥିଲା। ଏହି ବର୍ଷା ପାଇଁ ଶୀତଦିନିଆ ପରିବା ଫସଲ ଉପରେ ସମ୍ପର୍ଣ୍ଣ ପ୍ରଭାବ ପଡ଼ିଛି। ବ୍ଲକ ଅଞ୍ଚଳରେ ହୋଇଥିବା ଶତାଧିକ ଏକର ଫୁଲ କୋବି, ବନ୍ଧା କୋବି, ଟମୋଟୋ, ମୂଳା, ବାଇଗଣ ଫସଲ ପ୍ରଭାବିତ ହୋଇଛି। ବର୍ଷା ଯୋଗୁ ଫୁଲକୋବିରେ ପୋକ ସୃଷ୍ଟି ହୋଇ ନଷ୍ଟ ହେବାର ଆଶଙ୍କା ରହିଥିବା ବେଳେ ଅନ୍ୟ ପନିପରିବା ଫସଲ ମଧ୍ୟ ନଷ୍ଟ ହେବ ବୋଲି ସ୍ଥାନୀୟ ଚାଷୀମାନେ ପ୍ରକାଶ କରିଛନ୍ତି। ସେହିପରି ବର୍ତ୍ତମାନ ଧାନ ଅମଳ ସମୟ। ଅନେକ ସ୍ଥାନରେ ଜମିରେ ପାଚିଲା ଧାନ ଅମଳ ନ ହୋଇ ରହିଥିବା ଓ କେତେକ ସ୍ଥାନରେ ଧାନ କଟା ହୋଇ କିମ୍ବା ଗୋଦା ହୋଇ ରଖାଯାଇଛି। ଚାଷୀମାନେ ଋଣ କରିବା ସହ ବିଭିନ୍ନ ସୂତ୍ରରୁ ଟଙ୍କା ଆଣି ଚାଷ କରିଥିବା ବେଳେ ଅଦିନିଆ ବର୍ଷାରେ ଫସଲ ନଷ୍ଟ ହୋଇଯାଇଥିବାରୁ ସେମାନେ ଚିନ୍ତାରେ ପଡ଼ିଛନ୍ତି। ଏହି ବର୍ଷା ସେମାନଙ୍କ ରୋଜଗାର ଛଡ଼ାଇ ନେଇଥିବା ଚାଷୀମାନେ କହିଛନ୍ତି। ସରକାରଙ୍କ ପକ୍ଷରୁ କ୍ଷୟକ୍ଷତିର ଆକଳନ କରି ସହାୟତା ପ୍ରଦାନ କରାଯିବାକୁ ଦାବି ହେଉଛି।
