ଅନୁଗୋଳ ଅଫିସ, ୬।୧୨: ବାତ୍ୟା ଜଓ୍ବାଦ ପ୍ରଭାବରେ ୨ ଦିନ ଧରି ବର୍ଷା ଲାଗିରହିବାରୁ ଅନୁଗୋଳ ଜିଲାର ସହସ୍ରାଧିକ ଏକର ଧାନ ଫସଲ ନଷ୍ଟ ହୋଇଯିବା ଆଶଙ୍କା ସୃଷ୍ଟି ହୋଇଛି। ପାଚିଲା ଧାନ ଜମିରେ ବର୍ଷା ପାଣି ଠିଆ ହୋଇରହିଥିବାରୁ ତଳେ ଲୋଟୁଥିବା ଧାନ ଗଜା ହୋଇଯିବା ସମ୍ଭାବନା ବଢ଼ିଯାଇଛି। ଏହାକୁ ନେଇ ଚାଷୀମାନଙ୍କ ଚିନ୍ତା ବଢ଼ିଯାଇଛି। ବର୍ଷକର ଫସଲ କିପରି ବଞ୍ଚାଇବେ ତାହାକୁ ନେଇ ସେମାନେ ଥଳକୂଳ ପାଉ ନ ଥିବା ବେଳେ ଜିଲା କୃଷି ବିଭାଗ ସୋମବାର ପୂର୍ବାହ୍ନରେ ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଥିବା ସୂଚନା ମିଳିଛି। ଏପରି କି ସୋମବାର କ୍ଷେତ୍ର ଅନୁଧ୍ୟାନ ସହ କ୍ଷୟକ୍ଷତି ଆକଳନ କରାଯିବ ବୋଲି ଜଣାପଡ଼ିଛି।
ପ୍ରକାଶ ଯେ, ଚଳିତବର୍ଷ ମୌସୁମୀ ବର୍ଷା ଠିକ୍ ସମୟରେ ନ ହେବାରୁ ଜିଲାରେ ଧାନ ଫସଲ ଧାର୍ଯ୍ୟ ଲକ୍ଷ୍ୟ ପୂରଣ ହୋଇପାରି ନ ଥିଲା। ଜିଲାରେ ପ୍ରଥମେ ୮୬ ହଜାର ହେକ୍ଟରରେ ଧାନ ଚାଷ ହେବା ପାଇଁ ନିଷ୍ପତ୍ତି ନିଆଯାଇଥିଲା। କିନ୍ତୁ ନିଅଣ୍ଟିଆ ବର୍ଷା କାରଣରୁ ୭୨ ହଜାର ହେକ୍ଟର ଜମିରେ ଧାନ ଚାଷ କରାଯାଇଥିଲା। ତେବେ ଯେତିକି ଫସଲ କରାଯାଇଥିଲା ସେଥିରେ ଗତମାସରେ ଘନ ଘନ ଲଘୁଚାପ ବାଧକ ସାଜିଥିବାବେଳେ ଡିସେମ୍ବରରେ ବାତ୍ୟା ଜଓ୍ବାଦ ଅମଳ ସମୟରେ ବ୍ୟାପକ କ୍ଷୟକ୍ଷତି ଘଟାଇଛି। ଜିଲାର ସହସ୍ରାଧିକ ଏକର ଚାଷ ଜମିରେ ବର୍ଷା ପାଣି ଛିଡ଼ା ହୋଇ ରହିଥିବାବେଳେ ବହୁ ସ୍ଥାନରେ ଧାନ ଗଛ ପାଣିରେ ଶୋଇଯାଇଛି। ବର୍ତ୍ତମାନ ସୁଦ୍ଧା ଚାଷ ହୋଇଥିବା ଜମିରୁ ମାତ୍ର ୨୫ରୁ ୩୦ ପ୍ରତିଶତ ଅମଳ ସରିଛି। ବାକି ୭୦ ପ୍ରତିଶତ ଧାନ ଫସଲ ବର୍ଷା ପାଣିରେ ବିଲରେ ଲୋଟିଥିବା ଜିଲା କୃଷି ବିଭାଗ ପକ୍ଷରୁ କୁହାଯାଇଛି। କେବଳ ଧାନ ଚାଷ ନୁହେଁ ବିରି, ମୁଗ, ହରଡ଼, ରାଶି ଓ ପରିବା ଚାଷୀମାନେ ମଧ୍ୟ ସମସ୍ୟାରେ ପଡ଼ିଛନ୍ତି। ଏ ନେଇ ଜିଲା କୃଷି ବିଭାଗ ପକ୍ଷରୁ ସୋମବାର ପୂର୍ବାହ୍ନରେ ପାଲଲହଡ଼ା, ତାଳଚେର, କଣିହଁା, ଅନୁଗୋଳ, ବଅଁରପାଳ ଆଦି ଅଞ୍ଚଳର କୃଷି ଅଧିକାରୀଙ୍କୁ ବୈଠକକୁ ଡକାଯାଇଛି। ଆଠମଲ୍ଲିକ ଉପଖଣ୍ଡ ଅଞ୍ଚଳରେ ବର୍ଷାର ପ୍ରଭାବ ସେତେଟା ନ ଥିବାରୁ ସେଠାରେ ଥିବା କୃଷି ଅଧିକାରୀଙ୍କୁ ଘଟଣାର ଅନୁଧ୍ୟାନ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ବୈଠକ ପରେ ବିଭିନ୍ନ ଅଞ୍ଚଳରେ କ୍ଷେତ୍ର ପରିଦର୍ଶନ ସହ କ୍ଷୟକ୍ଷତିର ଆକଳନ କରାଯିବ ବୋଲି ଜିଲା ମୁଖ୍ୟ କୃଷି ଅଧିକାରୀ ଦେବରାଜ ମହାନ୍ତି ସୂଚନା ଦେଇଛନ୍ତି।
